បន្ទាយមានជ័យ ៖ នៅព្រឹកថ្ងៃទី២២ ខែមេសា ឆ្នាំ២០១៩ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជានិងលោក ប្រាយុទ្ធ ចាន់អូចា នាយករដ្ឋមន្ត្រីថៃបានអញ្ជើញតភ្ជាប់ស្ពានមិត្តភាពកម្ពុជា-ថៃ(ស្ទឹងបត់-បានណងអៀន)ជាការបើកនូវទំព័រប្រវត្តិសាស្ត្រថ្មីរវាងប្រទេសទាំងពីរសំដៅធ្វើឲ្យប្រសើរឡើងនូវការធ្វើពាណិជ្ជកម្មឆ្លងកាត់ព្រំដែនកម្ពុជា-ថៃ ហើយដែលប្រទេសយើងទាំង ២ បានប្រសិទ្ធនាមឈ្មោះស្ពាននេះថាជា ស្ពានមិត្តភាពកម្ពុជា-ថៃ(ស្ទឹងបត់- បានណងអៀន)។
សម្តេចតេជោ ហ៊ុន សែន បានមានប្រសាសន៍ថា ការសាងសង់ស្ពាននេះ គឺជាការបើកនូវទំព័រប្រវត្តិសាស្ត្រថ្មី រវាងប្រទេសយើងទាំងពីរសំដៅធ្វើឲ្យប្រសើរឡើងនូវការធ្វើពាណិជ្ជកម្មឆ្លងកាត់ព្រំដែនកម្ពុជា-ថៃ ហើយដែលប្រទេសយើងទាំង ២ បានប្រសិទ្ធនាមឈ្មោះស្ពាននេះថាជា ស្ពានមិត្តភាពកម្ពុជា-ថៃ (ស្ទឹងបត់- បានណងអៀន)។
សម្តេចតេជោនាយករដ្ឋមន្ត្រីបានថ្លែងបន្តថា ការសាងសង់ស្ពាននេះបានផ្តល់អត្ថប្រយោជន៍យ៉ាងច្រើនដល់ប្រជាជនកម្ពុជានិងប្រជាជនថៃ និងបានផ្តល់ភាពងាយស្រួលដល់ប្រជាជនក្នុងប្រទេសមហាអនុតំបន់មេគង្គដើម្បីសម្រួលដល់ការតភ្ជាប់ទីក្រុងបាងកក-ភ្នំពេញនិងក្រុងហូជីមិញក្នុងគោលដៅជំរុញពាណិជ្ជកម្មទេសចរណ៍និងកិច្ចសហប្រតិបត្តិការដឹកជញ្ជូនស្របតាមការគិតគូររបស់សហគមន៍អាស៊ាននិងប្រទេសក្នុងមហាអនុតំបន់មេគង្គដែលបានកំណត់ផ្លូវពីបាងកក-បោយប៉ែត-ភ្នំពេញ-ហូជីមិញ ជាផ្លូវអាស៊ានហាយវេលេខ១ និងជាផ្លូវរបៀងសេដ្ឋកិច្ចខាងត្បូងដើម្បីឲ្យការដឹកជញ្ជូនទំនិញចេញចូលមានភាពងាយស្រួល។ ម្យ៉ាងវិញទៀត ស្ពាននេះ នឹងទុកសម្រាប់តែការដឹកជញ្ជូនទំនិញចេញចូលចំណែកឯច្រកព្រំដែនបៅយប៉ែត- អារញ្ញប្រថេតទុកសម្រាប់តែភ្ញៀវទេសចរឆ្លងកាត់ប៉ុណ្ណោះ។
សម្តេចតេជោហ៊ុនសែនបានថ្លែងបញ្ជាក់ថា ស្ពានមិត្តភាពកម្ពុជា-ថៃ (ស្ទឹងបត់- បានណងអៀន) ជាស្ពានភ្ជាប់និស្ស័យរវាងប្រជាជនខេត្តបន្ទាយមានជ័យនិងប្រជាជនខេត្តស្រះកែវពិសេសជាស្ពានភ្ជាប់និស្ស័យរវាងប្រជាជនកម្ពុជានិងប្រជាជនថៃដែលត្រូវបានកត់ត្រាក្នុងប្រវត្តិសាស្ត្រនៃប្រទេសយើងទាំងពីរ។
លោកនាយករដ្ឋមន្ត្រីថៃ ប្រាយុទ្ធចាន់អូចា បានមានប្រសាសន៍ថា ស្ពានឆ្លងកាត់ព្រំដែនកម្ពុជា-ថៃ មួយនេះចាត់ទុកជាស្ពានតភ្ជាប់ប្រទេសទាំងពីរដំបូងគេស្ពាននេះបានបង្ហាញឲ្យឃើញយ៉ាងច្បាស់អំពីទំនាក់ទំនងដ៏ល្អរវាងប្រទេសទាំងពីរដែលជាប្រទេសជិតខាងគ្នាមានទំនាក់ទំនងដ៏ជិតស្និទ្ធ ជាយូរអង្វែងមកហើយ។
លោកប្រាយុទ្ធបានបន្តថា ក្នុងអំឡុងពេលដែលការសាងសង់អគាររដ្ឋបាលព្រំដែនខាងភាគីថៃនិងការធ្វើផ្លូវតភ្ជាប់ខាងភាគីកម្ពុជាមិនទាន់រួចរាល់រាជរដ្ឋាភិបាលថៃមានការប្ដេជ្ញានឹងត្រៀមរួចរាល់ក្នុងផ្នែកពាក់ព័ន្ធផ្សេងៗទៀតធ្វើយ៉ាងណាសម្រេចឲ្យបានលឿនដើម្បីសម្រួលដល់ប្រជាពលរដ្ឋនៃប្រទេសទាំងពីរនិងសហគមន៍អាស៊ានដូចជាការរៀបចំកិច្ចព្រមព្រៀងពាក់ព័ន្ធផ្លូវច្បាប់ក្នុងការឆ្លងដែនតាមស្ពាននេះឲ្យបានចប់សព្វគ្រប់ទាន់ពេលដើម្បីបើកបម្រើសេវាដល់ប្រជាជនដោះស្រាយបញ្ហាកកស្ទះចរាចរណ៍នៅខាងមុខច្រកព្រំដែនខ្លងលឹកបច្ចុប្បន្ននិងបើកច្រកដឹកជញ្ជូនទំនិញឆ្លងដែនថ្មីឲ្យមានភាពងាយស្រួលជាងមុន រួមទាំងការតភ្ជាប់ឧស្សាហកម្មទាំងអស់ដែលពាក់ព័ន្ធរវាងតំបន់សេដ្ឋកិច្ចពិសេសរបស់កម្ពុជាតំបន់អភិវឌ្ឍន៍សេដ្ឋកិច្ចពិសេសខាងកើត (EEC) របស់ថៃ ហើយតភ្ជាប់ទៅកំពង់ផែទឹកជ្រៅឡែមច្បាំង ដើម្បីនាំទំនិញទៅកាន់ទីផ្សារពិភពលោក។
ក្រៅពីការជំរុញពាណិជ្ជកម្មការវិនិយោគនិងភាពងាយស្រួលក្នុងការដឹកជញ្ជូនរវាងប្រទេសទាំងពីរហើយខ្ញុំយល់ឃើញថា ស្ពាននេះថែមទាំងជានិមិត្តរូបនៃភាពជោគជ័យនៃការអនុវត្តការងាររួមគ្នារវាងរដ្ឋមន្ត្រីទាំងពីរភាគី ហើយនិងបន្តភ្ជាប់ទំនាក់ទំនងដ៏ជិតស្និទ្ធរវាងប្រជាជនថៃនិងប្រជាជនកម្ពុជាតាមរយៈស្ពានថ្មីនេះដែលស្របទៅតាមសេចក្ដីប្រកាសរបស់អាស៊ានដែលផ្ដោតសំខាន់ទៅលើការតភ្ជាប់កម្រិតប្រជាជនអាស៊ានរួមទាំងបំពេញបន្ថែមផ្លូវដែលត្រូវបានបាត់បង់ក្នុងក្របខ័ណ្ឌកិច្ចសហប្រតិបត្តិការកម្រិតភូមិភាគនិងអនុភូមិភាគជាពិសេសវិស័យគមនាគមន៍ការដឹកជញ្ជូននិងឡូជីស្ទីកដូចជាក្របខ័ណ្ឌអាស៊ានក្របខ័ណ្ឌកិច្ចសហប្រតិបត្តិការផ្នែកសេដ្ឋកិច្ចនៃអនុតំបន់ដងទន្លេមេគង្គឬ (GMS), ក្របខ័ណ្ឌកិច្ចសហប្រតិបត្តិការយុទ្ធសាស្ត្រផ្នែកសេដ្ឋកិច្ចអាយេយ៉ាវ៉ាឌី ចៅប្រាយ៉ា មេគង្គ(ACMECS)ដែលនឹងជំរុញការសម្របសម្រួលឲ្យមានកិច្ចសហប្រតិបត្តិការលើផ្នែកផ្សេងៗទៀតដូចជាវិស័យសេដ្ឋកិច្ចគមនាគមន៍ការតភ្ជាប់សង្គមនិងវប្បធម៌អប់រំកសិកម្មនិងទេសចរណ៍ឲ្យឆ្ពោះទៅរកការអភិវឌ្ឍនិងភាពរីកចម្រើនព្រមគ្នា។
លោកនាយករដ្ឋមន្ត្រីបានមានប្រសាសន៍ទៀតថា ក្នុងឱកាសដែលប្រទេសថៃបានទទួលកិត្តិយសធ្វើជាប្រធានអាស៊ានក្នុងឆ្នាំនេះខ្ញុំចាត់ទុកថាស្ពានមិត្តភាពថៃ-កម្ពុជា(បានណងអៀន-ស្ទឹងបត់)ជាសមិទ្ធផលដ៏អស្ចារ្យសម្រាប់ប្រទេសយើងទាំងពីរ ជាកាដូដែលរាជរដ្ឋាភិបាលនៃប្រទេសទាំងពីរតាំងចិត្តផ្ដល់ជូនប្រជាពលរដ្ឋនៃប្រទេសទាំងពីររួមទាំងសហគមន៍អាស៊ានបានប្រើប្រាស់ជាប្រយោជន៍ក្នុងការភ្ជាប់ទំនាក់ទំនងគ្នានៃគ្រប់ផ្នែកទាំងអស់ពិសេសជាមោទនភាពដែលស្ពាននិងផ្លូវបានចាប់ផ្ដើមនឹងសាងសង់រួចរាល់ក្នុងអាណត្តិរដ្ឋាភិបាលរបស់យើងទាំងពីរ។
លោកប្រាយុទ្ធ ចាន់អូចា បានអះអាងថា គោលការណ៍នៃកិច្ចសហប្រតិបត្តិការរបស់រាជរដ្ឋាភិបាលថៃជាមួយរាជរដ្ឋាភិបាលកម្ពុជានឹងមានជាបន្តបន្ទាប់ដោយភាពស្មោះត្រង់ជិតស្និទ្ធនិងគង់វង្សជារៀងរហូតហើយនៅឆ្នាំក្រោយជាខួបលើកទី ៧០ នៃទំនាក់ទំនងខាងការទូតរវាងព្រះរាជាណាចក្រថៃនិងព្រះរាជាណាចក្រកម្ពុជាដែលអាចនឹងចំពេលគ្នាជាមួយនឹងវិវឌ្ឍនភាពនៃការកសាងនិងការបើកច្រកថ្មីនេះ។
សូមបញ្ជាក់ថា ស្ពានមិត្តភាពកម្ពុជា-ថៃ(ស្ទឹងបត់-បានណងអៀន)ដែលចាក់បេតុងតភ្ជាប់នៅថ្ងៃ នេះ សាងសង់ដោយកងវិស្វកម្មនៃកងទ័ពភូមិន្ទថៃហើយសិក្សា និងត្រួតពិនិត្យបច្ចេកទេសដោយនាយកដ្ឋានហាយវ៉េ (DOH)ក្រសួងដឹកជញ្ជូនថៃក្រោមជំនួយឥតសំណងពីរាជរដ្ឋាភិបាលថៃជាង១៩លានដុល្លារ។ ក្រៅពីជំនួយឥតសំណងពីរាជរដ្ឋាភិបាលថៃលើគម្រោងសាងសង់ស្ពានខាងលើរាជរដ្ឋាភិបាលកម្ពុជាបានចូលរួមថវិកាបដិភាគសម្រាប់ការដោះស្រាយផលប៉ះពាល់ ការបោសសម្អាតមីនយុទ្ធភណ្ឌមិនទាន់ផ្ទុះ និងពន្ធអាករផ្សេងៗ។
ស្ពាននេះជាស្ពានធំទីមួយដែលបានសាងសង់លើខ្សែបន្ទាត់ព្រំដែនកម្ពុជា-ថៃនៅចន្លោះបង្គោលខណ្ឌព្រំសីមាលេខ៥០ និងលេខ៥១ ។ ស្ពាននេះមានប្រវែង ៦២០ ម៉ែត្រ ទទឹង ១៧ម៉ែត្រដោយនៅផ្នែកកម្ពុជាមានប្រវែង ២១៥ ម៉ែត្រ នៅផ្នែកខាងថៃ មានប្រវែង ៤០៥ ម៉ែត្រ។ ការសាងសង់ស្ពាននេះគឺជាការបើកឡើងនូវទំព័រប្រវត្តិសាស្ត្រ ថ្មីមួយរវាងប្រទេសទាំងពីរសំដៅធ្វើឲ្យប្រសើរឡើងការធ្វើពាណិជ្ជកម្មឆ្លងកាត់ព្រំដែនរវាងកម្ពុជា-ថៃ៕
Source: Kampuchea Thmey Daily
0 Comments