ភ្នំពេញ ៖ ដោយសារការអត់ទ្រាំលែង បាននឹងបុគ្គលមួយចំនួន ដែលមានចេតនាមិនល្អ តែងតែព្យាយាមតាមឈ្នានីសរិះគន់បំបាក់ទឹកចិត្តគ្រួសារខ្លួននោះ ពេលនេះស្វាមីរបស់តារាស្រីពហុជំនាញអ្នកនាង ខាត់ សុឃីម គឺលោក ផាណូ បានចេញមុខផ្ទុះប្រតិកម្មឆ្លើយតប និងពន្លះយ៉ាងចាស់ដៃលើបុគ្គលទាំងនោះ។
ជាប្រតិកម្មឆ្លើយតបចំពោះការរិះគន់នេះ លោក ផាណូ ដែលជាស្វាមីរបស់អ្នកនាង ខាត់ សុឃីម បានលើកឡើង ដោយកំហឹងថា ខ្ញុំចូលមើលរាល់ការចូលCommentមួយចំនួន ដែលពួកអ្នកឯងបានរិះគន់មកគ្រួសារខ្ញុំគឺកំពុងបង្ហាញពីចេតនាដែលមើលងាយខ្ញុំស្រាប់។ ទង្វើរបស់អ្នកឯង បានធ្វើខុសគឺវាខុសផ្ទុយនឹងអ្វីដែលរិះគន់គេ….សូមបើកការពិចារណា ហើយមុននឹងនិយាយអ្វីត្រូវមើលពីកំហុសខ្លួនឯងផង អ្នកឯងមិនមែនអាទិទេពឬទេវតាទេ។
លោកផាណូ បាននិយាយទៀតថា ពិចារណាឡើងវិញផង បើខ្លួនឯងធ្វើមិនបានកុំរិះគន់គេ ហើយបើមើលសព្វគ្រប់ទៅខ្លួនឯង (អ្នករិះគន់)ហ្នឹងចរិតចង់អន់ជាងគេផង ដូច្នេះមុននឹងរិះគន់ត្រូវគិតថាខ្លួនឯងធ្វើបានដូចគេឬអត់?។ ម្យ៉ាងទៀតមានករណីមួយទៀត ដែលនិយាយថា ភរិយាខ្ញុំធ្វើបែបនេះដើម្បីឲ្យខ្ញុំបានល្បី…..សួរថាខ្ញុំល្បីដោយវិធីណាបើខ្ញុំឈប់ពីសិល្បៈហើយនោះ ខ្ញុំចង់ល្បីមែន?និយាយមកដូចជាមិនត្រូវ ហើយមានអ្នកខ្លះទៀតចាំមើល និងនិយាយថា ស្នេហាពួកខ្ញុំបានតែមួយឆាវទេ តែបន្តិចទៀតទៅលែងក្បាលគ្នាចោលហើយ ចុះមានមើលទេឥឡូវគិតមកទល់ពេលនេះខ្ញុំស្រលាញ់គ្នាជិត១០ឆ្នាំហើយថែមទាំងមានកូនទៀតផង។
ស្វាមីរបស់អ្នកនាង ខាត់ សុឃីម បានបន្ថែមថា សួរថានៅចាំមើលខ្ញុំដល់ពេលណាទៀតជួយប្រាប់ផងហើយអ្នកដែលហ៊ាននិយាយមើលងាយចំពោះខ្ញុំដែលមិនដឹងពីការងារ ឬអ្វីដែលខ្ញុំកំពុងធ្វើសព្វថ្ងៃនេះ បើឆ្ងល់ណាស់អាចទូរស័ព្ទមកសួរខ្ញុំ ខ្ញុំបើកពេលវេលារង់ចាំស្វាគមន៍ឆ្លើយសំនួរអ្នកឯង បើចិត្តជាកូនប្រុសជួបខ្ញុំ ហើយបើអ្នកឯងមិនមែនជាចិត្តកូនប្រុសទេពោលគឺត្រឹមតែជាមនុស្សកំសាកនោះគឺជារឿងរបស់អ្នកឯង។ ប៉ុន្តែបើអ្នកឯងត្រឹមតែCommentនិយាយដៀលប៉ុណ្ណឹងហើយគួរតែជួបខ្ញុំព្រោះខ្ញុំជាបុគ្គលម្នាក់ ដែលហ៊ានទទួលខុសត្រូវ និងហេតុផលដែលអ្នកបានរិះគន់មកលើខ្ញុំបើសិនជាការពិតតែបើមិនមែនជាការពិតអ្នកឯងត្រូវចេញមុខដោះស្រាយ និងនិយាយជាមួយខ្ញុំមក វាជិត១០ឆ្នាំហើយនៅតែរឿងដដែលៗបែបនេះ។
សូមបញ្ជាក់ថា ការចេញមុខបញ្ចេញប្រតិកម្មរបស់ស្វាមីអ្នកនាង ខាត់ សុឃីម នាពេលនេះ បានធ្វើឡើងស្របពេលដែលថ្មីៗនេះមានសារព័ត៌មានក្នុងស្រុកមួយចំនួនបានធ្វើការសរសេរចុះផ្សាយលើកសរសើរលើករណីតារាស្រីអ្នកនាង ខាត់ សុឃីម ទទួលបានកាដូរពិសេសពីស្វាមីចំនួន៣ទន្ទឹមពេលតែមួយជាមួយគ្នា។ ប៉ុន្តែផ្ទុយទៅវិញបែរជាមានបុគ្គលមួយចំនួនចូលផ្ញើសាររិះគន់ថា តារាស្រីរូបនេះអួតពេកហើយធ្វើនេះក្នុងចេតនាចង់លើតម្កើងកិត្តិយសឬឲ្យប្តីបានល្បីឈ្មោះ៕
Source: Kampuchea Thmey Daily
0 Comments