ភ្នំពេញ ៖ អ្នកជំនាញផ្នែកសុខភាព បានអំពាវនាវឲ្យរាជរដ្ឋាភិបាលកម្ពុជាដំឡើងពន្ធលើផលិតផលថ្នាំជក់បន្ថែម ដើម្បីកាត់បន្ថយអ្នកស្លាប់ដោយសារការប្រើប្រាស់ថ្នាំជក់ និងអ្នកស្រូបយកផ្សែងបារីពីគេ។
ការអំពាវនាវនេះបានធ្វើឡើងនៅក្នុងសន្និសីទមួយ នាព្រឹកថ្ងៃទី២៣មេសា នេះ នៅសណ្ឋាគារសាន់វ៉េ រាជធានីភ្នំពេញ។
លោក យ៉ិល ដារ៉ាវុធ តំណាងអង្គការសុខភាពពិភពលោក បានមានប្រសាសន៍លើកឡើងថា ការដំឡើងពន្ធថ្នាំជក់ឲ្យខ្ពស់ គឺជាវិធានការដែលមានប្រសិទ្ធភាពខ្ពស់ មិនត្រឹមតែអាចកាត់បន្ថយចំនួនអ្នកជក់បារីប៉ុណ្ណោះទេ ប៉ុន្តែរាជរដ្ឋាភិបាល ក៏បានចំណូលកាន់តែច្រើនពីការដំឡើងពន្ធនេះផងដែរ។
ចំណែក លោក មុំ គង់ នាយកប្រតិបត្តិអង្គការចលនា ដើម្បីសុខភាពកម្ពុជា មានប្រសាសន៍ថា កម្ពុជា អាចទទួលបានផលប្រយោជន៍សុខភាពសាធារណៈបាន លុះត្រាតែពន្ធលើផលិតផលថ្នាំជក់ក្នុងកម្រិតអតិផរណាណាមួយជាក់លាក់បំផុត។ លោកបន្តថា តាមការអង្កេតលើមតិយុវជននៅឆ្នាំ២០១៨ បានបង្ហាញថា យុវជនភាគច្រើន នឹងឈប់ទិញបារីជក់ បើតម្លៃបារីឡើងដល់ ១ម៉ឺនរៀលក្នុង១កញ្ចប់ ខណៈបច្ចុប្បន្នបារីខ្លះ តម្លៃត្រឹមតែ២ពាន់រៀលប៉ុណ្ណោះ។ លោកបន្ថែមថា ការប្រើប្រាស់ថ្នាំជក់ នៅតែជាមូលហេតុចម្បង ដែលបណ្តាលឲ្យស្លាប់។ តាមការអង្កេតរបស់ក្រុមជំនាញផ្នែកសុខភាពនៅកម្ពុជា ប្រជាពលរដ្ឋប្រមាណ១០.០០០នាក់ ស្លាប់ជារៀងរាល់ឆ្នាំ បណ្តាលមកពីជំងឺដែលបង្កដោយការប្រើប្រាស់ថ្នាំជក់ ខណៈដែលការព្យាបាលជំងឺទាំងនេះ ត្រូវចំណាយខ្ពស់។
ជាមួយគ្នានេះដែរ លោក Ulysses Dorotheo នាយកប្រតិបត្តិសម្ព័ន្ធត្រួតពិនិត្យថ្នាំជក់អាស៊ីអាគ្នេយ៍ មានប្រសាសន៍ថា គោលនយោបាយពន្ធលើថ្នាំជក់របស់កម្ពុជា ក្នុងរយៈពេលប៉ុន្មានឆ្នាំចុងក្រោយ ពុំទាន់ឆ្លើយតបទាំងស្រុងចំពោះការកាត់បន្ថយការប្រើប្រាស់ថ្នាំជក់នៅឡើយទេ។ លោកបន្តថា កម្ពុជាហូតពន្ធតែ ២៥% ទៅ៣០% បើធៀបនឹងតម្លៃលក់រាយ នៃផលិតផលថ្នាំជក់ ហើយកម្ពុជាស្ថិតក្នុងចំណោមប្រទេស ដែលមានអត្រាពន្ធលើថ្នាំជក់ទាបជាងគេបំផុត នៅក្នុងបណ្ដាប្រទេសអាស៊ាន។
ច្បាប់ស្ដីពីការត្រួតពិនិត្យផលិតផលថ្នាំជក់ ត្រូវបានអនុម័តនៅឆ្នាំ២០១៥ ចង្អុលបង្ហាញវិធានការសំខាន់ៗពាក់ព័ន្ធទៅនឹងការផ្គត់ផ្គង់ និងការកាត់បន្ថយតម្រូវការថ្នាំជក់ រួមទាំងវិធានការពន្ធដារផងដែរ ដោយសមស្របណាមួយនឹងអនុសញ្ញា ស្តីពីការត្រួតពិនិត្យផលិតផលថ្នាំជក់ ដែលកម្ពុជាបានផ្តល់សច្ចាប័ននៅឆ្នាំ២០០៥៕
Source: Kampuchea Thmey Daily
0 Comments