ព្រៃវែង ៖ គ្រាន់តែឪពុកជាន់ទូរស័ព្ទរបស់ខ្លួនសោះ កូនចិត្តតិរច្ឆាន ហ៊ានទាញពូថៅដេញកាប់ឪពុកបង្កើតខ្លួនឯងប៊ិះដាច់.ក ស្លាប់ក្នុងថ្លុកឈាម។
ហេតុការណ៍កូនកាប់ឪពុកខាងលើ បានកើតឡើង កាលពីយប់ថ្ងៃទី១៩ ខែមេសា ឆ្នាំ២០១៩ នាវេលាម៉ោង២២និង១៥នាទី ចំណុចផ្ទះរបស់ជនរងគ្រោះ ស្ថិតក្នុងភូមិព្រៃរូង ឃុំដំរីពួន ស្រុកស្វាយអន្ទរ ខេត្តព្រៃវែង។
ប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញឈ្មោះ ឡេង ហន ភេទប្រុស អាយុ២៣ឆ្នាំ រួមជាមួយនឹងមិត្តភ័ក្ដិ បានផឹកស៊ីនៅខាងក្រោមផ្ទះ លុះដល់ពេលវេលាកើតហេតុ ស្រាប់តែគេឃើញជនសង្ស័យ យកពូថៅដេញកាប់ឪពុកខ្លួនឯង បណ្តាលឲ្យស្លាប់ បង្កការភ្ញាក់ផ្អើលទាំងយប់តែម្តង។
ពាក់ព័ន្ធករណីខាងលើនេះផងដែរ លោកឧត្ដមសេនីយ៍ត្រី ពៅ ជីវី ស្នងការរងនគរបាលខេត្តព្រៃវែងទទួលផែនព្រហ្មទណ្ឌបានឲ្យដឹងថា ក្រោយពីទទួលបានព័ត៌មានថា មានករណីឃាតកម្ម កូន កាប់ឪពុកខ្លួនឯងខាងលើ លោកក៏បានដឹកនាំកម្លាំងខេត្តចុះសហការជាមួយកម្លាំងអធិការដ្ឋានស្រុកស្វាយអន្ទរ និងប៉ុស្តិ៍ដំរីពួន តាមចាប់ឃាត់ខ្លួនជនសង្ស័យ ឈ្មោះ ឡេង ហន ភេទប្រុស អាយុ២៣ឆ្នាំដែលរស់នៅកន្លែងកើតហេតុខាងលើបាន នាវេលាម៉ោង៤និង៣៥នាទីទៀបភ្លឺ ឈានចូលថ្ងៃទី២០ខែមេសា ឆ្នាំ២០១៩។
លោកបានបន្តឲ្យដឹងទៀតថា ក្រោយពីធ្វើការឃាត់ខ្លួន ជនសង្ស័យបានសារភាពថា ខ្លួន គឺពិតជាបានយកពូថៅកាប់ទៅលើឪពុកបង្កើតរបស់ខ្លួន ឈ្មោះ ឡេង សៅ អាយុ៥០ឆ្នាំ រស់នៅផ្ទះកើតហេតុខាងលើពិតមែន ហើយមូលហេតុដែលនាំឲ្យមានរឿងនេះកើតឡើង គឺរូបគេ(ជនសង្ស័យ)ខឹងនឹងឪពុកជាន់ទូរស័ព្ទរបស់ខ្លួន ហើយខ្លួនបានសួរថា ហេតុអីបានជាពុកឯងជាន់ទូរស័ព្ទខ្ញុំអញ្ចឹង ពេលនោះគាត់ឆ្លើយថា អញជាន់ឲ្យខ្ទេច កុំឲ្យឯងមើលឃើញទៀត ស្រាប់តែពេលនោះ ឪពុកបានចុះមកទាត់រូបគេ(ជនសង្ស័យ)២ ៣ ជើងថែមទៀត ទើបរូបគេខឹង បានទាញពូថៅ ខណៈនោះ ឪពុកបានរត់ដល់មាត់របង រូបគេបានកាប់ពីក្រោយចំកញ្ចឹង.ក បណ្តាលឲ្យប្រកាច់ស្លាប់តែម្ដង។
បច្ចុប្បន្ន ជនសង្ស័យ រួមនឹងវត្ថុតាង ត្រូវបានឃាត់ទុកនៅស្នងការដ្ឋាននគរបាលខេត្តព្រៃវែង ដើម្បីកសាងសំណុំរឿងបញ្ជូនទៅសាលាដំបូងខេត្តព្រៃវែងចាត់ការតាមច្បាប់៕
Source: Kampuchea Thmey Daily
0 Comments