ក្រុមបាល់ទាត់អគ្គីសនីកម្ពុជា ត្រូវប៉ះក្រុមព្រះខ័នរាជស្វាយរៀង ហើយក្រុមខេត្តកំពង់ចាម ជួបក្រុមយុវជនសាលាបាល់ទាត់ជាតិបាទីនិងក្រុមក្រសួងការពារជាតិ (ទ័ព) ទទួលក្រុមបឹងកេតអែហ្វស៊ី នៅក្នុងសប្ដាហ៍ទី៥ប្រចាំពានរង្វាន់លីគកំពូលកម្ពុជា (Metfone Cambodian League 2019) ដែលធ្វើឡើងនៅល្ងាចថ្ងៃសៅរ៍ ទី២៧ ខែមេសា ឆ្នាំ២០១៩។
*អគ្គីសនីកម្ពុជា ប៉ះព្រះខ័នរាជស្វាយរៀង
ក្រុមបាល់ទាត់អគ្គីសនីកម្ពុជា ដែលមានមូលដ្ឋាននៅទឹកដីទួលសង្កែ ត្រូវបើកទ្វារកីឡដ្ឋានអគ្គីសនីកម្ពុជា នៅវេលាម៉ោង៣និង៣០នាទីរសៀលទទួលក្រុមកំពូលតារាងព្រះខ័នរាជស្វាយរៀង។ បើងាកទៅមើលប្រវត្តិប៉ះគ្នាចំនួន៦លើកកន្លងមកក្រុមព្រះខ័នរាជស្វាយរៀង ធ្លាប់បានយកឈ្នះចំនួន៥លើកនិងធ្លាប់ស្មើគ្នា១លើក។
ចំពោះក្រុមអគ្គីសនីកម្ពុជា ដែលដឹកនាំដោយលោក ប្រាក់ វុទ្ធី មិនមានប្រើប្រាស់កីឡាករបរទេសនោះទេតាំងពីក្លិបឡើងមកលេងលីគកំពូលកម្ពុជាពីឆ្នាំ២០១៧មក។ យ៉ាងណាក្តីក្រុមនេះធ្លាប់បានយកឈ្នះលើក្រុមបឹងកេត លើទឹកដីរបស់ខ្លួនផងដែរ។ ចំណែកក្រុមព្រះខ័នរាជស្វាយរៀង វិញជាក្រុមដែលឈរកំពូលតារាងក្រោយមិនទាន់ស្គាល់ពាក្យថា បរាជ័យ ស្របពេលលោកConor Nestor ដែលជាគ្រូបង្វឹកបន្តលើកទឹកចិត្តកូនក្រុមឲ្យធ្វើការលើទីលានបានល្អរក្សាកៅអីឲ្យបានគង់ជាបន្ត។
*ខេត្តកំពង់ចាម ប៉ះយុវជនសាលាបាល់ទាត់ជាតិបាទី
ក្រុមខេត្តកំពង់ចាម ត្រូវប៉ះក្រុមយុវជនសាលាបាល់ទាត់ជាតិបាទី នៅវេលាម៉ោង៣និង៣០នាទីរសៀល លើទីលានវិទ្យាល័យប៊ុនរ៉ានីហ៊ុនសែន មេមត់។ ក្រុមទាំង២មិនធ្លាប់មានប្រវត្តិប៉ះគ្នាពីមុនមកនោះទេ ព្រោះជាក្រុមទើបបានឡើងមកលេងក្នុងពានរង្វាន់លីគកំពូលកម្ពុជា លើកដំបូងដូចគ្នានៅឆ្នាំ២០១៩ នេះ។
ខេត្តកំពង់ចាម ឆ្លងកាត់តែ៤ប្រកួតដើមរដូវកាលតែរបូតគ្រាប់បាល់រហូតដល់២៩គ្រាប់ ស្របពេលលោក ថុល កុសល នៅមានឆន្ទៈបន្តដឹកនាំកូនក្រុមរក្សាកៅអីឲ្យបានក្នុងលីគកំពូលកម្ពុជាជាបន្ត។ កីឡាករ សារី តៃម៉ូ ជាខ្សែប្រយុទ្ធតែម្នាក់គត់ដែលរកគ្រាប់បាល់បាន១គ្រាប់ឲ្យក្រុម ក្នុងប្រកួតកន្លងមក។ ចំណែកក្រុមយុវជនសាលាបាល់ទាត់ជាតិបាទី ដែលកំពុងដឹកនាំដោយលោកKoji Gyotoku គ្រូបង្វឹកជនជាតិជប៉ុន ខណៈពេលនេះក្រុមនេះកំពុងតែនៅបាតតារាងក្រោយចាញ់៤ប្រកួតជាប់ៗគ្នា។
*ក្រសួងការពារជាតិ ប៉ះបឹងកេតអែហ្វស៊ី
ក្រុមក្រសួងការពារជាតិ ត្រូវប៉ះក្រុមបឹងកេតអែហ្វស៊ី នៅវេលាម៉ោង៦ល្ងាចលើទីលានកីឡដ្ឋានកងយោធពលខេមរភូមិន្ទ (ស្តាតចាស់) ស្របពេលប្រវត្តិប៉ះគ្នា៥លើកចុងក្រោយបឹងកេត ធ្លាប់បានយកឈ្នះ៣លើកហើយក្រសួងការពារជាតិធ្លាប់ឈ្នះបាន១លើកនិងធ្លាប់ស្មើគ្នា១លើក។
ក្នុងនាមជាម្ចាស់ផ្ទះលោក ភា សុភត្រា គ្រូបង្វឹករបស់ក្រុមក្រសួងការពារជាតិ កំពុងតែរៀបចំកូនក្រុមឲ្យបានល្អដើម្បីប៉ះក្រុមជើងឯក៣សម័យកាលបឹងកេត។ ខ្សែប្រយុទ្ធជនជាតិDzarma Bata កំពុងតែឈរឈ្មោះក្នុងបញ្ជីកីឡាកររកគ្រាប់បាល់ចូលទីគូប្រកួតបានច្រើនជាងគេ ក្រោយបំប៉ោងសំណាញ់ទីឲ្យក្រសួងការពារជាតិ បានរហូតដល់៩គ្រាប់ម្នាក់ឯង។ ចំណែកក្រុមបឹងកេត ដែលដឹកនាំដោយលោក ហៅ សុជាតិ វិញកំពុងតែត្រូវការ៣ពិន្ទុបន្ថែមទៀត ក្រោយចាប់ផ្តើមរដូវកាលថ្មីមិនបានល្អ។
ចំណែក៤គូផ្សេងទៀតនឹងត្រូវប្រកួតនៅថ្ងៃអាទិត្យ ទី២៨ ខែមេសា ឆ្នាំ២០១៩ ដោយក្រុមអង្គរថាយហ្គឺរ ទទួលវិសាខា នៅវេលាម៉ោង៣និង៣០នាទីរសៀលលើទីលានកីឡដ្ឋានខេត្តសៀមរាប ហើយក្រុមអគ្គស្នងការដ្ឋាននគរបាលជាតិ ជួបក្រុមសូលទីឡូអង្គរ នៅម៉ោងដំណាលគ្នាលើទីលានកីឡដ្ឋានអគ្គីសនីកម្ពុជា ស្របពេលក្រុមគីរីវង់សុខសែនជ័យ ប៉ះក្រុមណាហ្គាវើល នៅវេលាម៉ោងដូចគ្នាដែរលើទីលានគរុកោសល្យខេត្តតាកែវ និងក្រុមភ្នំពេញក្រោន ទទួលក្រុមអាស៊ីអឺរ៉ុប នៅវេលាម៉ោង៦ល្ងាចលើទីលានកីឡដ្ឋាន Smart RSN Stadium៕
Source: Kampuchea Thmey Daily
0 Comments