ភ្នំពេញ ៖ ជនសង្ស័យម្នាក់ ក្នុងចំណោមគ្នា២នាក់ ត្រូវបានកម្លាំងនគរបាលមូលដ្ឋានប៉ុស្តិ៍ផ្សារកណ្ដាល១ ចាប់ឃាត់ជាក់ស្ដែងក្នុងករណីលួចមានស្ថានទម្ងន់ទោសប្រើអំពើហិង្សា(ដើរឆក់យកកាបូបស្ពាយ)របស់ជនបរទេសតែមិនបានសម្រេច។
ជាក់ស្ដែងនៅថ្ងៃអង្គារ៥កើតខែចេត្រឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៩ ខែមេសា ឆ្នាំ២០១៩ វេលាម៉ោង២១និង១៥នាទី កម្លាំងប៉ុស្តិ៍នគរបាលរដ្ឋបាលផ្សារកណ្ដាលទី១ នៃអធិការដ្ឋាននគរបាលខណ្ឌដូនពេញ បានធ្វើការឃាត់ខ្លួនជនសង្ស័យចំនួន០១នាក់ (ក្នុងចំណោមបក្ខពួក០២នាក់)ពីបទ លួចមានស្ថានទម្ងន់ទោសប្រើអំពើហិង្សា(ដើរឆក់យកកាបូបស្ពាយ)នៅចំណុចលើថ្មម៉ាបមាត់ទន្លេផ្លូវព្រះស៊ីសុវត្ថិ ភូមិទី០៣ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យ ត្រូវឃាត់ខ្លួននោះ ឈ្មោះ ប៉េត ណេត ភេទប្រុស អាយុ២៦ឆ្នាំជនជាតិខ្មែរ មុខរបរមិនពិតប្រាកដមានទីលំនៅមិនពិតប្រាកដ។ រីឯវត្ថុតាងចាប់យករួមមាន កាបូបស្ពាយពណ៌ត្នោតមួយ ក្នុងនោះលុយវៀតណាមចំនួន៤១០០០០ម៉ឺនដុង ទូរស័ព្ទដៃមួយគ្រឿង ម៉ាកអាយហ្វូន7 ពណ៌ផ្កាឈូក.ប័ណ្ណបើកបរមួយ និងMasterCardចំនួន០៣(បានប្រគល់ឲ្យជនរងគ្រោះវិញ)។
ជនរងគ្រោះ ឈ្មោះTALOR DODSWORTH ANN ភេទស្រី អាយុ២៦ឆ្នាំ ជនជាតិអង់គ្លេស កាន់លិខិតឆ្លងដែនលេខ505831167 មុខរបរទេសចរណ៍ ស្នាក់នៅផ្ទះសំណាក់យីហោ១៩រីករាយបន្ទប់លេខ១៣ ជាន់ទី៤ មានទីតាំងផ្ទះលេខ៥៩ផ្លូវលេខ១៣ សង្កាត់ផ្សារកណ្តាលទី១ ខណ្ឌដូនពេញ។
សមត្ថកិច្ចបានបន្តទៀតថា ដំណើររឿងហេតុនោះ គឺនៅមុនពេលកើតហេតុ ជនរងគ្រោះ ឈ្មោះTALOR DODSWORTH ANN ភេទស្រី អាយុ២៦ឆ្នាំជនជាតិអង់គ្លេស បានទៅអង្គុយលេងលើថ្មម៉ាបមាត់ទន្លេ ដោយកាន់កាបូបស្ពាយពណ៌ត្នោតដាក់លើភ្លៅខាងឆ្វេង ពេលនោះស្រាប់តែជនសង្ស័យចំនួន០២នាក់ដើរមកក្បែរពីក្រោយជនរងគ្រោះ ហើយជនសង្ស័យ ឈ្មោះ ប៉េត ណេត ភេទប្រុសអាយុ២៦ឆ្នាំ បានធ្វើសកម្មភាពឆក់យកកាបូបស្ពាយពីដៃជនរងគ្រោះបានសម្រេចរត់គេចខ្លួន។ ពេលនោះជនរងគ្រោះស្រែកឆោឡោដេញតាមជនសង្ស័យពីក្រោយ ភ្លាមនោះកម្លាំងល្បាតប៉ុស្តិ៍នគរបាលរដ្ឋបាលផ្សារកណ្តាលទី១ ដែលកំពុងល្បាតឃើញបានអន្តរាគមន៍ឃាត់ខ្លួនបានជនសង្ស័យ ឈ្មោះ ប៉េត ណេត រួមជាមួយវត្ថុតាងកាបូបស្ពាយយកមកទីស្នាក់ការប៉ុស្តិ៍ផ្សារកណ្តាលទី១ធ្វើការសាកសួរ ចំណែកបក្ខពួកម្នាក់ទៀតបានរត់គេចខ្លួនបាត់។
សមត្ថកិច្ចបញ្ជាក់ថា ចំពោះមុខកម្លាំងខណ្ឌ ប៉ុស្តិ៍កំពុងប្រើវិធានការជំនាញស្រាវជ្រាវរកបក្ខពួក និងសកម្មភាពបានប្រព្រឹត្តកន្លងមក និងបានកសាងសំណុំរឿងតាមនីតិវិធីច្បាប់៕
Source: Kampuchea Thmey Daily
0 Comments