ភ្នំពេញ ៖ ក្រុមហ៊ុន ភី ប៊ី អិល ស៊ីអេនធី ខូអិលធីឌី ដែលជាក្រុមហ៊ុនផ្គត់ផ្គង់សម្ភារៈសំណង់ឈានមុខគេ កាលពីថ្ងៃទី២៤ ខែមេសា ឆ្នាំ២០១៩ បានរៀបចំកម្មវិធីសន្និសីទសារព័ត៌មាន និងប្រកាសជាផ្លូវការពីការនាំចូលផលិតផលថ្មីម៉ាក FERM មកកាន់ទីផ្សារកម្ពុជា នៅទីស្នាក់ការកណ្ដាលរបស់ក្រុមហ៊ុន ដោយមានការចូលរួមពីសំណាក់ថ្នាក់ដឹកនាំ បុគ្គលិក និងបណ្តាញសារព័ត៌មានជាច្រើនរូប។
ជាមួយនឹងបទពិសោធន៍ជាង ១០ឆ្នាំ នៅក្នុងវិស័យសំណង់ និងស្ថាបត្យកម្ម ក្រុមហ៊ុន ភី ប៊ី អិល ស៊ីអេនធី បានចូលរួមចំណែកយ៉ាងសំខាន់ក្នុងការផ្គត់ផ្គង់ផលិតផល និងសម្ភារៈសំណង់ ដែលមានគុណភាពខ្ពស់ សម្រាប់ក្រុមហ៊ុនសំណង់ល្បីៗជាច្រើននៅកម្ពុជា។
លោក ឃុត រ័ត្នពិសី អគ្គនាយកក្រុមហ៊ុន ភី ប៊ី អិល ស៊ីអេនធី បានមានប្រសាសន៍ថា ៖ "យើងខ្ញុំពិតជាសប្បាយរីករាយ និងមានមោទនភាពបំផុតដែលបានចូលរួមចំណែកក្នុងវិស័យសំណង់ និងស្ថាបត្យកម្មនៅកម្ពុជា។ ការងាររបស់យើងខ្ញុំ គឺផ្តល់នូវប្រឹក្សាយោបល់ ការណែនាំ ពីការប្រើប្រាស់ផលិតផលប្រកបដោយវិជ្ជាជីវៈ ជូនដល់អតិថិជន។ យើងខ្ញុំផ្តោតសំខាន់ទៅលើគុណភាព និងតម្លៃ ហើយរាល់ផលិតផលទាំងអស់របស់យើងខ្ញុំ គឺសុទ្ធតែបានឆ្លងកាត់ការពិសោធន៍តាមលក្ខណៈស្តង់ដារអន្តរជាតិ និងមានការបញ្ជាក់ពីគុណភាពយ៉ាងច្បាស់លាស់។”
លោកបានបន្តទៀតថា ៖ “សម្រាប់ផលិតផលម៉ាក FERM ដែលជាផលិតផលថ្មីរបស់យើង គឺជាផលិតផលរបស់ប្រទេសហូឡង់ ដែលត្រូវបានរចនា និងឆ្លងកាត់ការធ្វើតេស្តគុណភាពកម្រិតស្តង់ដារអឺរ៉ុប ជាមួយនឹងការបំពាក់នូវប្រព័ន្ធការពារសុវត្ថិភាពប្រើប្រាស់ទំនើបចុងក្រោយបង្អស់ ដែលធានាបាននូវការប្រើប្រាស់ដ៏ងាយស្រួល និងសន្សំសំចៃខ្ពស់បំផុត។”
លោក ឃុត រ័ត្នពិសី បានបន្ថែមថា ៖ “ថ្នាក់ដឹកនាំ និងក្រុមការងារទាំងអស់របស់ ភី ប៊ី អិល ស៊ីអេនធី បានប្រឹងប្រែងយ៉ាងខ្លាំង ក្នុងការបង្កើតនូវទំនុកចិត្តសម្រាប់អតិថិជនទាំងអស់។ យើងជឿជាក់ថា តាមរយៈគុណភាពខ្ពស់ នៃផលិតផលដែលបានផ្តល់ជូនដល់អតិថិជនរបស់យើង ពិតជាបានជួយសម្រួល និងផ្តល់នូវភាពងាយស្រួល ដល់ការងារទូទៅរបស់ពួកគាត់។
ក្រុមហ៊ុន ភី ប៊ី អិល ស៊ីអេនធី សន្យា និងបន្តផ្តល់ជូននូវផលិតផលគុណភាពខ្ពស់ មានសុវត្ថិភាព តម្លៃសមរម្យ តាមរយៈម៉ាកសញ្ញាផលិតផលល្បីៗ រួមជាមួយការផ្តល់នូវដំណោះស្រាយ និងវិធីសាស្ត្រល្អៗដល់អតិថិជនក្នុងការប្រើប្រាស់ផលិតផលទាំងអស់របស់យើងខ្ញុំឲ្យមានប្រសិទ្ធភាព ប្រើប្រាស់បានយូរអង្វែង និងប្រកបដោយភាពច្នៃប្រឌិត។
គួរបញ្ជាក់ថាក្រុមហ៊ុន ភី ប៊ី អិល ស៊ីអេនធី បាននាំចូលផ្តាច់មុខនូវផលិផលបរិក្ខាសំណង់ និងសម្ភារៈអគ្គិសនីដែលមានគុណភាពកម្រិតស្តង់ដារជាច្រើនប្រភេទដូចជា ផលិតផលការពារជម្រាបទឹក ម្សៅទប់ដីសម្រាប់ខួងគ្រឹះ ផលិតផលធ្វើតេស្តគុណភាពបេតុង គ្រឿងសោសុវត្ថិភាព សម្ភារៈបន្ទប់ទឹក និងម៉ាកសញ្ញាល្បីៗរួមមានផលិតផល FERM ជាដើម៕
Source: Kampuchea Thmey Daily
0 Comments