ថ្មីៗនេះព្រឹត្តិការណ៍កីឡាអាស៊ីអាគ្នេយ៍ (SEA Games 2019) ឆ្នាំ២០១៩ ដែលធ្វើនៅប្រទេសហ្វីលីពីន នឹងអនុញ្ញាតបានសម្រេចឲ្យក្រុមជាតិសមាជិកទាំង១១ក្រុមមានកីឡាករចំនួន២នាក់ ដែលមានវ័យលើសអាយុ ២២ឆ្នាំ (U22) អាចចូលរួមក្នុងក្រុម នេះបើយោងតាមការបញ្ជាក់របស់សហព័ន្ធកីឡាបាល់ទាត់ប្រចាំតំបន់អាស៊ីអាគ្នេយ៍ (AFF)។
ចំណែកដំណឹងចុងក្រោយពីព្រឹត្តិការណ៍នេះ គឺក្រុមដែលជាសមាជិកទាំងអស់ត្រូវបានបែងចែកជា៤ ក្នុងនោះប្រអប់ទី១ គឺសម្រាប់ក្រុមម្ចាស់ផ្ទះ ហ្វីលីពីន ជាមួយក្រុមការពារតំណែងជើងឯក ថៃ ហើយប្រអប់ទី២ គឺសម្រាប់ក្រុមលេខ២ ម៉ាឡេស៊ី និងលេខ៣ ឥណ្ឌូណេស៊ី ចំណែកប្រអប់ទី៣ គឺសម្រាប់ក្រុមលេខ៤ មីយ៉ាន់ម៉ា និងក្រុមបន្តបន្ទាប់ សិង្ហបុរី និងប្រអប់ទី៤ រួមមាន វៀតណាម , ឡាវ , កម្ពុជា , ព្រុយណេ និងទីម័រខាងកើត។ ការចាប់ឆ្នោតនឹងត្រូវបែងចែកចេញជា ២ពូល ក្នុងមួយពូលមាន៥ក្រុម និងមួយពូលទៀតមាន ៦ក្រុម ប៉ុន្តែចំពោះកាលបរិច្ឆេទនៃការចាប់ឆ្នោតបែងចែកពូលនៅមិនទាន់ត្រូវបានបង្ហាញឲ្យដឹងជាផ្លូវការនៅឡើយ។ ក្រុមដែលនៅប្រអប់ជាមួយគ្នាអាចនឹងមិនត្រូវស្ថិតនៅពូលជាមួយគ្នានោះទេ។
សូមបញ្ជាក់ថា ការប្រកួតស៊ីហ្គេមលើកទី៣០នៅប្រទេសហ្វីលីពីន នឹងប្រព្រឹត្តទៅចាប់ពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩ ដែលមាន៥២៣ វិញ្ញាសាប្រកួតលើប្រភេទកីឡាចំនួន៥៦។សម្រាប់ប្រភេទកីឡាបាល់ទាត់របស់បុរស នឹងធ្វើឡើងនៅកីឡដ្ឋាន Rizal Memorial ក្នុងទីក្រុង ម៉ានីល ខណៈកីឡដ្ឋាន Binan Football Stadium ក្នុងទីក្រុងBinan និង Laguna គឺសម្រាប់ប្រភេទកីឡាបាល់ទាត់ស្ត្រី។
ក្រុមបាល់ទាត់បុរសមកពីប្រទេសថៃ ធ្លាប់ឈ្នះមេដាយមាសច្រើនជាងគេក្នុងព្រឹត្តិការណ៍កីឡាស៊ីហ្គេមតាំងពីបង្កើតឡើងដំបូងពីឆ្នាំ១៩៥៩ មកពោលគឺចំនួន១៦លើក ខណៈក្រុមរបស់កម្ពុជា មិនធ្លាប់ឆ្លងផុតវគ្គចែកពូលនោះទេ។ នៅឆ្នាំ២០១៩នេះ គណៈកម្មការរៀបចំការប្រកួតនៅមិនទាន់ចាប់ឆ្នោតជ្រើសរើសគូក្នុងពូលនៅឡើយនោះទេ ស្របពេលក្រុមនីមួយៗជាសមាជិកក្នុងប្រទេសប្រចាំតំបន់កំពុងតែពង្រឹងកូនក្រុមរបស់ខ្លួនតាមរយៈវគ្គជម្រុះពានរង្វាន់បាល់ទាត់ 2020 AFC U-23 Championship៕
Source: Kampuchea Thmey Daily
0 Comments