អគារ​វិទ្យាសាស្ត្រ និង​មជ្ឈមណ្ឌល​បណ្តុះ​ធុរកិច្ច​ថ្មី “​តេ​ជោ​” ដែលមាន​ទំហំ​៦៧២០​ម៉ែត្រក្រឡា កម្ពស់​៨​ជាន់ លេចចេញ​ជា​រូបរាង​នៅក្នុង​សាកលវិទ្យាល័យ​ភូមិន្ទ​ភ្នំពេញ​

​ភ្នំពេញ ​៖ អគារ​វិទ្យាសាស្ត្រ នៃ​សាកលវិទ្យាល័យ​ភូមិន្ទ​ភ្នំពេញ និង​មជ្ឈមណ្ឌល​បណ្តុះ​ធុរកិច្ច​ថ្មី “​តេ​ជោ​” របស់​ក្រសួង​សេដ្ឋកិច្ច និង​ហិរញ្ញវត្ថុ ដែលមាន​ទីតាំង​ក្នុង​បរិវេណ​សាកល វិទ្យាល័យ​ភូមិន្ទ​ភ្នំពេញ លេចចេញ​ជា​រូបរាង​ហើយ និង​បាន​សម្ពោធ​ដាក់​ឲ្យ​ដំណើrការ កាលពី​រសៀល​ថ្ងៃទី​០៨ ខែមេសា ឆ្នាំ​២០១៩ ក្រោម​អធិបតីភាព​ឯកឧត្តម​អគ្គបណ្ឌិត​សភាចា​រ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ ដោយមាន​ការអញ្ជើញ​ចូលរួម​របស់លោក​បណ្ឌិត​សភាចា​រ្យ ហង់ ជួនណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា និង​ថ្នាក់ដឹកនាំ បុគ្គលិក សាស្ត្រាចារ្យ និង​និស្សិត​យ៉ាងច្រើន ។



អគារ​ទាំង​២​នេះ ត្រូវបាន​រៀបចំ និង​កសាងឡើង ក្នុង​បរិការណ៍​មួយ ដែល​កម្ពុជា បាន​និង កំពុងតែ​គ្របដណ្តប់​ដោយ​សន្តិភាព ឯកភាព​ជាតិ ស្ថិរភាព​នយោបាយ ប្រជាធិបតេយ្យ និង នីតិរដ្ឋ​កាន់តែ​រឹងមាំ ព្រមទាំង​ស្ថិរភាព​ម៉ាក្រូសេដ្ឋកិច្ច​ល្អប្រសើរ ដែល​ផ្តល់​ភាព​អនុគ្រោះ ទ្រទ្រង់​ដល់​កំណើន ក៏ដូចជា​ទ្រទ្រង់​ដល់​ការអភិវឌ្ឍ​ធនធានមនុស្ស និង​ការអភិវឌ្ឍ​សេដ្ឋកិច្ចជាតិ ស្រប​ពេលដែល​រាជរដ្ឋាភិបាល​កម្ពុជា ក្រោម​ការដឹកនាំ​ប្រកបដោយ​ភាព​វៃឆ្លាត និង​ប៉ិនប្រសប់​របស់​សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ដ្រី​នៃ​ព្រះរាជាណាចក្រ​កម្ពុជា បាននិងកំពុង​បន្ត​យកចិត្តទុកដាក់​ខ្ពស់ និង​ផ្តោត​អាទិភាព​លើ​ការលើកកម្ពស់​វិស័យ​អប់រំ និង ការបណ្តុះបណ្តាល​ជំនាញ​វិជ្ជាជីវៈ ការអភិវឌ្ឍ​សហគ្រិន និង​ការលើកកម្ពស់​សហគ្រាស​ធុន​តូច និង​មធ្យម​នៅ​កម្ពុជា ដូច​មានចែង​ក្នុង យុទ្ធសាស្ត្រ​ចតុកោណ​ដំណាក់កាល​ទី​៤ ដើម្បី​កំណើន​ការងារ សមធម៌ និង​ប្រសិទ្ធភាព​។



អគារ​វិទ្យាសាស្ត្រ​នៃ​សាកលវិទ្យាល័យ​ភូមិន្ទ​ភ្នំពេញ បាន​ប្រើប្រាស់​ថវិកា​ទាំងស្រុង​របស់​រាជរដ្ឋាភិបាល​កម្ពុជា មាន​ទំហំ​៦,៧២០ ម៉ែត្រក្រឡា កម្ពស់​០៨​ជាន់ រួម​ទាំង​ជាន់​ផ្ទាល់​ដី ហើយនឹង​ត្រូវ​ប្រើប្រាស់​ជារួម​សម្រាប់​មហាវិទ្យាល័យ​វិទ្យាសាស្ត្រ និង​មហាវិទ្យាល័យ​វិស្វកម្ម ដើម្បី​ចូល​រួម​ចំណែក​ក្នុង​ការ​អភិវឌ្ឍ​ធនធានមនុស្ស ពិសេស​តាមរយៈ​ការ​បន្ត​ពង្រឹងគុណភាព​វិស័យ​អប់រំ​ផ្នែក​វិទ្យាសាស្ត្រ និង​បច្ចេកវិទ្យា​។ វត្តមាន​អគារ​វិទ្យាសាស្ត្រ​ថ្មី​នេះ បានបង្ហាញ​យ៉ាងច្បាស់​ថា អនាគត​នៃ​ការអប់រំ​ផ្នែក​វិទ្យាសាស្ត្រ បច្ចេកវិទ្យា វិស្វកម្ម និង​គណិតវិទ្យា កំពុង​ចាប់ផ្តើម​លេចចេញ​ជា​រូបរាង​នៅក្នុង​សាកលវិទ្យាល័យ​ភូមិន្ទ​ភ្នំពេញ​ផងដែរ។



មជ្ឈមណ្ឌល​បណ្តុះ​ធុរកិច្ច​ថ្មី “​តេ​ជោ​” ត្រូវ​បាន​បង្កើត​ឡើង​ជាមួយនឹង​បេសកកម្ម​បង្កើត និង​បណ្តុះ​ធុរកិច្ច​ថ្មី ឲ្យ​លូតលាស់ ក្លាយជា​អាជីវកម្ម​ជោគជ័យ តាមរយៈ​ការអនុវត្ត​គោលការណ៍​នវានុវត្តន៍ និង​បច្ចេកវិទ្យា​ថ្មី​ជឿនលឿន ក្រោម​កម្មវិធី​គាំទ្រ​ច្បាស់លាស់ ដូចជា ១. កម្មវិធី​កម្មសិក្សា (Internship Program) ២. កម្មវិធី វប្បកម្ម (Cultivation Program) ៣. កម្មវិធី​នវានុវត្តន៍ (Innovation Program) ៤. កម្មវិធី​បំប៉ន ឬ​ជំរុញ​សម្ទុះ (Accelerator Program), និង​៥. កម្មវិធី​វិនិយោគ (Investment Program) ដើម្បី​រួមចំណែក​ក្នុងការ​អភិវឌ្ឍ​សហគ្រិន និង​ការលើកកម្ពស់​សហគ្រាស​ធុន​តូច និង​មធ្យម​នៅ​កម្ពុជា និង​ដើម្បី​ជំរុញ​ការធ្វើ​ពិពិធ​កម្ម​សេដ្ឋកិច្ច និង​ការអភិវឌ្ឍ​ប្រភព​កំណើនសេដ្ឋកិច្ច​គន្លឹះ និង​ថ្មីៗ រួមទាំង​វិស័យសេដ្ឋកិច្ច​ឌីជីថល​ផង ។ មជ្ឈមណ្ឌល នឹង​បន្ត​ពង្រីក​វិសាលភាព​សកម្មភាព​ការងារ​របស់ខ្លួន និង​ធ្វើ​កិច្ចសហការ​ជាមួយ​គ្រឹះស្ថាន​ឧ​ត្ត​មសិ​ក្សា និង​គ្រឹះស្ថាន​បណ្តុះបណ្តាល​ដទៃទៀត​ផងដែរ ដើម្បី​ផ្តល់​ឱកាស​ដល់​គ្រប់​និស្សិត ឲ្យ​ទទួល​បាន​នូវ​សេវា និង​ធនធាន​របស់​មជ្ឈមណ្ឌល។



អគារ​ទាំង​២​នេះ នឹង​បម្រើ​ឲ្យ​គោលនយោបាយ​អាទិភាព​តែមួយ របស់​រាជរដ្ឋាភិបាល និង​មាន​ភារកិច្ច​បំពេញ​ឲ្យ​គ្នា​ទៅវិញទៅមក។ ក្នុង​ន័យ​នេះ មជ្ឈមណ្ឌល​បណ្តុះ​ធុរកិច្ច​ថ្មី “​តេ​ជោ​” និង ក្លាយជា​កន្លែង​ផ្តល់​ឱកាស​ដល់​និស្សិត​សម្រាប់ធ្វើ​កម្មសិក្សា កន្លែង​សម្រាប់​ធ្វើការ និង​ស្រាវជ្រាវ កន្លែង​ផ្តល់​ការ​ប្រឹក្សា​យោបល់​ទាំង​បច្ចេកទេស និង​ការគ្រប់គ្រង​ធុរកិច្ច និង​ជា​កន្លែង​ផ្សារភ្ជាប់​សាកលវិទ្យាល័យ ទៅ​នឹង​ទីផ្សារ​ការងារ និង​ជាមួយ​វិស័យ​ឯកជន​។ ជាការ​បំពេញ​ឲ្យ​គ្នា​ទៅវិញទៅមក និស្សិត​ដែល​នឹងសិក្សា​ក្នុង​អគារ​វិទ្យាសាស្ត្រ ក៏​នឹង​ក្លាយជា​ធនធានមនុស្ស​ដ៏​មាន​សារៈសំខាន់ សម្រាប់​មជ្ឈមណ្ឌល​ផងដែរ ៕

Source: Kampuchea Thmey Daily