ឧត្តរមានជ័យ ៖ មានករណីគ្រោះថ្នាក់ចរាចរណ៍មួយរវាង ម៉ូតូ និងត្រាក់ទ័រ (បើកបរស្របទិសគ្នាពីកើតទៅលិច) នៅផ្លូវជាតិលេខ៥៨ ចន្លោះបង្គោលគីឡូម៉ែត្រលេខ ១៥៧~១៥៨ បានកើតឡើងកាលពីវេលាម៉ោង១៩និង០០នាទី ថ្ងៃទី២៥ ខែមេសា ឆ្នាំ២០១៩ ស្ថិតក្នុងភូមិផ្អុង សង្កាត់កូនក្រៀល ក្រុងសំរោង ខេត្តឧត្តរមានជ័យ បណ្តាលឲ្យស្លាប់មនុស្ស១នាក់ និងរបួសធ្ងន់១នាក់។
សមត្ថកិច្ច បានឲ្យដឹងថា ជនរងគ្រោះមានឈ្មោះដូចខាងក្រោម ៖ ទី១.ឈ្មោះ ឈ្លឿន សីហា ភេទប្រុស អាយុ២២ឆ្នាំ មុខរបរកសិករ រស់នៅភូមិល្បើក ឃុំស្នួល ស្រុកក្រឡាញ់ ខេត្តសៀមរាប (អ្នកបើកបរ ស្លាប់នៅកន្លែងកើតហេតុ) មិនពាក់មួកសុវត្ថិភាព បើកបរម៉ូតូស៊ូមមើអ៊ិច ពណ៌ខៀវ ពាក់ស្លាកលេខ បន្ទាយមានជ័យ ១Q-២៣៤២។
ទី២.អ្នករួមដំណើរ ឈ្មោះ ផាក ថា ភេទប្រុស អាយុ២២ឆ្នាំ មុខរបរកសិករ រស់នៅភូមិជាមួយគ្នា របួសធ្ងន់) មិនពាក់មួកសុវត្ថិភាព។ បន្ទាប់ពីកើតហេតុ អ្នកបើកបរត្រាក់ទ័រ បានជិះត្រាក់ទ័ររត់គេចខ្លួនបាត់ មិនស្គាល់អត្តសញ្ញាណ។
ក្រោយពេលទទួលបានព័ត៌មានភ្លាមៗ កម្លាំងនគរបាលប៉ុស្តិ៍ បានសហការជាមួយកម្លាំងនគរបាលវរៈព្រំដែន៧០២ បានចុះទៅពិនិត្យកន្លែងកើតហេតុ ហៅរថយន្តសង្គ្រោះ យកជនរងគ្រោះទៅមន្ទីរពេទ្យខេត្តឧត្តរមានជ័យ និងប្រគល់សាកសព ជូនសាច់ញាតិយកទៅធ្វើបុណ្យតាមប្រពៃណី។
ចំណែកម៉ូតូ ត្រូវបានសមត្ថកិច្ចយកមករក្សាទុកបណ្ដោះអាសន្ននៅកន្លែងវរៈព្រំដែន៧០២។
សមត្ថកិច្ចបានឲ្យដឹងទៀតថា ស្ថានភាពផ្លូវត្រង់ មូលហេតុ ៖ បើកបរម៉ូតូក្នុងស្ថានភាពស្រវឹងស្រា និងល្បឿនលឿន មិនប្រុងប្រយ័ត្ន ក៏ទៅបុកត្រាក់ទ័រពីខាងក្រោយយ៉ាងពេញទំហឹងតែម្តង៕
Source: Kampuchea Thmey Daily
0 Comments