អ្នកប្រដាល់ជើងខ្លាំងរបស់កម្ពុជា ផាន់ គ្រាន់ អ្នកប្រដាល់ក្លិបពុទ្ធសេរីវង្សកីឡា និងជាម្ចាស់ខ្សែក្រវាត់Barrley Black ទម្ងន់៦៣,៥០០គីឡូក្រាម បានវាយចាញ់អ្នកប្រដាល់ថៃ សេន ឃុម (Sen Khum) ដោយពិន្ទុ ក្នុងការជួបប្រកួតសងសឹកគ្នា កាលពីរសៀលថ្ងៃទី២៧ ខែមេសា ឆ្នាំ២០១៩ នៅសង្វៀនខារ៉ាបាវរបស់អាស៊ីអាគ្នេយ៍។
សេន ឃុម នេះ បានវាយចាញ់ផាន់ គ្រាន់ដោយពិន្ទុមិនអស់ចិត្ត កាលពីជួបគ្នាលើកដំបូងនាថ្ងៃទី២២ខែកក្កដា ឆ្នាំ២០១៨ កន្លងទៅ ដែលនាំឲ្យគេសុំមកសងសឹកនឹង ផាន់ គ្រាន់វិញនេះ។
ផាន់ គ្រាន់ ឡើងប្រកួតលើកនេះ ហាក់ដូចជាទន់ជ្រាយណាស់ និងប្រៀបបានដូចអត់បានហ្វឹកហាត់ដិតដល់យ៉ាងដូច្នេះដែរ។ ក្នុងការប្រកួត៥ទឹកនោះ ផាន់ គ្រាន់ ចាញ់ប្រៀបសេន ឃុម សឹងតែគ្រប់ទឹក។
នៅក្នុងការប្រកួតទឹកទី៣ ផាន់ គ្រាន់ ត្រូវសេន ឃុម អុកត្រូវមួយជង្គង់ចូលពោះទឹក ធ្វើឲ្យដួលលើ
រេញ ត្រូវអាជ្ញាកណ្តាលរាប់៨ម្តង ។ មកដល់ទឹកទី៤ ផាន់ គ្រាន់ ត្រូវអាជ្ញាកណ្តាលរាប់៨ម្តងទៀត ដោយសារត្រូវជង្គង់សេន ឃុម ដដែល។ តែយ៉ាងណាក្នុងទឹក៤នេះ ផាន់ គ្រាន់ក៏បានវាយកែងត្រូវសេន ឃុម បណ្តាលឲ្យបែកឈាមចុងភ្នែកខាងឆ្វេងដែរ ។
យ៉ាងណា បញ្ចប់ការប្រកួត៥ទឹកនោះ ផាន់ គ្រាន់ ចាញ់សេន ឃុម ដោយពិន្ទុ ដែលធ្វើឲ្យអ្នកប្រដាល់ថៃរូបនេះសងសឹកបានសម្រេច។ អ្នកប្រដាល់ថៃរូបនេះ មានកំណត់ត្រាប្រកួតចំនួន ៧៧លើក ឈ្នះ៦៤លើក ចាញ់១២លើក និង ស្មើ០២លើក។ រីឯ ប្រវត្តិប្រកួតរបស់ផាន់ គ្រាន់ វិញ គឺ ប្រកួត១១៨លើក ឈ្នះ៩៩លើក ចាញ់១៦លើក និង ស្មើ០៣លើក។
អ្នកប្រដាល់ម៉ន ព្រហ្មម៉ាញ ក្លិបការិយាល័យទី៥ កងទ័ពជើងគោក បានភ្លាត់ស្នៀតត្រូវអ្នកប្រដាល់ថៃពែក ធាង វាយឲ្យសន្លប់ក្នុងទឹកទី១ ក្នុងការជួបប្រកួតគ្នាទម្ងន់៦៣,៥០០គីឡូក្រាមដែរ។
ម៉ន ព្រហ្មម៉ាញ ត្រូវពែក ធាង ដាល់ត្រូវចំថ្គាមស្តាំមួយដៃ ក្នុងពេលដែលព្រហ្មម៉ាញ កំពុងខូចជំហរប្រកួតក្រោយពេលដែល ពែក ធាង ដេញទាត់ត្រូវភ្លៅហើយក៏ទ្រេតខ្លួនក្បែរខ្សែរេញ ជាហេតុនាំឲ្យពែក ធាង មានឱកាសដាល់បន្ថែមត្រូវថ្គាមនោះ។
ម៉ន ព្រហ្មម៉ាញ បាននិយាយក្រោយការចាញ់នេះថា គេហាក់ដូចជាវង្វេងនៅពេលដែលមើលឃើញសន្ទុះវាយរបស់ថៃ(ពែក ធាង) តាមក្រោមផង(ទាត់) លើផង(កណ្តាប់ដៃ) ធ្វើឲ្យគេមិនដឹងថា ត្រូវរងការពារខាងណាមុននោះឡើយ....។
ចំពោះ ការប្រកួតរវាងអ្នកប្រដាល់រួមជាតិវិញ កូយ ឡាយ អ្នកប្រដាល់ជើងខ្លាំងស្រករក្រោយក្លិបកងពលតូចទ័ពឆ័ត្រយោង៩១១ បានផ្ដួល ជ័យ ស៊ីនេត អ្នកប្រដាល់ជើងចាស់ក្លិបឃ្លាំងមឿងកីឡា ឲ្យសន្លប់ក្នុងទឹកទី៥ ក្នុងការជួបប្រកួតគ្នាទម្ងន់៦០គ.ក្រ។
កូយ ឡាយ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់នោះ បានប្រើកែងវាយទៅលើជ័យ ស៊ីនេត ត្រូវចំថ្គាម បណ្តាលឲ្យ ស៊ីនេត ដួលសន្លប់លើរេញតែម្តង។
ចំណែក ឡុង ណងសៅ ក្លិបសាលវ័ន្តកីឡា បានវាយឈ្នះសយ សុខ អ្នកប្រដាល់ក្លិបវិបុលដារិទ្ធពោធិសែនជ័យ ដោយពិន្ទុ ក្នុងការជួបគ្នាក្នុងប្រភេទទម្ងន់៥១៤គីឡូក្រាម។ ក្នុងទឹកទី៣ សយ សុខ ត្រូវកែងរបស់ឡុង ណងសៅ ដែលធ្វើឲ្យអាជ្ញាកណ្ដាលរាប់៨ម្តងដែរ។
ចំពោះឡុក ប៊ុនសំណាង ក្លិបមជ្ឈមណ្ឌលកីឡាខ.ភ.ម បានវាយឈ្នះ ម៉ន បញ្ញា ក្លិបការិយាល័យទី៥ កងទ័ពជើងគោក ក្នុងទឹកទី២។ បញ្ញា ត្រូវប៊ុន សំណាង ទាត់ជើងក្រោមដែលធ្វើឲ្យដួលក្រោកលែងរួច៕
Source: Kampuchea Thmey Daily
0 Comments