អ្នកបុរាណវិទូម្នាក់បាននិយាយកាលពីថ្ងៃអង្គារថា នាវាដឹកទំនិញអូស្ត្រាលីមួយគ្រឿងដែលលិចដោយសារតែនាវាមុជទឹកជប៉ុនកំឡុងសង្គ្រាមលោកលើកទី ២ ត្រូវបានគេរកឃើញថាមានសភាព "នៅដដែល" នៅក្នុងដែនទឹកនៃឆ្នេរសមុទ្រភាគអាគ្នេយ៍របស់ប្រទេស ។
នាវា SS Iron Crown ត្រូវបានវាយប្រហារដោយគ្រាប់បែកបាញ់នាវានៅថ្ងៃទី ៤ ខែមិថុនា ឆ្នាំ ១៩៤២ ខណៈពេលកំពុងដឹករ៉ែនៅក្នុងសមុទ្រនៅឯនាយឆ្នេរសមុទ្រភាគខាងត្បូងរបស់អូស្ត្រាលីនៅក្បែររដ្ឋ Victoria ។ នាវានេះបានលិចនៅក្នុងរយៈពេល ៦០ វិនាទីដោយសម្លាប់សមាជិកនាវិក ៣៨ នាក់ក្នុងចំណោម ៤៣ នាក់នៅលើនាវានោះ ។
លោក Peter Harvey ជាបុរាណវិទូម្នាក់នៅតំបន់ Heritage Victoria បាននិយាយថា "ការរកឃើញកម្ទេចកម្ទីបន្ទាប់ពីរយៈពេល ៧៧ ឆ្នាំនៃការមិនដឹងពីទីកន្លែងលិចចុងក្រោយរបស់វា បាននាំឲ្យមានការបញ្ចប់ការស្វែងរកសម្រាប់សាច់ញាតិ និងក្រុមគ្រួសាររបស់អ្នកដែលត្រូវបានបាត់បង់នៅតាមសមុទ្រ ព្រមទាំងសហគមន៍សមុទ្ររបស់អូស្ត្រាលីផងដែរ" ។អ្នកវិទ្យាសាស្ត្ររកឃើញនាវាប្រវែង ១០០ ម៉ែត្រមួយគ្រឿងនេះ ពីឆ្នេរសមុទ្រ Victoria ប្រមាណ ១០០ គីឡូម៉ែត្រ ។
ពួកគេបាននិយាយថា នាវានេះហាក់ដូចជា "នៅដដែល" ប្រហែល ៧០០ ម៉ែត្រនៅក្រោមផ្ទៃលើទឹកសមុទ្រ ។ប្រធានអ្នកវិទ្យាសាស្ត្រអ្នកស្រី Emily Jateff មកពីសារមន្ទីរដែនសមុទ្ររបស់អូស្ត្រាលីបាននិយាយថា "យើងបានរៀបចំផែនទី និងតំបន់ជុំវិញសមុទ្រដោយប្រើប្រព័ន្ធសូណារ ប៉ុន្តែវាក៏មានចក្ខុវិស័យយ៉ាងជិតស្និទ្ធអំពីរចនាសម្ព័ន្ធនាវាដោយប្រើកាមេរ៉ាទម្លាក់ចុះផងដែរ" ។ អ្នកស្រីបានបន្ថែមថា "វានឹងអនុញ្ញាតឲ្យយើងបង្កើតរូបភាពសមាសធាតុនៃតំបន់ទាំងមូលដើម្បីជួយតាមដានការវាស់ស្ទង់សម្រាប់ការអភិរក្ស និងការគ្រប់គ្រងរបស់វា" ។
ក្រុមអ្នកស្រាវជ្រាវបាននិយាយថា ពួកគេមានគម្រោងធ្វើពិធីរំលឹកនៅកន្លែងនោះ ។បើយោងតាមក្រុមប្រឹក្សាបេតិកភណ្ឌ Victoria Heritage បានឲ្យដឹងថា អ្នករស់រានមានជីវិត ៥ នាក់ពីនាវាដែលលិចទឹកបានព្យាយាមដណ្ដើមអាវពោងសុវត្ថិភាព និងកាន់កម្ទេចកម្ទីដែលកំពុងអណ្ដែតទឹករហូតដល់ពួកគេត្រូវបានជួយសង្គ្រោះ ។ ក្រុមប្រឹក្សាបេតិកភណ្ឌបាននិយាយថា នៅចន្លោះខែមិថុនា ឆ្នាំ ១៩៤២ និងឆ្នាំ ១៩៤៣ ប្រទេសជប៉ុនបានបញ្ជូននាវាមុជទឹកចំនួន ១៣ គ្រឿងទៅកាន់ឆ្នេរសមុទ្រភាគខាងកើតរបស់អូស្ត្រាលី ហើយក៏មានការលិចនាវាចំនួន ២២ គ្រឿង និងបានបាត់បង់អាយុជីវិតមនុស្ស ១៩៤ នាក់ផងដែរ ៕ AFP
Source: Kampuchea Thmey Daily
0 Comments