ភ្នំពេញ ៖ ក្រសួងសាធារណការ និងដឹកជញ្ជូន បានទុកពេល៣ខែ ឲ្យអ្នកធ្វើអាជីវកម្មត្រីចក្រយានយន្ត ឬហៅថា ម៉ូតូកង់បីទាំងអស់ ត្រូវទៅរៀនប្រឡងយកប័ណ្ណបើកបរដោយឥតគិតថ្លៃ ដើម្បីចូលរួមកាត់បន្ថយគ្រោះថ្នាក់ចរាចរណ៍។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងនៅក្នុង កិច្ចប្រជុំបូកសរុបការងារគណៈកម្មាធិការសុវត្ថិភាពចរាចរណ៍ផ្លូវគោកកាលពីថ្មីៗនេះថា ដើម្បីលើកកម្ពស់ការអនុវត្តច្បាប់ចរាចរណ៍ក្រសួងទុករយៈពេល៣ខែ គិតចាប់ពីខែឧសភា ឆ្នាំ២០១៩ខាងមុខនេះតទៅ ឲ្យម្ចាស់ត្រីចក្រយានយន្តទាំងអស់ ត្រូវទៅរៀនប្រឡងយកប័ណ្ណបើកបរ ហើយផុតកាលកំណត់នេះ ក្រសួងនឹងចាត់វិធានការផ្លូវច្បាប់ គឺចាប់ផាកពិន័យដោយបង្ខំ និងដោយគ្មានការលើកលែងជាដាច់ខាត។
លោកទេសរដ្ឋមន្ត្រីបានបន្តថា បច្ចុប្បន្នប្រទេសកម្ពុជា មានត្រីចក្រយានយន្តប្រមាណពីរម៉ឺនគ្រឿងកំពុងតែធ្វើអាជីវកម្មនៅលើដងផ្លូវសាធារណៈ ក្នុងនោះ៩៨ភាគរយ ខ្វះការយល់ដឹងអំពីច្បាប់ចរាចរណ៍ និងគ្មានប័ណ្ណបើកបរ ដែលទាំងនេះវាជាផ្នែកមួយបង្កឲ្យមានបញ្ហាកកស្ទះចរាចរណ៍ និងគ្រោះថ្នាក់ចរាចរណ៍កើតឡើងនៅលើដងផ្លូវជាញឹកញាប់។
លោក វ៉ា ស៊ឹមសុរិយា អគ្គនាយករដ្ឋបាល និងហិរញ្ញវត្ថុ និងជាអ្នកនាំពាក្យក្រសួង សាធារណការ និងដឹកជញ្ជូនបានឲ្យដឹងថា ការរៀនយកប័ណ្ណបើកបរត្រីចក្រយានយន្តនេះ គឺមិនមានតម្រូវឲ្យបង់ប្រាក់ទេ ដោយប្រើរយៈពេលយ៉ាងយូរពីពីរទៅបីថ្ងៃប៉ុណ្ណោះ ព្រោះផ្តោតជាសំខាន់តែទៅលើស្លាកសញ្ញា និងច្បាប់ចរាចរណ៍។
លោកបានបន្តទៀតថា ចំពោះទីតាំង នៃការរៀនដើម្បីប្រឡងយកប័ណ្ណបើកបរត្រីចក្រយានយន្តនេះគឺខាងសាលារាជធានីភ្នំពេញជាអ្នករៀបចំ។ ចំណែកក្រសួងសាធារណការ និងដឹកជញ្ជូន ក៏មានសាលាបើកបររថយន្តមួយដែរ សម្រាប់ជួយផ្តល់ជាកន្លែងរៀនបើកបរប្រសិនបើចាំបាច់។
មន្ត្រីក្រសួងសាធារណការ ក៏បានឲ្យដឹងដែរថា ចំពោះរថយន្តដឹកអ្នកដំណើរ,ដឹកទំនិញធុនធ្ងន់ និងមធ្យម,រថយន្តកុងតឺន័រ ដែលមិនទាន់មានភាពត្រឹមត្រូវតាមលក្ខណៈបច្ចេកទេស,អ្នកបើកបរគ្មានប័ណ្ណបើកបរ ក៏នឹងមិនអនុញ្ញាតឲ្យធ្វើចរាចរណ៍នៅលើដងផ្លូវសាធារណៈជាដាច់ខាត ធ្វើដូចនេះគឺដើម្បីចូលរួមចំណែកកាត់បន្ថយគ្រោះថ្នាក់ចរាចរណ៍នៅកម្ពុជា។
តែយ៉ាងណាក៏ដោយ កាលពីថ្ងៃទី២០ ខែមេសា ឆ្នាំ២០១៩កន្លងទៅ មន្ទីរសាធារណការ និងដឹកជញ្ជូនរាជធានីភ្នំពេញ បានបន្តវគ្គបណ្ដុះបណ្ដាលច្បាប់ចរាចរណ៍ផ្លូវគោក ដល់សិក្ខាកាមជាអ្នកបើកបរត្រីចក្រយានយន្ត(ម៉ូតូកង់បី) ដែលមានសិក្ខាកាមចំនួន២២៧នាក់ បានចូលរួមវគ្គបណ្ដុះបណ្ដាល ស្តីពីច្បាប់ចរាចរផ្លូវគោកដោយឥតគិតថ្លៃ នៅអង្គភាពផ្តល់ប័ណ្ណបើកបរ នៃមន្ទីរសាធារណការ និងដឹកជញ្ជូនរាជធានីភ្នំពេញ។
សូមបញ្ជាក់ថា វគ្គបណ្ដុះបណ្ដាល ស្តីពីច្បាប់ចរាចរណ៍ផ្លូវគោកសម្រាប់ត្រីចក្រយានយន្ត បង្រៀនដោយឥតគិតថ្លៃរៀងរាល់ថ្ងៃសៅរ៍ រហូតដល់ថ្ងៃទី០៤ ខែឧសភា ឆ្នាំ២០១៩ នៅអង្គភាពផ្តល់ប័ណ្ណបើកបរ នៃមន្ទីរសាធារណការ និងដឹកជញ្ជូនរាជធានីភ្នំពេញ៕
Source: Kampuchea Thmey Daily
0 Comments