ភ្នំពេញ ៖ ស្ថានីយបូមទឹកលូ៥ គឺជាស្ថានីយបូមទឹកថ្មីមួយទៀត ក្នុងចំណោមស្ថានីយជាច្រើនទៀត ដែលរដ្ឋបាលរាជធានីភ្នំពេញបាននិងកំពុងស្ថាបនាឡើង ដើម្បីបូមទឹករំដោះការលិចលង់ជូនប្រជាពលរដ្ឋនៅក្នុងរាជធានីភ្នំពេញ ហើយមកដល់ពេលនេះ ការដ្ឋានទាំងមូលសម្រេចបាន ៩១% ហើយ នឹងអាចបូមទឹករំដោះការលិចលង់បាននៅចុងខែឧសភា២០១៩ខាងមុខនេះ។
លោកសាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា គិតត្រឹមថ្ងៃ២៦ ខែមេសា ឆ្នាំ២០១៩នេះ ការដ្ឋានសាងសង់ស្ថានីយបូមទឹកលូ៥ សម្រេចបាន៩១%ហើយ ក្នុងនោះ នៅក្នុងអំឡុងពាក់កណ្ដាលខែ ឧសភាឆ្នាំ ២០១៩ យើងនឹងអាចដំឡើង ម៉ូទ័របូមទឹករួចរាល់ ហើយនៅចុងខែឧសភាដដែលនេះ យើងក៏នឹងអាចដំណើរការបូមទឹកសាកល្បងបានហើយ។
គួរបញ្ជាក់ថា ការដ្ឋានស្ថាបនាស្ថានីយបូមទឹកលូ៥ ត្រូវបានបើកការដ្ឋានស្ថាបនា កាលថ្ងៃទី១៦ ខែមីនា ឆ្នាំ២០១៨ ក្រោមវត្តមាន លោក ឃួង ស្រេង អភិបាលរាជធានីភ្នំពេញ ដែលមានទីតាំងស្ថិតនៅចំណុចមុំបី ចំណុចប្រសព្វ៣ខណ្ឌ គឺ ខណ្ឌមានជ័យ ពោធិ៍សែនជ័យ និង ខណ្ឌដង្កោ។
ប្រឡាយនេះមានតួនាទីយ៉ាងសំខាន់ក្នុងការរំដោះទឹកជំនន់ទឹកភ្លៀងចេញពីតំបន់ជាច្រើននៅក្នុងខណ្ឌទាំង៣នេះតែម្តង។
ស្ថានីយបូមទឹកលូ៥នេះ គឺជាទីតាំងយុទ្ធសាស្ត្រមួយ ក្នុងការបូមទឹកចេញពីតំបន់ខាងកើតព្រលានយន្តហោះ តំបន់ចោមចៅ តំបន់ត្រពាំងថ្លឹង ភូមិគោកបញ្ជាន់ តំបន់ផ្សារស៊ិនជូរីផ្លាហ្សា តំបន់ថ្មគោល ផ្លូវ២០០៤ និង មួយផ្នែកទៀតពីសង្កាត់ទឹកថ្លា ខាងត្បូងមហាវិថីសហព័ន្ធរុស្ស៊ី ដែលមានទំហំផ្ទៃរងទឹកភ្លៀងរហូតដល់១០២៨ហិកតា។
គួរបញ្ជាក់ទៀតថា ស្ថានីយបូមទឹកលូ៥ សាងសង់ឡើងជាអគារថ្មី មានបណ្ដោយ១៨,៩ម៉ែត្រ ទទឹង ១០,៩ម៉ែត្រ បំពាក់បំពង់បូមទឹក៤គ្រឿង ក្នុងនោះ បំពង់មុខកាត់៨តឹក២គ្រឿង និងបំពង់មុខកាត់១ម៉ែត្រចំនួន២គ្រឿង ដែលអាចមានសមត្ថភាពបូមទឹកបាន៥ម៉ែត្រគុប ក្នុងមួយវិនាទី និង ស្មើនឹង
២៨៨០០ម៉ែត្រគុប ក្នុង១ម៉ោង៕
Source: Kampuchea Thmey Daily
0 Comments