បន្ទាយមានជ័យ ៖ តូបលក់ខោអាវកីឡាមួយកន្លែងចោរចូលគាស់ចំនួន៤ដងចាប់មិនបានសោះ លុះទិញកាមេរ៉ាសុវត្ថិភាពដាក់ ទើបអាចចាប់ចោរលួចបាននៅព្រឹកថ្ងៃ ទី២៥ ខែមេសា ឆ្នាំ២០១៩ នៅចំណុចម្តុំផ្សារយួន ស្ថិតក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ទោ អ៊ុំ សាខន នាយរងសេនាធិការ ប្រចាំការមូលដ្ឋានកងរាជអាវុធហត្ថក្រុងបានប្រាប់អ្នកយកព័ត៌មានឲ្យដឹងថា តាមបណ្តឹងរបស់ជនរងគ្រោះឈ្មោះ ឈៀង រិទី្ធ ភេទប្រុស អាយុ៣៦ឆ្នាំ រស់នៅចំណុចម្តុំផ្សារយួន ស្ថិតក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យបានប្រាប់សមត្ថកិច្ចថា តូបលក់ខោអាវកីឡារបស់ខ្លួន ត្រូវបានចោរចូលគាស់ចំនួន ៤ដងរួចមកហើយចាប់ចោរមិនបានសោះក្រោយពីទិញកាមេរ៉ាសុវត្ថិភាពបំពាក់ក្នុងតូបទើបឃើញជនសង្ស័យម្នាក់ធ្វើសកម្មភាពគាស់បង្ហើបទ្វារតូប និងបានយកឈើដែលមានទំពក់ថ្ពក់យកខោអាវពីក្នុងតូបទើបដាក់ពាក្យប្តឹងនៅមូលដ្ឋានកងរាជអាវុធហត្ថតែម្តងក្រោយទទួលបានពាក្យបណ្តឹងកម្លាំងជំនាញកងរាជអាវុធហត្ថ បានចុះធ្វើការស្រាវជ្រាវឆែកមើលតាមកាមេរ៉ាសុវត្ថិភាព រហូតឃាត់ខ្លួនបានជនសង្ស័យចំនួនម្នាក់ ឈ្មោះ ម៉ៅ ច័ន្ទ ភេទ ប្រុស អាយុ ២៥ឆ្នាំ ស្នាក់នៅមិនពិតប្រាកដក្នុងក្រុងប៉ោយប៉ែត ហើយបានបញ្ជូនមកអាវុធហត្ថខេត្តដើម្បីចាត់ការបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌ បានឲ្យដឹងថា ក្រោយពីធ្វើការសាកសួរ ជនសង្ស័យបានឆ្លើយសារភាពថា ខ្លួនពិតជាបានលួចយកខោអាវកីឡាពីតូបរបស់ជនរងគ្រោះពិតប្រាកដមែន។ ផ្អែកលើចម្លើយសារភាពរបស់ជនសង្ស័យ ឃើញថា មានតម្រុយពិរុទ្ធភាពនៃបទល្មើសជាក់លាក់ អាចត្រូវចោទពីបទលួចកម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ រួមជាមួយវត្ថុតាងទៅតុលាការដើម្បីចាត់ការទៅតាមច្បាប់៕
Source: Kampuchea Thmey Daily
0 Comments