ការ​អះអាង​អំពី​ការ​ជ្រៀតជ្រែក​របស់​ចិន ​បាន​វាយប្រហារ​រដ្ឋាភិបាល​អូស្ត្រាលី​មុន​ការបោះឆ្នោត

រដ្ឋមន្ត្រី​អន្តោប្រវេសន៍​អូស្ត្រាលី​ត្រូវ​រងគ្រោះ​នៅក្នុង​រឿងរ៉ាវ​ដ៏​ស៊ីជម្រៅ​មួយ​ស្តីពី​ការជ្រៀតជ្រែក​របស់​ចិន​នៅក្នុង​នយោបាយ​ក្នុងប្រទេស​កាលពី​ថ្ងៃ​អង្គារ​ដែល​នេះ​បាន​បណ្តាល​ឲ្យ​មាន​បញ្ហា​ប្រឈម​មួយទៀត​ចំពោះ​រដ្ឋាភិបាល​ដែល​កំពុង​ប្រឈមមុខ​នឹង​បរាជ័យ​ក្នុងការ​បោះឆ្នោត នៅ​ខែ​ក្រោយនេះ។

ការស៊ើបអង្កេត​មួយ​ដោយ​បណ្តាញ​ទូរទស្សន៍ ABC បាន​បង្ហាញថា រដ្ឋមន្ត្រី​ក្រសួងមហាផ្ទៃ​លោក Peter Dutton បាន​ជួប​ជា​លក្ខណៈ​ឯកជន​ជាមួយ​មហាសេដ្ឋី​ចិន​ឈ្មោះ Huang Xiangmo នៅក្នុង​ឆ្នាំ​២០១៦​ដើម្បី​ពិភាក្សា​អំពី​ការទទួលបាន​សញ្ជាតិ​អូស្ត្រាលី​។​

លោក Huang បាន​ស្ថិតនៅ​ចំ​កណ្តាល​នៃ​រឿងអាស្រូវ​ជាច្រើន​រាប់បញ្ចូល​ទាំង​ការចោទប្រកាន់ថា​លោក​បានដាក់​ឥទ្ធិពល​ក្នុង​ទីក្រុង​កង់​បេ​រ៉ា​ជាមួយ​ការបរិច្ចាគ​ប្រាក់​រាប់លាន​ដុល្លារ​ដល់​គណបក្សនយោបាយ​ធំៗ​ផងដែរ​ប៉ុន្តែ​លោក​បាន​បដិសេធ​ជា​យូរ​មកហើយ​នូវ​ការធ្វើ​ខុស​ណាមួយ​។​

ABC បាន​ចោទប្រកាន់ថា លោក Huang បាន​បង់ប្រាក់​រាប់ពាន់​ដុល្លារ​ទៅ​ឲ្យ​អ្នក​បញ្ចុះបញ្ចូល​សម្រាប់​ការជួប​ជា​លក្ខណៈ​ឯកជន​ជាមួយ​លោក Dutton ដែលជា​ហេតុ​ធ្វើ​ឲ្យ​រដ្ឋាភិបាលចម្រុះ​របស់​ប្រទេស​អូស្ត្រាលី​ធ្លាក់ចូល​ទៅក្នុង​រឿងរ៉ាវ​នៃ​ការជ្រៀតជ្រែក​របស់​បរ​ទេស​មុន​ការបោះឆ្នោត​ដែល​ត្រូវបាន​គេ​រំពឹងទុក​នៅ​ថ្ងៃទី​១៨​ខែឧសភា​។​
​
នៅ​ទីបំផុត លោក Huang ត្រូវបាន​បដិសេធ​សម្រាប់​ភាពជា​ពលរដ្ឋ​តាម​ការផ្តល់​ដំបូន្មាន​ពី​ភ្នាក់ងារ​ចារកម្ម​អូស្ត្រាលី​ហើយ​កាលពី​ខែ​មុន​បាន​ហាមឃាត់​ពី​ការចូល​ក្នុងប្រទេស​នេះ​លើ​ការសង្ស័យថា គាត់​គឺជា​ផ្នែក​មួយ​នៃ​យុទ្ធនាការ​ដ៏​មាន​ឥទ្ធិពល​របស់​គណបក្ស​កុ​ម្មុយ​និ​ស្ត​។​
​
ទោះបីជា​យ៉ាងណាក៏ដោយ លោក Dutton កាលពី​ថ្ងៃ​អង្គារ​បាន​ច្រានចោល​ការចោទប្រកាន់​ពីបទ​ជ្រៀតជ្រែក​ថា​ជា​រឿង​មិន​សម​ហេតុ​សម​ផល​។​
​
លោក​បាន​ប្រាប់​ក្រុមអ្នកកាសែត​ថា “​ខ្ញុំ​មិនដែល​ទទួលបាន​ប្រាក់​មួយ​ដុល្លារ​ពី​បុគ្គល​ម្នាក់នេះ​ទេ​។ ខ្ញុំ​បាន​ជួប​គាត់​ម្តង​នៅពេល​អាហារ​ថ្ងៃត្រង់​។ ខ្ញុំ​មិនដែល​ឃើញ​គាត់​ទៀត​ទេ​ចាប់តាំងពី​ពេលនោះ​មក​”​។​
​
គួរ​បញ្ជាក់ថា រដ្ឋាភិបាល​ក្រុង​កង់​បេ​រ៉ា​បាន​ហាមឃាត់​ការបរិច្ចាគ​ពី​បរទេស​ជា​ផ្នែក​មួយ​នៃ​ការកែទម្រង់​របស់ខ្លួន​ដោយបាន​ហៅ​ប្រទេស​ចិន​ថា​ជាការ​ព្រួយបារម្ភ​ចម្បង​របស់ខ្លួន​៕ AFP

​

Source: Kampuchea Thmey Daily