ភ្នំពេញ ៖ លោក Lai He លេខាបក្សទីក្រុង Fushun ខេត្តលាវនីង នៃសាធារណរដ្ឋប្រជាមានិតចិន បានថ្លែងថា គណៈប្រតិភូរបស់លោក មកកាន់កម្ពុជានៅពេលនេះគឺដើម្បី ស្វែងយល់ពីសក្តានុពលសេដ្ឋកិច្ច និងពាណិជ្ជកម្ម និងរកឱកាសវិនិយោគ នៅកម្ពុជា។
ការថ្លែងរបស់ លោក Lai He បានធ្វើឡើង នៅក្នុងជំនួបជា លោក សំ សិរីរតន៍ រដ្ឋលេខាធិការ និងជាតំណាងរបស់លោក ម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម កាលពីរសៀលថ្ងៃទី២៥ ខែមេសា ឆ្នាំ២០១៩ នៅទីស្តីការក្រសួង។ លោក Lai He លេខាបក្សទីក្រុង Fushun និងជាប្រធានគណៈប្រតិភូ បានគូសបញ្ជាក់ពីសក្តានុពលសេដ្ឋកិច្ច ពាណិជ្ជកម្ម និងឱកាសនានាពាក់ព័ន្ធនឹងវិស័យពាណិជ្ជកម្មនៅកម្ពុជា។ ទន្ទឹមនឹងនេះ លោក Mr. Lai He ក៏បានបង្ហាញពីស្ថានភាពទូទៅ និងសក្តានុពលសេដ្ឋកិច្ចនៃទីក្រុង Fushun ដែលមានការអភិវឌ្ឍឈានមុខគេលើវិស័យឧស្សាហកម្មធន់ធ្ងន់ និងជាទីក្រុងប្រភពរ៉ែធ្យូងថ្មនៃប្រទេសចិន។
លោក Lai He បានមានប្រសាសន៍បន្តថា លោកគាំទ្រ និងជំរុញ ឲ្យមានកិច្ចសហប្រតិបត្តិការពាណិជ្ជកម្មរវាងទីក្រុង Fushun និងកម្ពុជា តាមរយៈការរៀបចំពិព័រណ៍ ឬវេទិកាជំរុញពាណិជ្ជកម្មទ្វេភាគី ដែលជាឱកាសឲ្យវិនិយោគិនទាំងពីរប្រទេស អាចស្វែងយល់ពីផលិតផលសក្តានុពល និងបរិយាកាសពាណិជ្ជកម្មនៃប្រទេសទាំងពីរបន្ថែមទៀត។
នៅក្នុងឱកាសនោះដែរ លោកសំ សិរីរតន៍ បានជម្រាបជូនគណៈប្រតិភូចិន អំពីសក្តានុពល និងកាលានុវត្តន៍ភាពវិនិយោគ ដោយគូសបញ្ជាក់ថា កម្ពុជា ជាប្រទេសមានសន្តិសុខ ស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច ព្រមជាមួយទីតាំងយុទ្ធសាស្ត្រតំបន់អាស៊ាន ដែលបាននឹងកំពុងក្លាយជាតំបន់រោងចក្រនៅអាស៊ី និងចំកណ្តាលនៃដងទន្លេមេគង្គ។ ជាមួយគ្នានេះ កម្លាំងពលកម្មមានភាពសំបូរបែប និងវ័យក្មេង ដែលមានអាយុត្រឹម៣៥ឆ្នាំ ចុះក្រោម មាន ៧០% នៃប្រជាជនសរុប។ ទំនិញផលិតនៅកម្ពុជា ផ្គត់ផ្គង់សម្រាប់ទីផ្សារអាស៊ាន និងទីផ្សារក្នុងតំបន់ សរុបប្រមាណជាង ៤០% នៃចំនួនប្រជាជនពិភពលោក។
លោករដ្ឋលេខាធិការ បានបញ្ជាក់ថា កម្ពុជាបើកចំហចំពោះការវិនិយោគបរទេស ដោយផ្តល់ការលើកទឹកចិត្ត និងធានាផ្នែកវិនិយោគិន ដូចជា ការលើកលែងពន្ធលើប្រាក់ចំណេញរយៈពេល ០៩ឆ្នាំ ការលើកលែងពន្ធទាំងស្រុងចំពោះនាំចូលសម្ភារៈបរិក្ខារ និងវត្ថុធាតុដើមនៃផលិតកម្ម ព្រមទាំងវិនិយោគិនបរទេសអាចប្រើមូលធនបរទេសសុទ្ធ១០០% និងមិនមានការត្រួតត្រាលើតម្លៃផលិតផល និងសេវា និងអត្រាប្តូរប្រាក់នោះឡើយ៕
Source: Kampuchea Thmey Daily
0 Comments