គណៈកម្មាធិការប្រយុទ្ធប្រឆាំងផលិតផលក្លែងក្លាយ បង្ហាញឱសថជំនួយផ្លូវភេទ និងថ្នាំសម្រើបជិត២ម៉ឺនគ្រាប់ ដែលបង្ក្រាបបាន

ភ្នំពេញ ៖ ឱសថជំនួយផ្លូវភេទ បង្កើនអារម្មណ៍ ស្រើបស្រាល ដែលគ្មានលិខិតអនុញ្ញាតនាំចូល និង ហួសការ បរិច្ឆេទកំណត់ជិត២ម៉ឺនគ្រាប់ ត្រូវបានគណៈកម្មាធិការ ប្រយុទ្ធ ប្រឆាំង ផលិតផល ក្លែងក្លាយ បានធ្វើសន្និសីទបង្ហាញ កាលពីព្រឹក ថ្ងៃទី៩ ខែមេសា ឆ្នាំ២០១៩ នៅទីស្ដីការក្រសួងមហាផ្ទៃ។

យោងតាមរបាយការណ៍របស់សមត្ថកិច្ចបានឲ្យដឹងថា ឱសថជំនួយផ្លូវភេទ បង្កើនអារម្មណ៍ ដែលសមត្ថកិច្ច យកមកបង្ហាញ និង ធ្វើសន្និសីទនៅពេលនេះ គឺសមត្ថកិច្ចជំនាញ ចុះបង្ក្រាបបាន កាលពី ថ្ងៃទី២៧ ខែមីនា ឆ្នាំ២០១៩ នៅទីតាំង លក់ឱសថ សម័យបុរាណចិនបីកន្លែង នៅលើវិថី ហ្សា ដឺ ហ្គោល រកឃើញថ្នាំ ចំនួន១៨.១៦០គ្រាប់។

ថ្លែងក្នុងឱកាសនោះ លោក មៀច សុផាន់ ណា ប្រធានគណៈកម្មាធិការប្រយុទ្ធប្រឆាំងផលិតផល ក្លែងក្លាយបានថ្លែងថា កម្លាំងប្រតិបត្តិការពិសេស នៃគណៈកម្មាធិការ ប្រយុទ្ធប្រឆាំង ផលិតផល ក្លែងក្លាយ កាលពីថ្ងៃទី២៧ ខែមីនា ឆ្នាំ ២០១៩ បានចុះប្រតិបត្តិ ការធ្វើការឆែកឆេរ ទីតាំងលក់ ឱសថសម័យបុរាណចិនបីកន្លែង នៅលើវិថីហ្សាដឺហ្គោល គឺបានរកឃើញឱសថដែលមិនបានចុះបញ្ជិកាផុតសុពលភាព និងគ្មានការអនុញ្ញាត និង រកឃើញឱសថបង្កើនចំណង់ផ្លូវភេទ បង្កើនភាព ស្រើបស្រាល ថ្នាំសម្រើប មានទាំងប្រភេទសម្រាប់ប្រើប្រាស់ ជាមួយ បុរស និង ស្ត្រី។ ហើយចំនួន ថ្នាំដែលពាក់ព័ន្ធ ជាមួយនឹងការបង្កើនចំណង់ផ្លូវភេទ១៨.១៦០គ្រាប់។

លោក បាន បញ្ជាក់ថា ចំពោះម្ចាស់ទីតាំង សមត្ថកិច្ច កម្លាំងប្រតិបត្តិការពិសេស កំពុងតែកសាង សំណុំរឿងទៅតុលាការ ហើយម្ចាស់ទីតាំងកំពុងតែស្ថិតក្រោមការឃ្លាំមើលរបស់សមត្ថកិច្ច។

លោកបន្តថា “ ឱសថនេះ យើងកំពុងតែកំណត់ថា តើឱសថនេះ ក្លែងក្លាយ ឬក៏វាផលិតមករបៀប ម៉េច ដើម្បីកំណត់ស្ថានទម្ងន់ទោសឲ្យបានត្រឹមត្រូវ ហើយនៅក្នុងច្បាប់របស់យើង ដែលមានចែង គឺថា ទោសប្រើប្រាស់ថ្នាំ ដែលវាប៉ះពាល់ ដល់ ប្រព័ន្ធប្រសាទ ថ្នាំបង្កើនភាពស្រើបស្រាល ថ្នាំសម្រើប គឺ ពិតជារកឃើញមែន មានទោស ពី៥ ឆ្នាំ រហូត ទៅដល់ ១០ ឆ្នាំ និង ត្រូវ ពិន័យ ជាប្រាក់ រហូត ទៅដល់៥០លានរៀល។ ហើយ ករណីនេះ វាជារឿងមួយដែលថ្មី យើងកំពុងតែធ្វើការសិក្សា ស្រាវជ្រាវឲ្យបានដិតដល់ ដើម្បី ធានាថា សុខភា ប្រជាជននឹងត្រូវ បានការពារ ” ៕