ភ្នំពេញ ៖ តាមប្រភពពីលោកពូ ទួន សារិន ជាប្រជាពលរដ្ឋរស់នៅក្នុងភូមិក្រាំងដៃឃុំធ្លកស្រុកទ្រាំង ខេត្តតាកែវ បាននិយាយថា បច្ចុប្បន្នក្នុងភូមិរបស់លោកពូបាននាំគ្នាចិញ្ចឹមសត្វទានិងមាន់ដើម្បីយកស៊ុតទៅលក់នៅទីផ្សារដែលមានតម្លៃខ្ពស់ជាងរបរផ្សេងៗ។
លោកពូបន្តថា នូវរដូវប្រាំងបន្ទាប់ពីសម្រាកនូវការភ្ជួររាស់ដកស្ទូងមកគឺប្រជាពលរដ្ឋក្នុងភូមិបានចាប់របរចិញ្ចឹមសត្វមាន់និងទាដើម្បីយកពងទុកលក់។ ប៉ុន្តែរាល់ថ្ងៃនេះ គឺឈ្មួញបានចុះមកទិញដល់កន្លែងចិញ្ចឹមតែម្តង។ កាលពីឆ្នាំទៅគឺស៊ុតមានតម្លៃថោកជាងឆ្នាំនេះ ដែលពីឆ្នាំទៅលក់បានតម្លៃ១០គ្រាប់តែ៣០០០រៀល ដែលឆ្នាំនេះគឺ១០គ្រាប់បានថ្លៃ៣៥០០រៀល។
ដោយឡែកលោកអ៊ុំ ហមកប វិញបាននិយាយថា ពីដើមមកប្រជាពលរដ្ឋក្នុងភូមិនេះច្រើននាំគ្នាចិញ្ចឹមជ្រូកសាច់លក់ ប៉ុន្តែដោយសារធាតុអាកាសក្តីពេកធ្វើឲ្យប្រជាពលរដ្ឋងាកមកចិញ្ចឹមសត្វទានិងមាន់យកស៊ុតលក់វិញ។ ហើយការប្រកបរបរចិញ្ចឹមសត្វនេះ គឺទទួលបានប្រាក់ចំណេញច្រើន។
ទាក់ទិនទៅនឹងការចុះទិញស៊ុតមាន់និងទាខាងលើនេះ បងស្រីញឹម ស៊ីថា ដែលជាឈ្មួញចុះប្រមូលទិញស៊ុត មាន់និងទាបាននិយាយថា បច្ចុប្បន្ននេះស៊ុតដែលកសិករចិញ្ចឹមក្នុងស្រុកគឺត្រូវបានប្រជាពលរដ្ឋខ្មែរយើងទិញយកទៅពិសារច្រើនលើសលប់មិនដូចស៊ុតនាំចូលពីប្រទេសជិតខាងមិនសូវមានការគាំទ្រឡើយ។ ចំពោះស៊ុតដែលទិញតាមផ្ទះយកទៅលក់នៅតាមទីផ្សារគឺក្នុង១០គ្រាប់ចំណេញបាន១៥០០រៀល ហើយអាចបាន២០០០រៀលក៏មានដែរ។
មូលហេតុដែលប្រជាពលរដ្ឋខ្មែរយើងនិយមទិញយកទៅធ្វើម្ហូបព្រោះស៊ុតក្នុងស្រុកពណ៌ក្រហមដោយសារស៊ីចំណីស្រូវ និង កន្ទក់ខុសប្លែកពីស៊ុតនាំចូលពីប្រទេសជិតខាងមានពណ៌សដែលស៊ីចំណីសត្វមិនល្អដូចចំណីធម្មជាតិ៕
Source: Kampuchea Thmey Daily
0 Comments