សៀមរាប ៖ លោក Testuji GOTO ទីប្រឹក្សាជាន់ខ្ពស់ផ្នែករៀបចំផែនការ និងការអភិវឌ្ឍហេដ្ឋារចនាសម្ព័ន្ធ នៃទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន ហៅកាត់ថា JICA បានឲ្យដឹងថា ក្នុងឱកាសដែលលោក និង ក្រុមការងារ មកខេត្តសៀមរាបនាពេលនេះ គឺ សិក្សាពីគម្រោងអភិវឌ្ឍន៍ទីក្រុងវៃឆ្លាតអាស៊ាន និង ធ្វើឲ្យទីក្រុងសៀមរាបរបស់យើង ក្លាយជាទីក្រុងវៃឆ្លាត ព្រមទាំងកិច្ចសហការរវាងរដ្ឋបាលខេត្ត និង JICA ដែលគម្រោងនេះ បានបែងចែកជា២ផ្នែក គឺ ទី១. សិក្សាពីគម្រោងចាប់ពីខែកក្កដា ដល់ខែធ្នូ ឆ្នាំ២០១៩ និងទី២. ចាប់ផ្ដើមអនុវត្តគម្រោង ចាប់ពីខែមករា ដល់ខែមិថុនា ឆ្នាំ២០២០ ។
លោក Testuji GOTO បានលើកឡើងយ៉ាងដូច្នេះ ក្នុងឱកាសជួបពិភាក្សាការងារជាមួយលោក លី សំរិទ្ធ អភិបាលរងខេត្ត និងជាតំណាងដ៏ខ្ពង់ខ្ពស់ លោក ទៀ សីហា អភិបាលខេត្តសៀមរាប និង ថ្នាក់ដឹកនាំមន្ទីរ អង្គភាពនានាពាក់ព័ន្ធក្នុងខេត្ត នៅសាលប្រជុំសាលាខេត្តសៀមរាប កាលពីថ្ងៃទី២៤ ខែមេសា ឆ្នាំ២០១៩។
ជាការឆ្លើយតបលោក លី សំរិទ្ធ បានសម្តែងនូវការស្វាគមន៍ ចំពោះគម្រោងចុះសិក្សារបស់ JICA នាពេលនេះ ព្រោះគម្រោងអភិវឌ្ឍន៍នេះ នឹងធ្វើឲ្យការគ្រប់គ្រងក្នុងខេត្តសៀមរាប មានភាពងាយស្រួល តាមរយៈការប្រើប្រាស់បច្ចេកវិទ្យាទំនើប និងអភិវឌ្ឍន៍ប្រកបដោយចីរភាព ព្រមទាំងចូលរួមដោះស្រាយនូវបញ្ហាប្រឈមនានាដែលនឹងអាចកើតមានឡើង ដោយសារការរៀបចំអភិវឌ្ឍន៍ក្រុងសៀមរាបនាពេលអនាគត។
លោក លី សំរិទ្ធ មានប្រសាសន៍ទៀតថា អាជ្ញាធរខេត្តនឹងសហការយ៉ាងពេញទំហឹង ដើម្បីសម្របសម្រួលធ្វើយ៉ាងណាឲ្យគម្រោងអភិវឌ្ឍន៍នេះដំណើរការដោយរលូន និងជោគជ័យ ដើម្បីផលប្រយោជន៍ និងការអភិវឌ្ឍប្រទេសកម្ពុជា និងប្រជាជាតិសមាគមអាស៊ានទាំងមូល។
គួររំលឹកថា រាជរដ្ឋាភិបាលកម្ពុជា បានដាក់បញ្ចូលទីក្រុងចំនួន៣ រួមមាន រាជធានីភ្នំពេញ , ក្រុងបាត់ដំបង និងក្រុងសៀមរាប ទៅក្នុងគម្រោងបណ្ដាញទីក្រុងវៃឆ្លាតអាស៊ាន។
សូមបញ្ជាក់ថា ទីក្រុងឆ្លាតវៃសំដៅដល់ការប្រើប្រាស់បច្ចេកវិទ្យាទំនើបជាចម្បង និងមាននិរន្តរភាព ដើម្បីដោះស្រាយផលប៉ះពាល់ជូនប្រជាពលរដ្ឋ ដែលបង្កឡើងដោយការរីកចម្រើនដ៏ឆាប់រហ័ស នៃការធ្វើនគរូបនីយកម្ម ឬការអភិវឌ្ឍទីក្រុងដូចជា ៖ ការកកស្ទះចរាចរណ៍ , ការបំពុលខ្យល់ , ភាពក្រីក្រ , គម្លាតសង្គម , ការបែងចែកគ្នារវាងប្រជាជនទីក្រុង និងជនបទ រួមទាំងបញ្ហាសន្តិសុខ និងសុវត្ថិភាពរបស់ប្រជាពលរដ្ឋផង។
បណ្ដាញទីក្រុងឆ្លាតវៃអាស៊ាននេះ ក៏មានបំណងបង្កើនការតភ្ជាប់ក្នុងតំបន់ ដែលនឹងត្រូវបានបង្កើតឡើងដោយទីក្រុងចំនួន២៦ ពីប្រទេសនៅក្នុងតំបន់អាស៊ាន៕
Source: Kampuchea Thmey Daily
0 Comments