យ៉ាងហោចណាស់មានក្រុមយុវជនថ្នាលរបស់ក្លិបបាល់ទាត់ចំនួន៥សមាជិកក្នុងពានរង្វាន់លីគកំពូលកម្ពុជា (Metfone Cambodian League) បានចូលរួមប្រកួតបាល់ទាត់មហាជនពានរង្វាន់ KMH Cup U18 រដូវកាល២០១៩ ដែលរៀបចំឡើងដោយទីលានបាល់ទាត់ឯកជនមួយក្នុងរាជធានីភ្នំពេញ ខណៈក្រុមយុវជនបឹងកេត កក់កៅអីឡើងទៅលេងវគ្គផ្តាច់ព្រ័ត្រមុនគេ។
ពានរង្វាន់ KMH Cup U18 នេះមានក្រុមចូលរួមចំនួន៧ក្រុម ដោយក្នុងនោះមានក្រុមយុវជនព្រះខ័នរាជស្វាយរៀង ដែលជាក្រុមការពារតំណែងជើងឯក KMH Cup U18 2018, ក្រុមយុវជនភ្នំពេញក្រោន, ក្រុមយុវជនក្លិបវិសាខា,ក្រុមយុវជនក្លិបបឹងកេត និងក្រុមយុវជណក្លិបអគ្គិសនីកម្ពុជា ពីលើក្រុមពាក់កណ្ដាលអាជីព Football Coffee និង KMH Academy U18។
ក្រុមបាល់ទាត់យុវជនបឹងកេត ទទួលបានកៅអីលំដាប់ទី១ ក្រោយបញ្ចប់វគ្គវិលជុំសន្សំពិន្ទុ ពានរង្វាន់ KMH Cup U18 រដូវកាល២០១៩ កាលថ្ងៃសៅរ៍ ទី២០ ខែមេសា។ក្រុមដឹកនាំដោយគ្រូបង្គោល ឈុន សុធារ័ត្ន បានយកឈ្នះក្រុម KMH Academy U18 ដោយលទ្ធផល ៦ទល់នឹង០ ទទួលបាន២៥ពិន្ទុពីការប្រកួត១២លើក។ ចំណែកវិសាខា U17 បានឈរនៅលំដាប់ទី២ បន្ទាប់ពីឈ្នះយុវជនព្រះខ័នរាជស្វាយរៀង ០ទល់នឹង៣។
ដូច្នេះ យុវជនបឹងកេត ទទួលបានកៅអីផ្ដាច់ព្រ័ត្រ ដោយស្វ័យប្រវត្តិ ខណៈយុវជនភ្នំពេញក្រោន ត្រូវប៉ះក្រុមការពារជើងឯកព្រះខ័នរាជស្វាយរៀង ដើម្បីយកកៅអីពាក់កណ្ដាលផ្ដាច់ព្រ័ត្រប៉ះវិសាខា។ ក្រុមឈ្នះវគ្គពាក់កណ្ដាលផ្ដាច់ព្រ័ត្រ ត្រូវជួបជាមួយបឹងកេតនៅវគ្គផ្ដាច់ព្រ័ត្រ។ចំពោះប្រកួតរវាងក្រុមលេខ៣ ភ្នំពេញក្រោន និងក្រុមលេខ៤ ព្រះខ័នរាជស្វាយរៀង នឹងធ្វើឡើងនៅថ្ងៃទី០៤ និងថ្ងៃទី១១ ខែឧសភា។
លោក ផុន សិរីវឌ្ឍនៈ ប្រធានគ្រប់គ្រងការប្រកួតបាល់ទាត់ព្រឹត្តិការណ៍ KMH យល់ឃើញថា «ខ្ញុំគិតថា ឆ្នាំនេះជាឆ្នាំដ៏អស្ចារ្យ មានការប្រកួតប្រជែងខ្លាំង ដោយសារមានការចូលរួមពីថ្នាលក្លិបអាជីពធំៗចំនួន៥។ វាពិតជាខុសប្លែកពីឆ្នាំមុន។ ការប្រកួតប្រជែងលើទីលានកាន់តែខ្លាំង នឹងទាក់ទាញអ្នកទស្សនាកាន់តែច្រើនទាំងនៅទីលានផ្ទាល់ និងលើបណ្ដាញសង្គមផងដែរ។ ទោះបីឆ្នាំហ្នឹង ថយមកសល់៧ក្រុមមែន តែការប្រកួតប្រជែងខ្ពស់ជាងមុន៕
Source: Kampuchea Thmey Daily
0 Comments