ភ្នំពេញ ៖ ដាប់ប៊ែលយូប៊ី ហ្វាយនែន (អតីតជា វីសិនហ្វាន់ ខេមបូឌា) ជាសមាជិកគ្រួសារ របស់ ធនាគារពាណិជ្ជ អ៊ូរី ដែលជាធនាគារឈានមុខគេមួយនៅប្រទេសកូរ៉េ បានប្រកាសសម្ពោធការិយាល័យថ្មី និង ការិយាល័យផ្លាស់ប្ដូរទីតាំងថ្មីរបស់ខ្លួន កាលពីថ្ងៃទី 05 និង 08 ខែមេសា ឆ្នាំ2019 នៅខេត្តកំពត និងកំពង់ស្ពឺ។
ពិធីសម្ពោធនេះ ស.បញ្ជាក់ពីការរីកចម្រើនជាបន្តបន្ទាប់ លើការពង្រីកសាខារបស់ខ្លួន ហើយនាពេលបច្ចុប្បន្ននេះ ដាប់ប៊ែលយូប៊ី ហ្វាយនែន មានសាខារហូតដល់ 107 សាខាទូទាំងប្រទេសកម្ពុជា និង ពង្រីកបណ្តាញអន្តរជាតិរបស់ធនាគារ អ៊ូរី រហូតដល់ 430 ទូទាំងពិភព លោក។
សាខាខេត្តកំពតរបស់ ដាប់ប៊ែលយូប៊ី ហ្វាយនែន គឺជាសាខាថ្មីដែលបានទទួលអាជ្ញាប័ណ្ណពីធនាគារជាតិ នៃកម្ពុជាកាលពីពេលថ្មីៗនេះ ។ចំណែកសាខាកំពង់ស្ពឺគឺជាសាខាដែលត្រូវបានផ្លាស់ប្ដូរទីតាំងថ្មី និងធំជាងមុន។ សាខាទាំងពីរនេះ មាន ទំហំធំ និងអគារថ្មីស្រឡាងស្ថិតនៅទីប្រជុំជន នៃខេត្តកំពត និងកំពង់ស្ពឺដែលផ្តល់ផលិតផល និងសេវាហិរញ្ញវត្ថុប្រកបដោយទំនុកចិត្តខ្ពស់ជូនដល់អតិថិជន។
ពិធីសម្ពោធ ការិយាល័យថ្មីសាខាខេត្តកំពតបានទទួលការចូលរួមជាគណៈអធិបតីដោយ លោក លាង វឿន សុធី អភិបាលនៃគណ:អភិបាលក្រុងកំពត ជាតំណាងដ៏ខ្ពង់ខ្ពស់ លោក ជាវ តាយ អភិបាលនៃគណ:អភិបាលខេត្តកំពត និងលោក ម៉ុញ ឈិន នាយកសាខាធនាគារជាតិ នៃកម្ពុជា ខេត្តកំពត។ រីឯពិធីសម្ពោធ ការិយាល័យថ្មីសាខា ខេត្តកំពង់ស្ពឺ បានទទួលការចូលរួមជាគណៈអធិបតីដោយ ឯកឧត្ដម កង វណ្ណារ៉ូ អភិបាលរង នៃគណៈអភិបាលខេត្តកំពង់ស្ពឺ ជាតំណាងដ៏ខ្ពង់ខ្ពស់ លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ និង លោក ប៉ិល សារ៉ាត នាយកសាខាធនាគារជាតិ នៃកម្ពុជាខេត្តកំពង់ស្ពឺ។
លោក គីម ស៊ុនឃ្យូ អគ្គនាយកប្រតិបត្តិ របស់គ្រឹះស្ថានមីក្រូហិរញ្ញវត្ថុដាប់ប៊ែលយូប៊ី ហ្វាយនែន បានមានប្រសាសន៍ថា “ដាប់ប៊ែលយូប៊ី ហ្វាយនែន ប្ដេជ្ញាពង្រីកទ្រព្យសកម្ម និង សាខារបស់ខ្លួន ដើម្បីបម្រើអតិថិជនឲ្យកាន់តែល្អប្រសើរ។ ក្នុងឆ្នាំ 2019 យើងមានផែនការពង្រីកសាខាថ្មីចំនួន 9 បន្ថែមទៀត នៅតាមខេត្ត ក្រុង នៃប្រទេសកម្ពុជា ដើម្បីផ្តល់ផលិតផល និងសេវាហិរញ្ញវត្ថុដល់អតិថិជន និងសហគមន៍កម្ពុជា បានកាន់តែទូលំទូលាយ។’’
លោកអគ្គនាយកបានបន្ថែមទៀតថា “ដាប់ប៊ែលយូប៊ី ហ្វាយនែន រួមបញ្ចូលនូវប្រព័ន្ធ និងបច្ចេកវិទ្យាដ៏ទំនើប ក្នុងប្រតិបត្តិការប្រចាំថ្ងៃរបស់ខ្លួន។ បុគ្គលិករបស់យើងអាចធ្វើប្រតិបត្តិការស្នើសុំប្រាក់កម្ចី និងប្រមូលប្រាក់ ពីគ្រប់ទីកន្លែងតាមរយៈ iPad បានយ៉ាងឆាប់រហ័ស និងប្រកបដោយប្រសិទ្ធភាព។
អតិថិជនរបស់យើងអាចត្រួតពិនិត្យសមតុល្យគណនី ធ្វើប្រតិបត្តិការសងត្រឡប់ប្រាក់កម្ចី និងផ្ញើប្រាក់ទៅកាន់គណនីដាប់ប៊ែលយូប៊ី ហ្វាយនែន និងទៅកាន់គណនី ធនាគារផ្សេងៗ តាមរយៈ ធនាគារចល័ត របស់ដាប់ប៊ែលយូប៊ី ហ្វាយនែន ពីគ្រប់ទីកន្លែង គ្រប់ពេលវេលា។ យើងនឹងបន្តអភិវឌ្ឍន៍នូវបច្ចេកវិទ្យារបស់យើង ដើម្បីផ្តល់ជូននូវបទពិសោធន៍សេវាហិរញ្ញវត្ថុដ៏ល្អបំផុតជូនដល់អតិថិជនរបស់យើង។”
ជាមួយបេសកកម្មរបស់ខ្លួនក្នុងការក្លាយជាគ្រឹះស្ថានហិរញ្ញវត្ថុឈានមុខគេដែលផ្តល់នូវសក្ដានុពលសេដ្ឋកិច្ច ដើម្បីឲ្យកម្ពុជារីកចម្រើន ដាប់ប៊ែលយូប៊ី ហ្វាយនែន តែងតែផ្តោតសំខាន់លើការផ្តល់ ដំណោះស្រាយហិរញ្ញវត្ថុងាយស្រួល តម្រូវតាមភាពចាំបាច់របស់អតិថិជន ដោយបន្តពង្រីកនូវតំបន់ ប្រតិបត្តិការ និងនាំយកនូវបច្ចេកវិទ្យាដ៏ទំនើប ក៏ដូចជាផ្តល់ជូននូវផលិតផល និងសេវាហិរញ្ញវត្ថុ ដែលជួយដល់ការរីកចម្រើនរបស់អតិថិជន និង សហគមន៍កម្ពុជាទាំងមូល៕
Source: Kampuchea Thmey Daily
0 Comments