ប្រដាល់ ៖ អ្នកប្រដាល់៤រូប នឹងជួបប្រកួតគ្នាដណ្តើមពានរង្វាន់អនុស្សាវរីយ៍បាយ័ន សម្រាប់ប្រភេទទម្ងន់៦០គីឡូក្រាម ឆ្នាំ២០១៩ នៅល្ងាចថ្ងៃសៅរ៍ ទី២០មេសានេះ នៅលើសង្វៀនបាយ័នស្ទឹងមានជ័យ។ អ្នកប្រដាល់ទាំង៤រូបនោះ រួមមាន ម៉ិល សារុន មកពីក្លិបអាណាចក្រគុនខ្មែរ, ធា វាសនា ក្លិបនាគរាជមានជ័យ, លី តឿន ក្លិបមកុដរាជសីហ៍ និង អៀប លីឆា ក្លិបតាឯកដំបងដែកមានរិទ្ធ ខេត្តព្រៃវែង។
ពួកគេទាំង៤នាក់នេះ ត្រូវប្រកួតទៅតាមរូបមន្តជាMarathon គឺចាញ់ហាលអាវ ឈ្នះត្រូវបន្តការប្រកួតទៀត ទាល់តែរកឃើញអ្នកឈ្នះម្ចាស់ពានរង្វាន់ក្នុងពេលតែមួយ។
ការប្រកួតចែកចេញជាពីរដំណាក់កាល ដែលដំណាក់កាលទី១ ជាការប្រកួតជម្រុះ ដើម្បីជម្រុះចោលពីរនាក់ដែលចាញ់ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្ដាច់ព្រ័ត្រដណ្តើមពានរង្វាន់ប្រាក់លានរបស់ស្ថានីយទូរទស្សន៍បាយ័ន។
គួរបញ្ជាក់ថា ការប្រកួតក្នុងដំណាក់កាលទី១ គឺប្រកួតតែ៣ទឹកប៉ុណ្ណោះ ដោយក្នុងមួយទឹកមាន៣នាទី សម្រាក២នាទី និងការប្រកួតក្នុងដំណាក់កាលផ្ដាច់ព្រ័ត្រ គឺវាយ៥ទឹក តែមួយទឹកវាយតែ២នាទីប៉ុណ្ណោះ។
សម្រាប់ការជួបគ្នារវាងអ្នកប្រដាល់ទាំង៤រូបនេះ គឺម៉ិល សារុន នឹងត្រូវជួបប្រកួតជាមួយធា វាសនា ពួកគេទាំងពីរនាក់នេះ មិនធ្លាប់ជួបគ្នាទេកន្លងមក ដោយសារពួកគេទាំងពីរជាអ្នកប្រដាល់ជើងថ្មីដូចគ្នា។ ដូច្នេះការជួបគ្នាលើកនេះ ជាការជួបលើកដំបូងសម្រាប់ពួកគេទាំងពីរ។
បើតាមពិនិត្យកម្រិតសមត្ថភាពបច្ចេកទេស និង កាយសម្បទារបស់ពួកគេទាំងពីរនេះ គេមិនរំពឹងថា ធា វាសនា អាចវាយ ឈ្នះ ម៉ិល សារុន នោះទេ។ ទោះជាយ៉ាងនេះក្តី សម្រាប់ការជួបគ្នាលើកនេះ មិនទាន់ប្រាកដថា សារុន ឈ្នះ ឬវាសនា ឈ្នះ ទៀតនោះទេ ព្រោះថាអ្នកប្រដាល់ទាំងពីរនាក់នេះ ប្រកួតមិនសូវទៀងទាត់ប៉ុន្មានឡើយ។
ចំពោះ លី តឿន ដែលជាអ្នកប្រដាល់ជើងចាស់នោះ នឹងជួបជាមួយអៀប លីឆា ជាអ្នកប្រដាល់ស្រករក្រោយ។ រវាងពួកគេពីរនាក់នេះ មិនធ្លាប់ជួបប្រកួតគ្នាទេកន្លងមក។ យ៉ាងណា រវាងពួកគេពីរនាក់នេះ លី តឿន ទំនងជាអាចឈ្នះអៀប លីឆា ក្នុងការប្រកួតជម្រុះលើកដំបូងនោះ។
លី តឿន មានប្រៀបលើអៀប លីឆា ត្រង់គេវាយខ្លាំងជាង និងមានកលល្បិចច្រើនក្នុងការផ្តួលគូប្រកួត ពិសេសគេមានស្នៀតទាត់ល្អ ខ្លាំង និងធ្ងន់ ដែលធ្វើឲ្យ លីឆា ពិបាកទប់ទល់។
អៀប លីឆា ចង់ឈ្នះលី តឿន នោះ គឺមានតែវិធីម្យ៉ាងគត់ គឺត្រូវសម្រុកចូលវាយសន្ធាប់តែម្តង ទើបអាចមានផ្លូវឈ្នះកើត។ ព្រោះលី តឿន បច្ចុប្បន្ននេះមិនខ្លាំងដូចពីមុននោះទេ គេអន់កម្លាំងកាយសម្បទា នៅពេលដែលគូប្រកួតវាយបុកមកខ្លាំងនិងញាប់ពេក លី តឿន ត្រូវបាត់ភាពម្ចាស់ការ ក្នុងការការពារខ្លួន ដែលហ្នឹងហើយជាឱកាសសម្រាប់ អៀប លីឆា ដើម្បីយកឈ្នះលើលី តឿន នោះ ។ ចាំមើល លី តឿន អាចយកឈ្នះអៀប លីឆា បានឬអត់? ។
សម្រាប់ការប្រកួតដណ្តើមពានរង្វាន់ប្រាក់លានបាយ័នទម្ងន់៦០គីឡូក្រាមលើកនេះ មិនដឹងថាធ្លាក់ទៅលើនរណានោះទេ ក្នុងចំណោម ម៉ិល សារុន ក្លិបអាណាចក្រគុនខ្មែរ, ធា វាសនា ក្លិបនាគរាជមានជ័យ, លី តឿន ក្លិបមកុដរាជសីហ៍ និង អៀប លីឆា ក្លិបតាឯកដំបងដែកមានរិទ្ធខេត្តព្រៃវែង។ តែយ៉ាងណា ក្នុងចំណោមអ្នកប្រដាល់ទាំង៤រូបនេះ អ្នកដែលគេរំពឹងទុកថា នឹងអាចឡើងដល់វគ្គផ្ដាច់ព្រ័ត្រនោះ គឺអ្នកប្រដាល់ ម៉ិល សារុន និង លី តឿន។
ដោយឡែក សម្រាប់ការប្រកួតគូពិសេសវិញនោះ មាស សារ៉ាក់ អ្នកប្រដាល់ក្លិបអាណាចក្រគុនខ្មែរ ត្រូវជួបប្រកួតជាមួយ ឌុម កែវដប អ្នកប្រដាល់ក្លិបយុវវាលស្បូវខណ្ឌច្បារអំពៅ ក្នុងប្រភេទទម្ងន់៦០គីឡូក្រាម។ សម្រាប់ការជួបគ្នារវាងគូនេះ បើតាមការសន្និដ្ឋាន និងវាយតម្លៃនោះ ឌុម កែវដប ប្រហែលជាមិនអាចទប់ជាមួយកណ្ដាប់ដៃរបស់ មាស សារ៉ាក់ បាននោះឡើយ?៕
Source: Kampuchea Thmey Daily
0 Comments