ប្រដាល់ ៖ នី សុភី អ្នកប្រដាល់ជើងខ្លាំងកម្ពុជា នៃក្លិបសាលវ័ន្តកីឡា ត្រូវគេផ្តល់ឪកាសអោយជួបប្រកួតជាមួយអ្នកប្រដាល់ថៃ យ៉ត ភូលួង(Yortth Phuluong) ដោយប្រកួតក្នុងទម្ងន់៦៩ គីឡូក្រាម នៅលើសង្វៀនBoostrong Fighter On Fire នាព្រឹកថ្ងៃអាទិត្យទី២៨ ខែមេសា ឆ្នាំ២០១៩នេះ។
អ្នកប្រដាល់ថៃ ដែលមកជួបប្រកួតជាមួយនី សុភី ជាជើងខ្លាំងថៃ។ តាមលោកថៃ អ៊ូ អ្នកដឹកនាំកីឡាករថៃមកប្រកួត បានប្រាប់កម្ពុជាថ្មីឲ្យដឹងថា យ៉ត ភូលួង អ្នកប្រដាល់ថៃម្នាក់នេះមិនធ្លាប់មកប្រកួតនៅស្រុកខ្មែរទេកន្លងមក។
លោក ថៃ អ៊ូ អ្នកដឹកនាំកីឡាករថៃមកប្រកួតនោះ បាននិយាយឲ្យដឹងដែរថា យ៉ត ភូលួង នេះវាយខ្លាំង។ សម្រាប់យ៉ត ភូលួងនេះ គេធ្លាប់ប្រកួតបាន៨៥លើក ក្នុងនោះវាយឈ្នះ៧០លើក ចាញ់១៥លើក មិនដែលស្មើ។
នី សុភី បើប្រៀបជាមួយប្រវត្តិប្រកួតជាមួយយ៉ត ភូលួងនេះ គេប្រកួតច្រើនជាង។ សុភី គេមានប្រវត្តិប្រកួតចំនួន១៦២លើកឯណោះ ក្នុងនោះឈ្នះ១២២លើក ចាញ់២៨លើក ស្មើ១២លើក និង ផ្ដួលគូប្រកួតឲ្យសន្លប់លើសង្វៀនច្រើននាក់ណាស់។
សុភី ជាអ្នកប្រដាល់ដែលខ្លាំងជាងគេក្នុងទម្ងន់៦៩គីឡូក្រាមនៅកម្ពុជាសព្វថ្ងៃនេះ។ គេមានចិត្តប្រដាល់ធំ ហ៊ានវាយប្ដូរជាមួយគូប្រកួតដោយមិនញញើតនោះឡើយ ដើម្បីប្តូរយកជ័យជំនះនៅពេលដែលស្ថានភាពប្រកួតរបស់គេមានសភាពចាញ់ប្រៀបគូប្រកួត គឺគេប្តូរហើយ។
ទោះជាយ៉ាងណាក្តី សម្រាប់ការជួបគ្នាលើកនេះ ក្រុមអ្នកវិភាគប្រដាល់ក្នុងស្រុកនៅតែរំពឹងថា យ៉ត ភូលួងទំនងជាមិនអាចឈ្នះនី សុភី នោះឡើយ ព្រោះនី សុភី ពេលនេះមានកម្លាំងកាយសម្បទារឹងមាំ មិនដូចពីមុននោះឡើយ ហើយគេខ្ពស់ប្រហាក់ប្រហែលនឹងយ៉ត ភូលួងដែរ។ សុភី មានកម្ពស់១,៧២ម៉ែត្រ ឯយ៉ត ភូលួង មានកម្ពស់១,៧៣ម៉ែត្រ។
ដូច្នេះ ចាំមើលជួបប្រកួតជាមួយយ៉ត ភូលួង អ្នកប្រដាល់ថៃជើងខ្លាំងលើកនេះ នី សុភី អាចយកឈ្នះបានឬអត់?។
ឆៃ សារ៉ា អ្នកប្រដាល់ជើងខ្លាំងសមាគមកីឡាក្រសួងការពារជាតិ នឹងត្រូវឡើងប្រកួតសាកកណ្តាប់ដៃជាមួយអ្នកប្រដាល់ថៃ សាវ៉ាត ភេត(Savart Phat) ក្នុងប្រភេទទម្ងន់៦៥គីឡូក្រាម។
រវាងឆៃ សារ៉ា និង សាវ៉ាត ភេត អ្នកប្រដាល់ថៃរូបនេះ មិនធ្លាប់ជួបគ្នាទេ ព្រោះអ្នកប្រដាល់ថៃរូបនេះ ទើបតែមកស្រុកខ្មែរជាលើកទី១ប៉ុណ្ណោះ។ អ្នកប្រដាល់ថៃរូបនេះ គេជាជើងចាស់ មានប្រវត្តិប្រកួតចំនួន៧៥លើក ដោយវាយឈ្នះ៦៤លើក ចាញ់១១លើក មិនដែលស្មើ។
ឆៃ សារ៉ា ជាជើងខ្លាំងរបស់កម្ពុជា នៅក្នុងប្រភេទទម្ងន់៦៥គីឡូក្រាម។ នេះជាឱកាសល្អដែលសារ៉ា ត្រូវបង្កើនកេរ្តិ៍ឈ្មោះរបស់គេ អោយកាន់តែល្បីល្បាញថែមទៀតហើយ។
ក្នុងស្ថិតិប្រកួតចំនួន៩៤លើកនោះ ឆៃ សារ៉ាឈ្នះ៧៦លើក ចាញ់ ១៦លើក ស្មើ០២លើក និងធ្លាប់ផ្តួលដៃគូអោយសន្លប់ជាច្រើននាក់។ ចាំមើល រវាងឆៃ សារ៉ា និង អ្នកប្រដាល់ថៃសាវ៉ាត ភេត តើនរណាជាអ្នកឈ្នះក្នុងការជួបគ្នានេះ?។
ចំពោះរឿម វណ្ណះ អ្នកប្រដាល់ជើងខ្លាំងកម្ពុជានៅក្លិបរាជសីហ៍ខេត្តបន្ទាយមានជ័យ នឹងប៉ះប្រកួតជាមួយអ្នកប្រដាល់បារាំងមួរីន ឆាលី (Maurin Charlie)។
រឿម វណ្ណះ និង អ្នកប្រដាល់បារាំងមួរីន ឆាលី ប្រកួតគ្នាក្នុងទម្ងន់៦៣,៥០០គីឡូក្រាម។ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក។ វណ្ណះ ប៉ះជាមួយមួរីន ឆាលី នេះ មើលទៅប្រហែលជាមិនពិបាកក្នុងការយកឈ្នះនោះឡើយ ព្រោះបើមើលពីសមត្ថភាពបច្ចេកទេស គឺវណ្ណះ លើដាច់តែម្តង ដោយគ្រាន់តែចាញ់កម្ពស់ប៉ុណ្ណោះ។ រឿម វណ្ណះ គេមានកម្ពស់១,៦៦ម៉ែត្រ ហើយមួរីន ឆាលី ១,៧០ ម៉ែត្រ។ ប៉ុន្តែយ៉ាងណា រឿម វណ្ណះ មានសង្ឃឹមឈ្នះច្រើនជាងចាញ់។
មួរីន ឆាលី នេះ មានកំណត់ត្រាប្រកួតតែចំនួន២៥លើកប៉ុណ្ណោះ គឺឈ្នះ២០លើក និង ចាញ់០៥លើក មិនដែលស្មើ។ មួរីន ឆាលី គេមានសមត្ថភាពមិនជាខ្ពស់ទេ។ បើតាមអ្នកដឹកនាំប្រតិភូកីឡាករថៃមកប្រកួតឲ្យដឹង។
ចំណែក រឿម វណ្ណះ គេមានកំណត់ត្រាប្រកួត៨១លើក ឈ្នះ៦៤លើក ចាញ់១៦លើក និងស្មើ០១លើក។ ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះក៏មិនអាចអ្នកណាមើលស្រាលអ្នកណាបានដែរ។ យ៉ាងណា រឿម វណ្ណះ គេធ្លាប់វាយជាមួយជនជាតិស្បែកស ច្រើននាក់មកហើយ គេមានបទពិសោធន៍ពេញខ្លួនហើយ៕
Source: Kampuchea Thmey Daily
0 Comments