នៅក្នុងសេចក្ដីថ្លែងការណ៍មួយទៅកាន់កាសែត The Irish News, ក្រុមសាធារណរដ្ឋ New IRA នៅថ្ងៃអង្គារបានសារភាពទទួលខុសត្រូវចំពោះការសម្លាប់អ្នកកាសែតអៀរឡង់ខាងជើងឈ្មោះ Lyra McKee អំឡុងកុបកម្មក្នុងទីក្រុង Londonderry កាលពីសប្ដាហ៍មុន។ ក្រុមនេះបាននិយាយនៅ ក្នុងសេចក្ដីថ្លែងការណ៍មួយដែលចេញផ្សាយដោយកាសែតអៀរឡង់ថា “New IRA សូមអភ័យទោសយ៉ាងពេញទំហឹងនិងស្មោះត្រង់ចំពោះដៃគូរ ក្រុមគ្រួសារនិងមិត្តភក្តិរបស់នាង Lyra McKee សម្រាប់ការស្លាប់របស់នាង”។
លោកស្រី McKee អាយុ២៩ឆ្នាំត្រូវបានបាញ់សម្លាប់កាលពីថ្ងៃព្រហស្បតិ៍មុននៅពេលដែលក្រុមសាធារណរដ្ឋប្រឆាំងបានប៉ះទង្គិចជាមួយប៉ូលិសនៅក្នុងតំបន់លំនៅដ្ឋាន Creggan ក្នុងទីក្រុងលំដាប់ទីពីររបស់ប្រទេសអៀរឡង់ខាងជើងមួយនេះដែលក៏ត្រូវបានគេស្គាល់ផងដែរថា Derry។ ខណៈពេលសារភាពទទួលខុសត្រូវ, ក្រុម New IRA បានព្យាយាមបង្ហាញពីភាពត្រឹមត្រូវនៃសកម្មភាពរបស់ខ្លួនដោយអះអាងថា អ្នកកាសែតត្រូវបានសម្លាប់ក្នុងអំឡុងពេលនៃការវាយប្រហារមួយលើកងកម្លាំងសត្រូវហើយបានចោទប្រកាន់ប៉ូលិសពីបទបង្កហេតុមុនពេលនៃការស្លាប់របស់នាង។
សេចក្តីថ្លែងការណ៍បាននិយាយថា “អំឡុងការវាយប្រហារទៅលើសត្រូវ លោកស្រី Lyra McKee ត្រូវបានសម្លាប់ខណៈពេលកំពុងឈរក្បែរកងកម្លាំងសត្រូវ”។សេចក្តីថ្លែងការណ៍របស់ New IRA បាននិយាយថា “នៅយប់ថ្ងៃព្រហស្បតិ៍បន្ទាប់ពីការលុកលុយនៅ Creggan ដោយកងកម្លាំងចក្រភពអង់គ្លេសប្រដាប់អាវុធដែលបង្កឲ្យមានកុបកម្ម, IRA បានដាក់ពង្រាយអ្នកស្ម័គ្រចិត្តរបស់ខ្លួនដើម្បីចូលរួម”។
បន្ទាប់ពីការស្លាប់របស់លោកស្រី, គណបក្សនយោបាយធំៗចំនួនប្រាំមួយរបស់ប្រទេសអៀរឡង់ខាងជើងបានចេញសេចក្តីថ្លែងការណ៍រួមមួយដ៏កម្រ។សេចក្តីថ្លែងការណ៍នេះបាននិយាយថា “វាជាទង្វើចេតនានិងគ្មានប្រយោជន៍ដើម្បីបំផ្លាញការរីកចម្រើនដែលបានកើតឡើងក្នុងរយៈពេល២០ឆ្នាំចុងក្រោយនេះដែលមានការគាំទ្រដ៏លើសលប់ពីមនុស្សគ្រប់ទីកន្លែង”។ ការសម្លាប់នេះបានកើតឡើងមុនពិធីបុណ្យ Easter ចុងសប្ដាហ៍នៅពេលអ្នកសាធារណរដ្ឋនិយមដែលប្រឆាំងនឹងវត្តមានរបស់ចក្រភពអង់គ្លេសនៅក្នុងប្រទេសអៀរឡង់ខាងជើងបានប្រារព្ធខួបនៃការបះបោរឆ្នាំ១៩១៦ប្រឆាំងនឹងការគ្រប់គ្រងរបស់ចក្រភពអង់គ្លេស៕ AFP
Source: Kampuchea Thmey Daily
0 Comments