ក្រុមបាល់ទាត់ព្រះខ័នរាជស្វាយរៀង បន្តឈរកំពូលតារាងនៃពានរង្វាន់លីគកំពូលកម្ពុជា (Metfone Cambodian League) ឆ្នាំ២០១៩ ដែលរៀបចំឡើងដោយគណៈកម្មការប្រកួតបាល់ទាត់ជាតិកម្ពុជា(CNCC) សេនាធិការរបស់សហព័ន្ធកីឡាបាល់ទាត់កម្ពុជា ត្រឹមសប្ដាហ៍ទី៤ ក្រោយប្រកួតឈ្នះទាំង៤លើក មាន១២ពិន្ទុច្រើនជាងគេក្នុងដៃ។
សម្រាប់លទ្ធផលប្រចាំសប្ដាហ៍ទី៤ ឃើញថានៅថ្ងៃទី២០ ខែមេសា ឆ្នាំ២០១៩ ដោយក្រុមវិសាខាឈ្នះក្រុមអគ្គីសនីកម្ពុជា ៤ទល់០ លើទីលានកីឡដ្ឋានវិសាខា ហើយក្រុមសាលាបាល់ទាត់ជាតិបាទីចាញ់ក្រុមអង្គរថាយហ្គឺរ ៦ទល់០ លើទីលានកីឡដ្ឋានមជ្ឍមណ្ឌលសាលាបាល់ទាត់ជាតិបាទី ក្នុងខេត្តតាកែវ ហើយក្រុមអាស៊ីអឺរ៉ុប ឈ្នះក្រុមគីរីវង់សុខសែនជ័យ ២ទល់១លើទីលានកីឡដ្ឋាន AEU Sport Park។ ចំណែក៤គូផ្សេងទៀតត្រូវប្រកួតនៅថ្ងៃទី២១ ខែមេសា ឆ្នាំ២០១៩ ឃើញថាក្រុមខេត្តកំពង់ចាម ចាញ់ក្រុមបឹងកេត ៧ទល់០លើទីលានបាល់ទាត់វិទ្យាល័យ ប៊ុន រ៉ានី ហ៊ុន សែន មេមត់ ហើយក្រុមព្រះខ័នរាជស្វាយរៀង ឈ្នះក្រុមភ្នំពេញក្រោន ៥ទល់១លើទីលានកីឡដ្ឋានខេត្តស្វាយរៀង ស្របពេលក្រុមអគ្គស្នងការដ្ឋាននគរបាលជាតិ ចាញ់ក្រសួងការពារជាតិ ៤ទល់២លើទីលានកីឡដ្ឋានអគ្គីសនីកម្ពុជា និងក្រុមសូលទីឡូអង្គរ ចាញ់ក្រុមណាហ្គាវើល ១ទល់០លើទីលានកីឡដ្ឋានខេត្តសៀមរាប។
ងាកមកមើលចំណាត់ថ្នាក់បណ្តោះអាសន្នក្រោយប្រកួតបាន៤លើកនេះមកឃើញថាក្រុមព្រះខ័នរាជស្វាយរៀង ឈរលេខ១ មាន១២ពិន្ទុហើយក្រុមក្រសួងការពារជាតិ ឈរលេខ២ មាន១០ពិន្ទុ ស្មើគ្នាជាមួយក្រុមវិសាខា ឈរលេខ៣ ហើយក្រុមណាហ្គាវើល ឈរលេខ៤ មាន៩ពិន្ទុ និងក្រុមអគ្គីសនីកម្ពុជា ឈរលេខ៥មាន៨ពិន្ទុ។ ចំណែកក្រុមបឹងកេត ឈរលេខ៦មាន៧ពិន្ទុ ក្រុមក្រុមអាស៊ីអឺរ៉ុប ឈរលេខ៧ មាន៦ពិន្ទុ ហើយក្រុមអគ្គីសនីកម្ពុជា ឈរលេខ៨ មាន៦ពិន្ទុ ក្រុមគីរីវង់សុខសែនជ័យ ឈរលេខ៩ មាន៣ពិន្ទុស្មើគ្នាជាមួយក្រុមភ្នំពេញក្រោន នៅលេខ១០ ,អគ្គស្នងការដ្ឋាននគរបាលជាតិ លេខ១១ និងកំពង់ចាម លេខ១២ ហើយក្រុមសូលទីឡូអង្គរ ឈរលេខ១៣មាន១ពិន្ទុ និងយុវជនសាលាបាល់ទាត់ជាតិបាទីលេខ១៤ មិនទាន់មានពិន្ទុកាន់ទេ។
សម្រាប់ប្រកួតបន្ទាប់ប្រចាំសប្ដាហ៍ទី៥ នឹងបន្តធ្វើឡើងនៅចុងខែមេសា នេះដោយនៅថ្ងៃទី២៧ ខែមេសា ក្រុមក្រសួងការពារជាតិ ប៉ះបឹងកេតអែហ្វស៊ី វេលាម៉ោង៦:៣០នាទីរសៀលលើទីលានពហុកីឡដ្ឋានជាតិ ហើយក្រុមអគ្គីសនីកម្ពុជា ជួបព្រះខ័នរាជស្វាយរៀង នៅវេលាម៉ោង៣និង៣០នាទីរសៀលលើទីលានអគ្គីសនីកម្ពុជា និងក្រុមខេត្តកំពង់ចាម ប៉ះក្រុមសាលាបាល់ទាត់ជាតិបាទី នៅវេលាម៉ោង៣និង៣០នាទីរសៀលលើទីលានវិទ្យាល័យ ប៊ុន រ៉ានី ហ៊ុន សែន មេមត់។
ចំណែកនៅថ្ងៃទី២៨ ខែមេសា វិញក្រុមអង្គរថាយហ្គឺរ ទទួលវិសាខា នៅវេលាម៉ោង៣និង៣០នាទីរសៀល លើទីលានកីឡដ្ឋានខេត្តសៀមរាប ហើយក្រុមអគ្គស្នងការដ្ឋាននគរបាលជាតិ ជួបក្រុមសូលទីឡូអង្គរ នៅម៉ោងដំណាលគ្នាលើទីលានកីឡដ្ឋានអគ្គីសនីកម្ពុជា ស្របពេលក្រុមគីរីវង់សុខសែនជ័យ ប៉ះក្រុមណាហ្គាវើល នៅវេលាម៉ោងដូចគ្នាដែរលើទីលានគរុកោសល្យខេត្តតាកែវ និងក្រុមភ្នំពេញក្រោន ទទួលក្រុមអាស៊ីអឺរ៉ុប នៅវេលាម៉ោង៦ល្ងាចលើទីលានកីឡដ្ឋាន Smart RSN Stadium។
តាមគម្រោងពានរង្វាន់បាល់ទាត់លីគកំពូលកម្ពុជារដូវកាលថ្មីឆ្នាំ ២០១៩ នេះនឹងចាប់ផ្ដើមពីថ្ងៃទី១៦ ខែមីនា ដល់ថ្ងៃទី១៧ ខែតុលា ឆ្នាំ២០១៩។ ក្រុមជើងឯកលីគកំពូលកម្ពុជាមានឱកាសចេញទៅប្រកួតលើឆាកអន្តរជាតិមួយចំនួនដូចជាពានរង្វាន់ AFC Cup, Mekong Championship និងពានរង្វាន់មួយចំនួនទៀត៕
Source: Kampuchea Thmey Daily
0 Comments