បន្ទាយមានជ័យ ៖ កាលពីព្រឹក ថ្ងៃទី២៥ ខែមេសា ឆ្នាំ២០១៩ កម្លាំងនគរបាលប្រឆាំងបទល្មើសសេដ្ឋកិច្ច១ក្រុម ដឹកនាំដោយលោកឧត្ដមសេនីយ៍ត្រីចាប សុផាឬទ្ធិ ស្នងការរងខេត្តបន្ទាយមានជ័យផែនការងារនគរបាលប្រឆាំងបទល្មើសសេដ្ឋកិច្ច បានចុះចាប់រថយន្តមួយគ្រឿងម៉ាកSSANG YONG ពណ៌ ស ពាក់ស្លាកលេខភ្នំពេញ ២AC ០០ ៤៨ សង្ស័យលួចដឹកជញ្ជូនប្រហិតចម្រុះខុលច្បាប់។
ការឃាត់រថយន្តខាងលើ ធ្វើឡើងនៅចំណុចលើកំណាត់ផ្លូវជាតិលេខ៥ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ហើយបានបញ្ជូនមកស្នងការដើម្បីឆែកឆេរបន្ត។
លោកឧត្តមសេនីយ៍ត្រីចាប សុផាឬទ្ធិ បានប្រាប់អ្នកយកព័ត៌មានឲ្យដឹងថា ក្រោយពីកម្លាំងនគរបាលបានធ្វើការឆែកឆេក្នុងរថយន្ត បានរកឃើញប្រហិតចម្រុះ HOT DOG មានចំនួន២,០០០គីឡូក្រាមមិនត្រឹមត្រូវតាមលក្ខណៈបច្ចេកទេសតម្រូវផ្នែកសីតុណ្ហភាព ដែលម្ចាស់មានឈ្មោះកូនវិសាល ភេទប្រុស អាយុ៣៧ឆ្នាំ រស់នៅភូមិ អូរត្រាវជូរ ឃុំសេរីមានជ័យ ស្រុកសំពៅលូន ខេត្តបាត់ដំបង។
លោកឧត្តមសេនីយ៍ត្រីចាប សុផាឬទ្ធិ បានបញ្ជាក់ឲ្យដឹងទៀតថា បើតាមការអះអាងរបស់ម្ចាស់ទំនិញបានប្រាប់សមត្ថកិច្ចឲ្យដឹងថា រថយន្តដែលខ្លួនបើកដឹកប្រហិតនេះ ជាកម្មសិទ្ធិរបស់ឈ្មោះញៀប ប៊ុនរ៉េត ភេទប្រុស អាយុ៣៧ឆ្នាំ ហើយខ្លួនបានស៊ីឈ្នួលដឹកប្រហិតនេះពីទឹកដីថៃតាមច្រកបឹងត្រកួនទៅឲ្យថៅកែឈ្មោះធី នៅជម្ពូរវ័នរាជធានីភ្នំពេញអស់រយៈពេល២ខែមកហើយ ដោយក្នុងមួយខែដឹកបាន៨ជើង ទទួលបានឈ្នួល២០០,០០០រៀលក្នុងមួយជើង។
លោកឧត្តមសេនីយ៍ត្រីចាប សុផាឬទ្ធិ បានបញ្ជាក់ឲ្យដឹងទៀតថា ក្រោយពីកម្លាំងនគរបាលសេដ្ឋកិច្ចពិនិត្យនិងធ្វើកំណត់ហេតុរួចរាល់ នៅរសៀល ថ្ងៃដដែលក្រុមការងារជំនាញបានយកប្រហិតទាំងអស់យកទៅដុតកម្ទេចចោល ចំណែករថយន្តរក្សាទុកនៅស្នងការ រីឯអ្នកដឹកនគរបាលសេដ្ឋកិច្ចបានចាត់ការទៅតាមនីតិវិធីច្បាប់៕
Source: Kampuchea Thmey Daily
0 Comments