បន្ទាយមានជ័យ ៖ នៅយប់ថ្ងៃទី២៨ ខែមេសា ឆ្នាំ២០១៩ កម្លាំងនគរបាលវរៈការពារព្រំដែនគោកលេខ៨១៥ ចុះល្បាតនៅចំណុចភូមិក្បាលស្ពាន ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ស្រាប់តែប្រទះឃើញពលករខ្មែរដែលបម្រុងឆ្លងដែនខុសច្បាប់ ចំនួន១១៤នាក់ ក្នុងនោះស្រី៤៨ និងកុមារ៩នាក់។
យោងតាមរបាយការណ៍កម្លាំងនគរបាលវរៈការពារព្រំដែនគោក៨១៥បញ្ជាក់ថា ពលករខ្មែរដែលបម្រុងឆ្លងដែនទៅធ្វើការងារនៅប្រទេសថៃនោះ ពួកគាត់ភាគច្រើនមកពីបណ្ដាខេត្តមួយចំនួន នៅក្នុងប្រទេសកម្ពុជារួមមាន ខេត្តពោធិ៍សាត់ចំនួន១១នាក់ ខេត្តកំពត១នាក់ ខេត្តបាត់ដំបង១៩នាក់ ខេត្តព្រៃវែង២៤នាក់ ខេត្តបន្ទាយមានជ័យ២៦នាក់ ខេត្តកំពង់ធំ០១នាក់ ខេត្តសៀមរាប១០នាក់ ខេត្តឧត្តរមានជ័យ៣នាក់ ខេត្តស្វាយរៀង០៣នាក់ ខេត្តកំពង់ចាម០៨នាក់ ខេត្តត្បូងឃ្មុំ១នាក់។
លោកនាយប៉ុស្តិ៍ស្ពាន ហេង ប៉ូរ៉ាម៉ូ បញ្ជាក់ថា ពលករខ្មែរប្រុសនិងស្រីទាំងអស់នោះ ក្រោយពីធ្វើការណែនាំអប់រំ និងធ្វើកិច្ចសន្យាឈប់បាញ់បោកមេខ្យល់ និងឈប់វិលត្រឡប់មកវិញជាលើកទី២រួចរាល់អស់ហើយឲ្យពួកគាត់វិលទៅស្រុកកំណើតរៀងខ្លួនវិញអស់ហើយផងដែរ៕
Source: Kampuchea Thmey Daily
0 Comments