ភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន នៅតែមានមោទនភាពចំ ពោះក្របខ័ណ្ឌគោលនយោបាយដែលបានដាក់ចេញនាពេលកន្លងមក គឺការបើកឲ្យមានការចូលរួមរបស់វិស័យឯកជននៅក្នុងការបណ្តុះបណ្ដាលធនធានមនុស្ស។
សម្តេចតេជោនាយករដ្ឋមន្ត្រីបានថ្លែងដោយមោទនភាពនេះនៅក្នុងពិធីអញ្ជើញជាអធិបតីភាពក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រងនាព្រឹកថ្ងៃទី២៣ ខែមេសា ឆ្នាំ២០១៩នេះ។ សម្តេចតេជោបានលើកឡើងថា ការបើកទូលាយឲ្យមានការចូលរួមរបស់វិស័យឯក ជនលើកការបណ្តុះបណ្តាលធនធានមនុស្ស គឺជាគោលនយោបាយដ៏ត្រឹមត្រូវមួយដែលបានធ្វើឲ្យធនធាន មនុស្សរបស់កម្ពុជាមានការរីកចំរើន។ សម្តេចបានកោតសរសើរជាមួយនឹងការខិតខំរបស់វិស័យឯកជនក្នុងប្រទេសកម្ពុជា ដែលបានចូលរួមយ៉ាងច្រើននៅក្នុងការបណ្តុះបណ្តាលធនធានមនុស្សតាមរយៈការបើ កសាលារៀន ថ្នាក់កម្រិតនានាជាពិសេសថ្នាក់ឧត្តមសិក្សា និង ក្រោយឧត្តមសិក្សា។
សម្ដេចអគ្គមហាសេនាបតីតេជោ ហ៊ុន សែន បានអញ្ជើញជាអធិបតីដ៏ខ្ពង់ខ្ពស់ក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យជាតិគ្រប់គ្រង(NUM)ចំនួន ២,២៨៧នាក់ នារី ១,១៩៤នាក់ ដែលក្នុងនោះមាននិស្សិតថ្នាក់បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិតផងដែរ។
សម្តេចតេជោ ហ៊ុន សែន នាយករដ្ឋមន្ត្រីបានបង្ហាញសេចក្តីរីករាយដែលបានអញ្ជើញប្រគល់សញ្ញាបត្រដល់និស្សិត នៃសាកលវិទ្យាល័យជាតិគ្រប់គ្រងនៅព្រឹកនេះ។ ទន្ទឹមនឹងនេះដែរ សម្តេចតេជោនាយករដ្ឋមន្ត្រី បានកោតសរសើរនិងអបអរសារដល់និស្សិតជ័យលាភីទាំងអស់និងបានថ្លែងអំណរគុណចំពោះមាតាបិតានិងអាណាព្យាបាលដែលបានផ្តល់ឱកាសអោយកូនចៅបានសិក្សារៀនសូត្ររហូតទទួលបានជោគជ័យនាពេលនេះ ។ ជាមួយគ្នាននេះផងដែរសម្តេចតេជោនាយករដ្ឋមន្ត្រីក៏បានកោតសរសើរចំពោះថ្នាក់ដឹកនាំនៃសាកលវិទ្យាល័យជាតិគ្រប់គ្រងដែលបានខិតខំយកចិត្តទុកដាក់បណ្តុះបណ្តាលនិស្សិតតាំងពីចំ នួនតិចតួចរហូតដល់មាននិស្សិតសិក្សារាប់ម៉ឺននាក់ ។ សម្តេចតេជោបានបន្តថាដូចខ្ញុំបាននិយាយហើយថាសាកលវិទ្យាល័យជាតិគ្រប់គ្រង នៅតែជាសាកលវិទ្យាល័យឈានមុខមួយរបស់រដ្ឋ ដែលទទួលបានការពេញនិយមនិងការចូលរៀនច្រើនរបស់សិស្សនិស្សិត។
សម្តេចតេជោនាយករដ្ឋមន្ត្រីបានមានប្រសាសន៍ដោយក្តីមោទនភាពចំពោះការរីកចម្រើននៃវិស័យអប់រំនៅកម្ពុជាដែលបច្ចុប្បន្ននេះមានការរីកដុះដាលយ៉ាងច្រើនដោយមានការវិនិយោគទាំងផ្នែករដ្ឋនិងទាំ ងផ្នែកឯកជនដែលបាននឹងកំពុងចូលរួមចំណែកដល់ការរីកលូតលាស់នៃវិស័យអប់រំ និង បណ្តុះបណ្តាលធនធានមនុស្សនៅកម្ពុជា។
ឆ្លៀតក្នុងឱកាសនេះផងដែរសម្តេចតេជោនាយករដ្ឋមន្ត្រី បានថ្លែងអំណរគុណ និងកោតសរសើរចំពោះអាជ្ញាធរគ្រប់លំដាប់ថ្នាក់ដែលបានយកចិត្តទុកដាក់ ការពារសុវត្តិភាពដល់បងប្អូនប្រជាពលរដ្ឋក្នុងអំឡុងពេលបុណ្យចូលឆ្នាំប្រពៃណីជាតិខ្មែរយើងកន្លងទៅថ្មីៗនេះ ដែលបានធ្វើអោយបងប្អូនប្រជាពលរដ្ឋយើងទទួលបាននូវភាពសប្បាយរីករាយគ្រប់ទីកន្លែង។ សម្តេចតេជោបានកត់សំគាល់ឃើញថាឆ្នាំនេះបងប្អូនប្រជាពលរដ្ឋយើងបានសប្បាយរីករាយជាងឆ្នាំកន្លងទៅ ដោយសារសង្គ្រាន្តត្រូវបានធ្វើនៅគ្រប់ខេត្តទូទាំងប្រទេស ដែលបានបង្ហាញអោយឃើញអំពីប្រពៃណីទំនៀមទំលាប់ដ៏ល្អផូផង់របស់ខ្មែរយើង សម្តេចបានចាត់ទុកសង្គ្រាន្តទូទាំងប្រទេសនេះគឺជាការពង្រឹងនិងថែរក្សានូវវប្បធ៌មប្រពៃណីជាតិ ។ សម្តេចតេជោនាយករដ្ឋមន្ត្រីបានមានប្រសាសន៍បន្តថាភាពសប្បាយរីករាយទាំងអស់នេះគឺកើតមានឡើងដោយកក្តាសំខាន់ៗ៤គឺ ១.កត្តាសុខសន្តិភាពក្នុងផ្ទៃប្រទេស , ២.កត្តាហេដ្ឋារចនាសម្ព័ន្ធតភ្ជាប់គ្រប់ទីកន្លែង ដែលធ្វើអោយពលរដ្ឋបានដើរលេកម្សាន្តគ្រប់ទីកន្លែង, ៣.កត្តាមធ្យោបាយធ្វើដំណើរដែលបានកើនឡើងឆ្លើយតបទៅការរីកចំរើនរបស់ប្រទេសជាតិនិង៤.កត្តាប្រាក់ចំណូលសមរម្យដែលផ្តល់ឱកាសអោយពលរដ្ឋមានឱកាសធ្វើដំណើរទៅកសាន្តសប្បាយគ្រប់ទីកន្លែងទាំងក្នុង និងក្រៅប្រទេស។
សម្តេចតេជោនាយករដ្ឋមន្ត្រីក៏បានថ្លែងអំណរគុណដល់អាជ្ញាធរនិងកងកម្លាំងសមត្ថកិច្ចគ្រប់លំ ដាប់ថ្នាក់ដែលបានចូលរួមថែរក្សាការពារសុវត្ថិភាពជូនបងប្អូនប្រជាពលរដ្ឋនិងភ្ញៀវទេសចរបានកំសាន្តសប្បាយក្នុងឱកាសបុណ្យចូលឆ្នាំថ្មីកន្លងទៅថ្មីៗនេះ។
តាមរបាយការណ៍របស់លោក ហង់ ជូនណារ៉ុន រដ្ឋមន្ត្រីក្រសួងអប់រំយុវជននិងកីឡា បានអោយដឹងថាសាកលវិទ្យាល័យជាតិគ្រប់គ្រងជាសាកលវិទ្យាល័យរបស់រដ្ឋដែលបាននិងកំពុងដើរតួនាទីយ៉ាងសំខាន់ក្នុងការអប់រំ បណ្តុះបណ្តាលធនធានមនុស្សសម្រាប់កម្ពុជាយ៉ាងសកម្ម។
ចាប់តាំងពីថ្ងៃបង្កើតឡើងនៅឆ្នាំ១៩៨៣ មកដល់ឆ្នាំសិក្សា ២០១៧-២០១៨ និស្សិតដែលបានបញ្ចប់ការសិក្សាពី សាកលវិទ្យាល័យជាតិគ្រប់គ្រង មានចំនួនសរុប ៤៩,៩១៥នាក់ នារី ២១,៧២០នាក់។ ក្នុងនោះនិស្សិតអាហារូបករណ៍ចំនួន ៦,៤៤៧នាក់ នារី ២,៤០៣នាក់ និងនិស្សិតសិក្សាបង់ថ្លៃចំនួន ៤៣,៤៦៨នាក់ នារី ១៩,៣១៧នាក់។ បច្ចុប្បន្នអតីតនិស្សិតទាំងនោះបាននិងកំពុងបម្រើការងារនៅក្នុងស្ថាប័នរដ្ឋ វិស័យឯកជន និងស្ថាប័នអន្តរជាតិ ប្រកបដោយសមត្ថភាពវិជ្ជាជីវៈខ្ពស់ ឧត្តមភាព សេចក្តីថ្លៃថ្នូរ និងកិត្តិយស៕
Source: Kampuchea Thmey Daily
0 Comments