នគរបាលស្រុកមេមត់ ចុះសំអាតសំរាមតំបន់រមណីយដ្ឋានទឹកធ្លាក់ធម្មជាតិហោង និងសំណូមពរដល់មន្ទីរទេសចរណ៍ខេត្តគួរពិនិត្យតំបន់នេះផង

Cambodia News April 19, 2019

ត្បូងឃ្មុំ ៖ នៅព្រឹកថ្ងៃទី១៨ ខែមេសា ឆ្នាំ២០១៩ កម្លាំងអធិការដ្ឋាននគរបាលស្រុកមេមត់ សហការជាមួយកម្លាំងប៉ុស្តិ៍នគរបាលរដ្ឋបាលកំពាន់ បានចុះរើសសំរាមនៅតំបន់រមណីយដ្ឋានទឹកធ្លាក់ធម្មជាតិហោង ក្នុងន័យពន្យល់ឲ្យប្រជាពលរដ្ឋបានយល់ថា តំបន់នោះ មិនត្រូវការសំរាមឡើយ ដូច្នេះយើងចេះជួយថែរក្សានូវបរិស្ថាន ដោយមិនបោះចោលសំរាមពាសវាលពាសកាលនោះទេ។

លោកអនុសេនីយ៍ទោ ហង្ស សុវណ្ណមេសា នាយរងផ្នែកសេនាធិការបានបញ្ជាក់ឲ្យដឹងថា កម្លាំងរបស់យើងបាននាំគ្នារើសប្រមូលសំរាមក្រោយបុណ្យចូលឆ្នាំខ្មែរនៅចំណុចខាងលើ ឲ្យស្អាត និងសូមសំណូមពរដល់បងប្អូនប្រជាពលរដ្ឋដែលទៅលេងកម្សាន្តនៅតំបន់រមណីយដ្ឋានទឹកធ្លាក់ធម្មជាតិហោង សូមជួយរក្សាអនាម័យបរិស្ថានដោយមិនបោះចោលនូវកាកសំណល់សល់ពីអាហារ ឬសំរាមផ្សេងៗទៀតពាសវាលពាសកាល ដែលធ្វើឲ្យខូចសោភ័ណភាព និងប៉ះពាល់ដល់សុខភាពអ្នកទាំងអស់គ្នាដែលទៅលេងនៅតំបន់នោះ។

លោកអនុសេនីយ៍ទោ និង ប៉ុស្តិ៍នគរបាលរដ្ឋបាលកំពាន់ បានសូមសំណូមពរដល់ឯកឧត្ដមអភិបាលខេត្តត្បូងឃ្មុំ ពិសេសនោះគឺប្រធានមន្ទីរទេសចរណ៍ខេត្តត្បូងឃ្មុំផ្ទាល់តែម្ដង អញ្ជើញមកពិនិត្យនៅតំបន់ហោងនេះ ជួយដាក់នូវធុងសំរាមជាស៊ីម៉ងត៍ (លូអណ្ដូង) ដើម្បីឲ្យបងប្អូនប្រជាពលរដ្ឋបានដាក់សំរាមត្រឹមត្រូវ។

លោកអនុសេនីយ៍ទោក៏បានបញ្ជាក់ជូនទៀតថា ចំពោះធុងសំរាមដែលកម្លាំងប្រជាការពារបានកែច្នៃដាក់សំរាមចងតាមដើមឈើ ឬធុងសំរាមជ័រលក្ខណៈស្តង់ដារនោះ ត្រូវជនមិនស្គាល់យកបាត់ហើយ ៕