ភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានមានប្រសាសន៍ឲ្យដឹងថាលោកស្រី អ៊ុងសាន ស៊ូជី ទីប្រឹក្សារដ្ឋមីយ៉ាន់ម៉ា និងជារដ្ឋមន្ត្រី ការបរទេសមីយ៉ាន់ម៉ានឹងមកបំពេញទស្សនកិច្ចផ្លូវការនៅក្នុងកម្ពុជានៅថ្ងៃទី៣០ខែ មេសា ឆ្នាំ២០១៩នេះ។ មេដឹកនាំមីយ៉ាន់ម៉ានឹងធ្វើដំណើរ មកដល់នៅកម្ពុជានៅថ្ងៃទី២៩ ខែមេសា។
សម្តេចតេជោ បានឲ្យដឹងបែបនេះក្នុងពិធីចែកសញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រង់(NUM) ប្រមាណ ជាង ២០០០ នាក់នាព្រឹកថ្ងៃទី២៣ ខែមេសានៅមជ្ឈមណ្ឌលកោះពេជ្រ។
សម្តេចនាយករដ្ឋមន្ត្រីពុំបានបញ្ជាក់អំពីគោលបំណងនែទស្សនកិច្ចរបស់លោកស្រី អ៊ុងសាន ស៊ូជីក្នុងការមកបំពេញទស្សនកិច្ចនៅកម្ពុជានោះ ទេ។ សម្តេចគ្រាន់តែបានបញ្ជាក់ថាសម្តេចនិងលោកស្រី អ៊ុងសាន ស៊ូជី និងអញ្ជើញទៅចូលរួមកិច្ចប្រជុំ «ខ្សែក្រវាត់និងផ្លូវ» នៅទីក្រុងប៉េ កាំងប្រទេសចិនដូចគ្នាហើយនៅថ្ងៃទី ២៩ ខែមេសា សម្តេចនិងហោះត្រង់ពីទីក្រុងប៉េកាំងមកភ្នំពេញតែម្តង ចំណែកលោកស្រី អ៊ុងសាន ស៊ូជី ក៏នឹងហោះត្រង់ពីទីក្រុងប៉េកាំង មកកាន់ទីក្រុងភ្នំពេញផងដែរនៅថ្ងៃទី ២៩ខែ មេសាដើម្បីបំពេញទស្សនកិច្ចនៅកម្ពុជានៅថ្ងៃទី៣០ ខែមេសា។
សម្តេចតេជោ ហ៊ុន សែន នៅថ្ងៃទី២៥ ខែមេសា ប្រមុខរាជរដ្ឋាភិបាលកម្ពុជានឹងដឹកនាំគណៈប្រតិភូទៅចិនដើម្បីចូលរួមក្នុងវេទិកា «ខ្សែក្រវាត់ និងផ្លូវលើកទី២ សម្រាប់កិច្ចសហប្រតិបត្តិការអន្តរជាតិ» នៅទីក្រុងប៉េកាំង។ បើតាមសម្តេច នៅក្នុងវេទិកានោះសម្តេចមានសុន្ទរកថាចំនួន ៤ ដែលតរូវថ្លែងនៅទីនោះ និង មានឯកសារចំនួន ២ ដែលត្រូវជួបពិភាក្សាជាមួយលោក ស៊ី ជីនពីង ប្រធានាធិបតីចិន។
នេះជាលើកដំបូងដែលលោកស្រី អ៊ុងសាន ស៊ូជី មានគម្រោងមកទស្សនកិច្ចនៅកម្ពុជាចាប់តាំងពីលោកស្រីឈ្នះឆ្នោត និងក្លាយជាទីប្រឹក្សារដ្ឋ របស់ប្រទេសមីយ៉ាន់ម៉ាកាលអំឡុងខែមេសា ឆ្នាំ២០១៦ មក៕
Source: Kampuchea Thmey Daily
0 Comments