រតនគិរី ៖ យុវជនម្នាក់ បានប្រើអំពើហិង្សាដោយចេតនា យកដាវសាម៉ូរៃកាប់ទៅលើជនរងគ្រោះ២នាក់ បណ្តាលឲ្យរងរបួសធ្ងន់ស្រាល ត្រូវបានសមត្ថកិច្ចឃាត់ខ្លួន។
ករណីបង្កហិង្សានេះ បានកើតឡើងកាលពីវេលាម៉ោង១០និង៣០នាទីយប់ ថ្ងៃព្រហស្បតិ៍ ៦រោច ខែចេត្រ ឆ្នាំកុរ សំរឹទ្ធិស័ក ព.ស២៥៦២ ត្រូវនឹងថ្ងៃទី២៥ ខែមេសា ឆ្នាំ២០១៩ កន្លងទៅ ស្ថិតនៅក្នុងភូមិឃួន ឃុំកោះពាក្យ ស្រុកវើនសៃ ខេត្តរតនគិរី។
មន្ត្រីនគរបាលស្រុកវើនសៃបានឲ្យដឹងថា ជនរងគ្រោះ២នាក់ ១-ឈ្មោះ ម ធិន ភេទប្រុស អាយុ៣៧ឆ្នាំ ជនជាតិគ្រឹង មុខរបរកសិករ បានរងរបួសធ្ងន់ត្រង់ក្បាល។
២-ជនរងគ្រោះឈ្មោះ ឃូច ផល ភេទប្រុស អាយុ៣៣ឆ្នាំ ជនជាតិគ្រឹង មុខរបរកសិករ រងរបួសស្រាលត្រង់ដៃខាងឆ្វេង។ អ្នកទាំង២នាក់ មានទីលំនៅភូមិ/ឃុំកើតហេតុខាងលើ។
រីឯជនសង្ស័យ ឈ្មោះ បូរ៉ា កាយ៉ែ ភេទប្រុស អាយុ១៦ឆ្នាំ ជនជាតិគ្រឹង មានទីលំនៅភូមិផាក់ណាម ឃុំកោះពាក្យ ស្រុកវើនសៃ ខេត្តរតនគិរី។
បច្ចុប្បន្ន សមត្ថកិច្ច បានឃាត់ខ្លួននៅអធិការដ្ឋាននគរបាលស្រុកវើនសៃ ដើម្បីបំពេញបែបបទបញ្ជូនទៅអយ្យការអមសាលាដំបូងខេត្តចាត់ការតាមផ្លូវច្បាប់៕
Source: Kampuchea Thmey Daily
0 Comments