ប្រមុខកងទ័ពជើងទឹកចិនលោក Shen Jinlong បាននិយាយកាលពីថ្ងៃពុធថា សេរីភាពនៃការធ្វើនាវាចរណ៍មិនគួរត្រូវបានប្រើដើម្បីរំលោភបំពានលើសិទ្ធិរបស់ប្រទេសដទៃទៀតនោះទេ។ នេះជាការដៀមដាមដាក់សហរដ្ឋអាមេរិកនិងសម្ព័ន្ធមិត្តរបស់ខ្លួនដែលបានធ្វើនាវាចរណ៍ទៅជិតកោះតូចៗដែលមានជម្លោះក្នុងសមុទ្រចិនខាងត្បូង។
ជាញឹកញាប់ សហរដ្ឋអាមេរិកបានបញ្ជូននាវាចម្បាំងទៅជិតទីតាំងដែលកាន់កាប់ដោយប្រទេសចិននៅក្នុងសមុទ្រចិនខាងត្បូងដែលជាកន្លែងប្រទេសចិនបានរានយកដីដើម្បីសាងសង់ផ្លូវយន្តហោះនិងកំពង់ផែ។ សម្ព័ន្ធមិត្តអាមេរិកមួយចំនួនរួមទាំងចក្រភពអង់គ្លេសផងដែរគឺបានធ្វើតាមនេះ។
ប្រទេសចិនបានចាត់ទុកការល្បាតដោយសហរដ្ឋអាមេរិកនិងសម្ព័ន្ធមិត្តរបស់ខ្លួនថាជាការបង្កហេតុមួយព្រោះចិនមើលឃើញស្ទើរតែទាំងអស់នៃសមុទ្រចិនខាងត្បូងថាជាដែនដីរបស់ខ្លួនបើទោះបីជាវៀតណាម ម៉ាឡេស៊ី តៃវ៉ាន់ ប្រ៊ុយណេនិងហ្វីលីពីនសុទ្ធតែអះអាងទាមទារក៏ដោយ។
ថ្លែងក្នុងវេទិកាមួយនៅទីក្រុង Qingdao ភាគខាងកើតបន្ទាប់ពីការហែរក្បួនដ៏ធំមួយរបស់កងទ័ពជើងទឹកដើម្បីប្រារព្ធខួប៧០ឆ្នាំចាប់តាំងពីការបង្កើតកងទ័ពជើងទឹកចិន, លោក Shen បាននិយាយថា អ្នកគ្រប់គ្នាត្រូវតែធ្វើតាមច្បាប់និងរក្សាសណ្តាប់ធ្នាប់ល្អ។លោក Shen ដែលជិតស្និទ្ធនឹងលោកប្រធានាធិបតី Xi Jinping បាននិយាយថា “ការគោរពច្បាប់គឺជាមូលដ្ឋានគ្រឹះនៃសណ្តាប់ធ្នាប់ដែនសមុទ្រ”។
លោកបានបន្ថែមដោយមិនបញ្ចេញឈ្មោះសហរដ្ឋអាមេរិកដោយផ្ទាល់ថា “សេរីភាពនៃការធ្វើនាវាចរណ៍គឺជាគំនិតដែលត្រូវបានទទួលស្គាល់យ៉ាងទូលំទូលាយដោយសហគមន៍អន្តរជាតិប៉ុន្តែវាមិនគួរត្រូវបានប្រើជាលេសដើម្បីរំលោភបំពានសិទ្ធិនិងផលប្រយោជន៍ស្របច្បាប់នៃរដ្ឋដែលជាប់ដែនទឹកនោះទេ”។
លោក Shen បាននិយាយថា ប្រទេសចិនកំពុងបន្តធ្វើកិច្ចចរចាស្តីពីក្រមប្រតិបត្តិសម្រាប់សមុទ្រចិនខាងត្បូងដែលក្រុងប៉េកាំងមានជាមួយបណ្តារដ្ឋអាស៊ីអាគ្នេយ៍រយៈពេលពីរបីឆ្នាំមកហើយ។លោកអះអាងថា “យើងប្តេជ្ញាធ្វើឲ្យសមុទ្រចិនខាងត្បូងក្លាយទៅជាសមុទ្រនៃសន្តិភាព មិត្តភាពនិងកិច្ចសហប្រតិបត្តិការ”៕ REUTERS
Source: Kampuchea Thmey Daily
0 Comments