ភ្នំពេញ ៖ បុរសម្នាក់ ដែលជាជនជាតិវៀតណាម ត្រូវបានប្រជាពលរដ្ឋព័ទ្ធចាប់ប្រគល់ឲ្យនគរបាលប៉ុស្តិ៍ច្បារអំពៅទី២ ដោយសារតែជនសង្ស័យ យកកាំបិតដេញកាប់លោកមេភូមិរបស់ខ្លួន។
ហេតុការណ៍នេះ បានកើតឡើងកាលពីរសៀលថ្ងៃទី២៤ ខែមេសា នៅមុខទីស្នាក់ការភូមិដើមស្លែងសង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។
តាមប្រភពពីលោកវរសេនីយ៍ទោ ម៉ៅ សឿត អធិការរងនគរបាលខណ្ឌច្បារអំពៅបានឲ្យដឹងថា ជនរងគ្រោះ ឈ្មោះខៀវ ជួង ភេទប្រុស អាយុ៦៧ឆ្នាំ ជនជាតិខ្មែរ មុខរបរមេភូមិ ស្នាក់នៅផ្ទះលេខ០២ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។ ជនសង្ស័យ ឈ្មោះ សយ ថាន់ ភេទប្រុស អាយុ៤២ឆ្នាំ ជនជាតិវៀតណាម មុខរបរមិនពិតប្រាកដ ស្នាក់នៅផ្ទះជួល ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ។
កាលពីថ្ងៃទី២៤ ខែមេសា ឆ្នាំ២០១៩ ម៉ោង១៤និង៣០នាទី ជនរងគ្រោះ កំពុងធ្វើការនៅក្នុងទីស្នាក់ការភូមិដើមស្លែង (ចំណុចកើតហេតុ) ស្រាប់តែជនសង្ស័យដើរមកជិតកាន់កាំបិតបុ័ងតោស្រែកឡូឡា រួចជនរងគ្រោះ ក៏ចេញទៅសួរថា ម៉េចបាន មកស្រែកឡូឡា នៅទីនេះ? ជនសង្ស័យក៏ជេរប្រមាថ និង យកកាំបិតបម្រុងកាប់ជនរងគ្រោះទៀត ក៏ត្រូវបានប្រជាពលរដ្ឋនៅក្បែរនោះជួយចាប់ជនសង្ស័យ រួមនឹងកាំបិតបុ័ងតោ០១ យកមកប្រគល់ឲ្យសមត្ថកិច្ចនគរបាលខណ្ឌច្បារអំពៅ ចាត់ការតាមច្បាប់។ កន្លងមក កាលពីថ្ងៃទី១២មេសា ជនសង្ស័យប្រើកាំបិតបុ័ងតោមកគំរាមកំហែងថា នឹងសម្លាប់ជនរងគ្រោះម្តងរួចមកហើយ។ ហើយជនសង្ស័យក៏ប្រើប្រាស់គ្រឿងញៀនដែរ។
ប្រជាពលរដ្ឋ សំណូមពរដល់ស្ថាប័នច្បាប់ ដាក់ទោសជននេះឲ្យធ្ងន់ធ្ងរ ព្រោះជននេះកាចសាហាវណាស់៕
Source: Kampuchea Thmey Daily
0 Comments