បុរសអ្នកលក់កាសែតជាង២០ឆ្នាំម្នាក់ ត្អូញត្អែរ ព្រោះលក់មិនសូវដាច់ បន្ទាប់ពីមានប្រព័ន្ធបច្ចេកវិទ្យាផ្សព្វផ្សាយទំនើបច្រើនពេក

ស្វាយរៀង ៖ បុរសម្នាក់ ដែលប្រកបមុខរបរចែកចាយកាសែត(អ្នកលក់កាសែត) ក្នុងក្រុងស្វាយរៀងយូរឆ្នាំមកហើយ ដល់អ្នកភូមិ ក៏ដូចជាអ្នកនិយមអាននៅតាមមន្ទីរនានា បានត្អូញត្អែរយ៉ាងខ្លាំងដល់ជីវភាពគ្រួសាររបស់គាត់ ខណៈបច្ចុប្បន្ននេះកាសែតលក់មិនសូវដាច់ ព្រោះមានប្រព័ន្ធបច្ចេកវិទ្យាផ្សព្វផ្សាយទំនើបនៅក្នុងដៃដូចជាទូរស័ព្ទជាដើមពិបាកក្នុងការលក់ចែកចាយ។

នៅព្រឹកថ្ងៃទី២៨ ខែមេសា ឆ្នាំ២០១៩ អ្នកយកព័ត៌មានយើងបានជួប លោក ប៉ែន ម៉ីន ដែលកំពុងជិះម៉ូតូគុបចំណាស់មួយគ្រឿង នៅផ្សាវាលយន្ត ដើម្បីចែកចាយដាក់កាសែតឲ្យភ្ញៀវដែលនិយមអាន ខណៈទឹកមុខគាត់ស្រស់ស្រាយរីករាយជានិច្ច។

លោក ប៉ែន ម៉ីន បន្តថា គាត់ឥឡូវមាន អាយុ៥៤ឆ្នាំ មុខរបរអ្នកចែកចាយកាសែតអាននៅក្រុងស្វាយរៀង មានទីលំនៅក្នុងឃុំគោកព្រីង ស្រុកស្វាយជ្រំ ខណៈគាត់បានប្រកបមុខរបរចែកចាយកាសែត និងទស្សនាវដ្ដីតាំងពីឆ្នាំ១៩៩៣ រហូតមកដល់ពេលនេះជាង២០ឆ្នាំមកហើយ។

លោកបន្តថា ដោយពីមុនគាត់យកកាសែតមកលក់ម្ដងក្នុងមួយថ្ងៃ៧០០ច្បាប់ មានគ្រប់អង្គភាពសម្រាប់អ្នកចូលចិត្តអានព្រឹត្តិការណ៍ផ្សេងៗ ដែលកើតមានឡើងក្នុងសង្គម ក៏ដូចជាព្រឹត្តិការណ៍ព័ត៌មានជាតិ និងអន្តរជាតិ លក់អស់មិនដែលសល់នោះទេ។

ប្រភពបន្តថា បច្ចុប្បន្ននេះ គាត់លក់កាសែតមានដូចជា កាសែតនគរវត្ត កាសែតកោះសន្តិភាព រស្មីកម្ពុជា ព្រមទាំងមានលក់ទស្សនាវដ្ដី ក្នុងស្រុកផងដែរ។

ប្រភពបន្តថា ប៉ុន្តែចាប់ពីប៉ុន្មានឆ្នាំចុងក្រោយនេះ ការដើរចែកចាយកាសែតមានការធ្លាក់ចុះយ៉ាងខ្លាំងរហូតដល់ស្ទើរតែមិនជឿ ហើយនៅពេលនេះ គាត់យកមកតែ២០ ទៅ៣០ច្បាប់ប៉ុណ្ណោះ ព្រោះខ្លាចលក់មិនដាច់ នៅសល់។

លោកក៏បានបន្តទៀតថា មូលហេតុដែលនាំឲ្យការចែកចាយ និងលក់កាសែតធ្លាក់ចុះបណ្ដាលមកពីប្រព័ន្ធបច្ចេកវិទ្យាផ្សព្វផ្សាយទំនើបនៅក្នុងដៃ ដូចជា ទូរស័ព្ទបណ្ដាញសង្គមហ្វេសប៊ុក និងព័ត៌មានអនឡាញតាមINTERNETជាដើម។

ប៉ុន្តែដោយរូបលោកនៅតែស្រឡាញ់អាជីពចែកចាយកាសែត និងទស្សនាវដ្ដី ទើបនៅតែបន្តលក់ ទោះបីមានការចំណេញបន្តិចបន្តួចក៏ដោយ ព្រោះក្រៅពីលក់កាសែត គាត់មានមុខរបរធ្វើស្រែចម្ការដើម្បីចិញ្ចឹមជីវិត និងក្រុមគ្រួសារផងដែរ៕