ភ្នំពេញ ៖ លោកកិត្តិសេដ្ឋាបណ្ឌិត ទេសរដ្ឋមន្ត្រី ចម ប្រសិទ្ធ បានថ្លែងនូវការអរគុណចំពោះកិច្ចសហការល្អរវាងក្រុមហ៊ុនឯកជនជាមួយក្រសួងជំនាញក្នុងការជួយជ្រំជ្រែងផ្តល់នូវទឹកស្អាតដល់ប្រជាពលរដ្ឋតាមជនបទនារដូវក្តៅនេះរួមនឹងការអនុវត្តផលិតតាមស្តង់ដារបច្ចេកទេសត្រឹមត្រូវផងដែរ។
ការលើកឡើងបែបនេះ ខណៈដែលលោកកិត្តិសេដ្ឋាបណ្ឌិតអនុញ្ញាតទទួលជួបសំណេះសំណាលជាមួយនាយកប្រតិបត្តិក្រុមហ៊ុនភេសជ្ជៈកម្ពុជា កូកា-កូឡា នៅទីស្តីការក្រសួង នាថ្ងៃម្សិលមិញនេះ។
លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ខណៈទទួលជួបពិភាក្សាការងារ ជាមួយលោក David Wigglesworth នាយកប្រតិបត្តិ ក្រុមហ៊ុនភេសជ្ជៈកម្ពុជា (កូកា-កូឡា)Cambodia Beverage Company Ltd ដើម្បីពិភាក្សាការងារ បានផ្តោតសំខាន់ទៅលើដំណើរប្រព្រឹត្តិរបស់ក្រុមហ៊ុន និងសង្វាក់ផលិតកម្ម ក៏ដូចជាសកម្មភាពរបស់ក្រុមហ៊ុនក្នុងការងារជួយសង្គមផងដែរ។
លោកកិត្តិសេដ្ឋាបណ្ឌិត ទេសរដ្ឋមន្ត្រី ចម ប្រសិទ្ធ បានសម្តែងការស្វាគមន៍ និងកោតសរសើរចំពោះភាពរីកចម្រើនរបស់ក្រុមហ៊ុនជាបន្តបន្ទាប់លើទីផ្សារកម្ពុជា ជាពិសេសក្រុមហ៊ុន បានរួមចំណែកក្នុងការអភិវឌ្ឍន៍នៅកម្ពុជា ទាំងទីផ្សារការងារ ការចូលរួមការទទួល ខុសត្រូវសង្គម រួមទាំងមានកិច្ចការពារបរិស្ថានបានខ្ពស់ផងដែរ។
លោកកិត្តិសេដ្ឋាបណ្ឌិត មិនភ្លេចថ្លែងអំណរគុណផងដែរទេ ដល់ក្រុមហ៊ុន កូកា-កូឡា ដែលកន្លងមកបានសហការជួយក្រសួងជាច្រើន ជាពិសេសការផ្តល់ជំនួយតាមការស្នើសុំជាទឹកពិសារដប និងទឹកសម្រាប់ប្រើប្រាស់ដឹកតាមស៊ីទែនរថយន្ត សម្រាប់ផ្គត់ផ្គង់ប្រជាពលរដ្ឋដែលរងគ្រោះដោយភាពរាំងស្ងួតកាលពីឆ្នាំ២០១៥ កន្លងទៅ។ ចំពោះភាពរាំងស្ងួតនាឆ្នាំនេះលោកកិត្តិសេដ្ឋាបណ្ឌិត ទសរដ្ឋមន្ត្រី ចម ប្រសិទ្ធ សង្ឃឹមថា ក្រុមហ៊ុននឹងត្រៀមជួយដល់ក្រសួងបន្តទៀត ដូចឆ្នាំមុនៗ។
លោក David Wigglesworth នាយកប្រតិបត្តិ ក្រុមហ៊ុនភេសជ្ជៈកម្ពុជា កូកា-កូឡា ក៏បានបង្ហាញ នូវទំនុកចិត្តខ្ពស់ចំពោះការវិនិយោគនៅកម្ពុជា និងវាយតម្លៃខ្ពស់ចំពោះកិច្ចខិតខំប្រឹងប្រែង របស់រាជរដ្ឋាភិបាល និងក្រសួងឧស្សាហកម្មនិងសិប្បកម្ម ដោយសម្រេចបាននូវសមិទ្ធផលជាច្រើន ក្នុងការអភិវឌ្ឍន៍វិស័យឧស្សាហកម្ម នៅកម្ពុជា ជាពិសេសគឺបានដាក់ចេញនូវគោលនយោបាយអភិវឌ្ឍវិស័យឧស្សាហកម្មឆ្នាំ២០១៥-២០២៥ ដែលជាមូលដ្ឋានគ្រឹះសម្រាប់ការធ្វើពិពិធកម្មសេដ្ឋកិច្ច ពង្រឹងភាពប្រកួតប្រជែង លើកកំពស់ផលិតភាព និងការលើកស្ទួយផលិត កម្មក្នុងស្រុកជាដើម។
លោកបន្តថា ដោយកត្តាល្អប្រសើរ និងលក្ខណៈអំណោយផល ក្រុមហ៊ុនបានពង្រីកអាជីវកម្ម និងអភិវឌ្ឍន៍ផលិតផលរបស់ខ្លួនជាបន្តបន្ទាប់ ហើយក្នុងគ្រោងការអាជីវកម្មរបស់ខ្លួនក្រុមហ៊ុនតែងប្រកាន់ខ្ជាប់នូវកិច្ចការពារបរិស្ថាន និងការទទួលខុសត្រូវសង្គមជានិច្ច។
ជាមួយគ្នានេះ លោកនាយកប្រតិបត្តិក្រុមហ៊ុន ក៏បានលើកឡើងបញ្ហាប្រឈមមួយចំនួន ដូចជា៖បញ្ហាភ្លើងអគ្គិសនី និង របាំងចែកផ្លូវតាម បណ្តោយផ្លូវជាតិលេខ០៥ ឫស្សីកែវ មុខរោង ចក្រ ដែលប៉ះពាល់ដល់ច្រកចេញចូលរថយន្តធំៗដឹកផលិតផលចេញចូល។
ទន្ទឹមនឹងនេះក្រុមហ៊ុនក៏មានគម្រោងសាងសង់អគារ សំណង់ក្រុមហ៊ុនរោងចក្រជាថ្មីឡើងវិញផងដែរ ពីព្រោះអគារដែលជួលពីរដ្ឋនៅទីតាំងគីឡូម៉ែត្រលេខ០៦ ឫស្សីកែវ មានសភាពចាស់ទ្រុឌទ្រោមហើយ។
បន្ថែមពីលើនេះទៀត លោកកិត្តិសេដ្ឋាបណ្ឌិត ទេសរដ្ឋមន្ត្រី ចម ប្រសិទ្ធ បានបញ្ជាក់ថា ភាពប្រឈមខ្លះៗរបស់ក្រុមហ៊ុន ក្រសួងនឹងខិតខំរួមគ្នាដោះស្រាយ ធ្វើយ៉ាងណាឲ្យការវិនិយោគរបស់ក្រុមហ៊ុនប្រព្រឹត្តិទៅដោយភាពរលូន នៅប្រទេសកម្ពុជា៕
Source: Kampuchea Thmey Daily
0 Comments