ម៉ឺន សុភា អ្នកប្រដាល់ជើងខ្លាំងកម្ពុជា នៃសមាគមកីឡាប្រដាល់ក្រសួងការពារជាតិ បានផ្តួលអ្នកប្រដាល់ជើងខ្លាំងមកពីប្រទេសថៃ តាក សិលា(Tuksila Phran26) ក្នុងការជួបគ្នានៅលើសង្វៀនបាយ័នស្ទឹងមានជ័យ កាលពីយប់ថ្ងៃអាទិត្យ ទី២៨ ខែមេសា ឆ្នាំ២០១៩។
ម៉ឺន សុភា និង តាក សិលា ប្រកួតគ្នាក្នុងទម្ងន់៧១គីឡូក្រាម ដែលក្នុងការប្រកួតទឹកទី២នោះ សុភា បានផ្ដួល តាកសិលា ឲ្យបោះបង់ចោលការប្រកួត តាមរយៈការទាត់ជើងក្រោម(ជើងខាងស្តាំ)របស់សិលា ឲ្យឈឺដួលក្រោកលែងរួច។
តាក សិលា អ្នកប្រដាល់ថៃរូបនេះ ធ្លាប់មកប្រកួតនៅស្រុកខ្មែរម្តងហើយ ដែលគេចាំបានថា បានប្រកួតឈ្នះ វង្ស ណយ ជើងខ្លាំងរបស់កម្ពុជាក្នុងទឹកទី៥ កាលពីថ្ងៃទី០២ ខែកុម្ភៈ ឆ្នាំ២០១៩ នៅលើសង្វៀនស្ទឹងមានជ័យនេះ។ តែលើកនេះ ប៉ះជាមួយម៉ឺន សុភា គេទប់ទល់មិនបានពីរទឹកនោះទេ។
ចំពោះ ជ័រ ពៅ អ្នកប្រដាល់ជើងខ្លាំងស្រករក្រោយ នៃក្លិបថ្មគោលពោធិសែនជ័យ បានផ្តួលយកឈ្នះ អ្នកប្រដាល់ជើងខ្លាំងមកពីប្រទេសថៃឈ្មោះ ផេត ផូស្រ៊ី (Petchphosri Site Chharngnunuth umporn) ក្នុងទឹកទី៤។
ជ័រ ពៅ គេវាយបានល្អ និងខ្លាំង ដោយវាយកែងត្រូវថ្គាម ផេត ផូស្រ៊ី មួយកែងពេញ បណ្ដាលឲ្យអ្នកប្រដាល់ថៃរូបនេះដួលសន្លប់លើរេញ។
ជ័រ ពៅ គេទើបតែត្រូវបានគេផ្គូឲ្យជួបប្រកួតជាមួយថៃជាលើកទី២ប៉ុណ្ណោះ។ កាលពីលើកទី១ ក្នុងឆ្នាំ២០១៨ ជ័រ ពៅ បានប្រកួតចាញ់ថៃ លីង លុម (Ling Lom)ដោយពិន្ទុ តែលើកទី២នេះ គេបានផ្ដួល ផេត ផូស្រ៊ី ដែលជាអ្នកប្រដាល់ធ្លាប់ប្រកួតស្មើជាមួយចាន់ ប៊ុនហឿន អ្នកប្រដាល់ក្លិបថ្មគោលពោធិ
សែនជ័យ កាលពីថ្ងៃទី០១ ខែមីនា ឆ្នាំ២០១៩កន្លងមកនោះ។
ផេត ផូស្រ៊ី មានកំនត់ត្រាប្រកួតចំនួន៧៨លើក ឈ្នះ៥៥លើក ចាញ់២០លើក និងស្មើ០៣លើក។ ឯ ជ័រ ពៅ គេមានប្រវត្តិប្រកួតតិចជាង។
ចំពោះការប្រកួតរវាងអ្នកប្រដាល់រួមជាតិវិញ មាស សារ៉ាក់ អ្នកប្រដាល់ក្លិបអាណាចក្រគុនខ្មែរ ដែលគេផ្គូអោយជួបប្រកួតជាមួយ ថន ភឿត អ្នកប្រដាល់ក្លិបឃ្លាំងមឿងកីឡា ក្នុងប្រភេទទម្ងន់៦០គីឡូក្រាមនោះ បានវាយឈ្នះថន ភឿត ដោយពិន្ទុ បន្ទាប់ពីប្រកួតគ្នា៥ទឹកពេញនោះ។
•ធន អៀងឡៃ ឈ្នះពានរង្វាន់បាយ័នទម្ងន់៥៧គីឡូក្រាម
អ្នកប្រដាល់ជើងខ្លាំងស្រករក្រោយទម្ងន់៥៧គ.ក្រ ចំនួន៤រូប ដែលជួបប្រកួតគ្នា ដើម្បីដណ្តើមយកពានរង្វាន់ប្រាក់លានរបស់ស្ថានីយទូរទស្សន៍បាយ័ននោះ ទីបំផុតបានធ្លាក់ទៅលើអ្នកប្រដាល់ធន អៀងឡៃ សមាគមកីឡាប្រដាល់ក្រសួងការពារជាតិ បន្ទាប់ពីគេបានវាយឈ្នះកំពែង ខ្មៅ អ្នកប្រដាល់សមាគមកីឡាប្រដាល់ក្រសួងកសិកម្ម ក្នុងវគ្គផ្ដាច់ព្រ័ត្រកាលពីថ្ងៃទី២៧មេសានោះ។
ក្នុងការប្រកួតជម្រុះដំណាក់ដំបូង ធន អៀងឡៃ គេវាយឈ្នះឯម សុធី អ្នកប្រដាល់ក្លិបថ្មគោលពោធិសែនជ័យ ដោយពិន្ទុ ក្នុងការប្រកួតគ្នាបីទឹកនោះ។
ចំណែកកំពែង ខ្មៅ ក្នុងការប្រកួតជម្រុះដំណាក់ទី១នោះ គេវាយឈ្នះហេង សុភ័ក្រ អ្នកប្រដាល់ក្លិបព្រៃទទឹងខេត្តបាត់ដំបង ក្នុងទឹកទី៣។ ប៉ុន្តែពេលឡើងមកជួបធន អៀងឡៃ នៅក្នុងវគ្គផ្ដាច់ព្រ័ត្រ កំពែង ខ្មៅ វាយចាញ់អៀងឡៃក្នុងទឹកទី៣វិញ ដោយត្រូវអៀងឡៃ វាយឲ្យសន្លប់ដោយស្នៀតជង្គង់ ។
ដោយឡែក សម្រាប់ការប្រកួតគូឯកវិញនោះ មាឃ វណ្ណារ៉ា អ្នកប្រដាល់ក្លិបរាជសីហ៍ ខេត្តរតនគិរី បានផ្តួល អេលីត កែវឡុង អ្នកប្រដាល់ក្លិបឆ្មាសសែនសុខគុនខ្មែរ ឲ្យសន្លប់ក្នុងទឹកទី៤។ ពួកគេទាំងពីរនេះ ក៏ប្រកួតគ្នាក្នុងទម្ងន់៦០គីឡូក្រាម៕
Source: Kampuchea Thmey Daily
0 Comments