ព្រៃវែង ៖ កាលពីព្រឹកថ្ងៃទី២២ ខែមេសា ឆ្នាំ២០១៩ ឯកឧត្ដម ស្បោង សារ៉ាត ប្រធានក្រុមប្រឹក្សាខេត្ត និងឯកឧត្ដម ដាំ វុទ្ធី អគ្គស្នងការរងនគរបាលជាតិ បានអញ្ជើញជាគណៈអធិបតីក្នុងពិធីបុណ្យឆ្លងអគារសិក្សា១ខ្នង និងខ្លោងទ្វាររបងសាលាបឋមសិក្សា ស្បោង សារ៉ាត ចំបក់ ស្ថិតនៅឃុំចុងអំពិល ស្រុកកញ្ជ្រៀច ខេត្តព្រៃវែង ដែលមានប្រជាពលរដ្ឋចូលរួមសរុប៦២១នាក់។
លោក ប៊ិន ជីវ័ន្ដ អភិបាលស្រុកកញ្ជ្រៀចបានឡើងធ្វើរបាយការណ៍ស្វាគមន៍ ដោយបានគូសបញ្ជាក់ថា ដោយមើលឃើញនូវការខ្វះខាតសាលារៀននោះ ឯកឧត្ដម ស្បោង សារ៉ាត់ ប្រធានក្រុមប្រឹក្សាខេត្តព្រៃវែង បានផ្ដួចផ្ដើមគំនិតកសាងសាលានេះឡើង ដើម្បីឲ្យក្មួយៗបានចូលសិក្សារៀនសូត្របានគ្រប់ៗគ្នា។
លោកអភិបាលស្រុកបានបញ្ជាក់ថា ការចំណាយក្នុងការជួសជុលដំបូលប្រក់ស័ង្កសី លាបថ្នាំជញ្ជាំង និងទ្វារបង្អួចប្រអប់ អស់ទឹកប្រាក់សរុបចំនួន១០,៨០០ដុល្លារ និងចាក់ដីទីធ្លាសាលាចំនួន២០០ឡាន អស់ទឹកប្រាក់៥,៤០០,០០០រៀល ដែលជាថវិកាឯកឧត្ដម ស្បោង សារ៉ាត។
នាឱកាសនោះដែរ ឯកឧត្ដម ស្បោង សារ៉ាត និង ឯកឧត្ដម ដាំ វុទ្ធី បានមានប្រសាសន៍សំណេះសំណាល និង ផ្ដាំផ្ញើសួរសុខទុក្ខបងប្អូនប្រជាពលរដ្ឋពីសំណាក់ថ្នាក់ដឹកនាំរាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ ដែលតែងតែយកចិត្តទុក្ខដាក់មកលើបងប្អូនប្រជាពលរដ្ឋទាំងអស់ទូទាំងប្រទេស និងណែនាំអាជ្ញាធរមូលដ្ឋានចូលរួមទប់ស្កាត់ឲ្យបានពីបញ្ហាគ្រឿងញៀន និងល្បែងស៊ីសងខុសច្បាប់គ្រប់ប្រភេទ និងរួមគ្នាបម្រើសេវាសាធារណៈជូនបងប្អូនប្រជាពលរដ្ឋឲ្យបានទាន់ពេលវេលា។
ជាចុងបញ្ចប់ ឯកឧត្ដម បាននាំយកថវិកា របស់ឯកឧត្ដមផ្ទាល់ និងសប្បុរសជនជិតឆ្ងាយសរុបទាំងអស់បានចំនួន១១,០៦០,០០០រៀល សម្រាប់ចូលរួមក្នុងកម្មពិធីបុណ្យ និងជូនយាយជី តាជី៥០ នាក់ ក្នុង១នាក់ក្រណាត់ស១ដុំ ថវិកា ១០,០០០រៀល លោកគ្រូ អ្នកគ្រូ១០នាក់ ថវិកា២០,០០០រៀល គ្រូពេទ្យ១០នាក់ ក្នុងម្នាក់ថវិកា២០,០០០រៀល សិស្សានុសិស្ស១៥០នាក់ ក្នុង១នាក់ សៀវភៅ២ក្បាល ប៊ិច១ដើម និងថវិកា៣០០០រៀលផងដែរ៕
Source: Kampuchea Thmey Daily
0 Comments