ប្រដាល់ ៖ ព្រឹត្តិការណ៍TV5 Boxing Knock-Out Serie by K-Cement កាលពីយប់ថ្ងៃទី២០ ខែមេសា ឆ្នាំ២០១៩ គេបានរកឃើញហើយ អ្នកឈ្នះទី១៣ និងទី១៤ សម្រាប់ឡើងទៅប្រកួតបន្តនៅវគ្គជម្រុះជុំទី២ទៀត នោះ គឺ សេក សារ៉ាន់ ក្លិបអង្គរមានជ័យខេត្តសៀមរាប និង លី តក់ ក្លិបប្រកួតគុនខ្មែរ បន្ទាប់ពីពួកគេទាំងពីរបានឆ្លងផុតវគ្គជម្រុះជុំទី១នោះ។
សេក សារ៉ាន ក្លិបអង្គរមានជ័យខេត្តសៀមរាប បានយកឈ្នះពិន្ទុអ្នកប្រដាល់ ម៉ៅ ប៉ោក មកពីក្លិបខេត្តរាជសីហ៍ខេត្តរតនគីរី បន្ទាប់ពីប្រកួតគ្នាពេញទាំង៣ទឹកនោះ។ សូមបញ្ជាក់ថា សម្រាប់ការប្រកួតពាននេះប្រកួតតែត្រឹម៣ទឹកប៉ុណ្ណោះ។
ជាមួយនឹងជ័យជំនះនេះ បានធ្វើឲ្យ សេក សារ៉ាន់ មានកៅអីសម្រាប់ឡើងទៅប្រកួតជម្រុះបន្តនៅជុំទី២ទៀត ក្នុងខណៈដែល ម៉ៅ ប៉ោក ដែលខំស្កាត់មកពីខេត្តរតនគីរីនោះ ត្រូវខ្ទាតចេញពីការប្រកួតនៅជុំទី១នេះ។
ប្រកួតក្នុងព្រឹត្តិការណ៍នេះដែរ អ្នកប្រដាល់ខ្នើយ ណាន ក្លិបមោងឫស្សីមរតគុនខ្មែរ ត្រូវអ្នកប្រដាល់ លី តក់ មកពីក្លិបតាព្រហ្មមានជ័យប្រើកណ្ដាប់ដៃផ្ដួលឲ្យក្រោកលែងរួចមុនស្នូរជួងបញ្ចប់ទឹកទី៣។
អ្នកប្រដាល់ទាំង២រូបនេះ ចាប់ផ្ដើមប្ដូរកណ្ដាប់ដៃគ្នាតាំងពីដើមទឹកទី១មកម្ល៉េះ។ នៅទឹកទី២ខ្នើយ ណាន ត្រូវអាជ្ញាកណ្ដាលរាប់៨ បន្ទាប់ពីត្រូវនឹងកណ្ដាប់ដៃធ្ងន់ៗរបស់លី តក់ នោះ។ ទោះបីខ្នើយ ណាន ខិតខំព្យាយាមបន្តការប្រកួតនៅទឹកទី៣បន្តទៀតក៏ពិតមែន តែទីបំផុតកណ្ដាប់ដៃរបស់ លី តក់ មិនអនុញ្ញាតឲ្យអ្នកប្រដាល់មកពីក្លិបមោងឫស្សីមរតកគុនខ្មែររូបនេះឆ្លងផុតទឹកទី៣ឡើយ។
ខ្នើយ ណាន ខ្ទាតចេញពីការប្រកួតត្រឹមនេះ ក្នុងខណៈដែលលី តក់ត្រៀមខ្លួនប្រកួតបន្តនៅជុំទី២ទៀត។ សូមបញ្ជាក់ថាពេលនេះក្នុងចំណោមអ្នកប្រដាល់៣២រូបចូលរួមប្រកួតជម្រុះនៅជុំទី១មាន១៤រូបហើយខ្ទាតចេញពីការប្រកួត ហើយក៏មានអ្នកប្រដាល់១៤រូបដែរដែលរង់ចាំប្រកួតជម្រុះនៅជុំទី២បន្តទៀត។
ចំពោះការប្រកួតជាមិត្តភាពជាមួយអ្នកប្រដាល់ថៃវិញនោះ អ្នកប្រដាល់កម្ពុជាសេង ស្រឿនត្រូវអ្នកប្រដាល់ថៃ លំ ឡេង(Loom Leng) វាយមួយកែងស្ដាំចំសៀតផ្កា បណ្ដាលឲ្យសន្លប់មុនស្នូរជួងបញ្ចប់ទឹកទី៤។
ទោះពីទឹកទី១ និងទឹកទី២ការប្រកួតហាក់ដូចជាប្រហាក់ប្រហែលគ្នាក៏ពិតមែន តែចាប់ពីទឹកទី៣ ទៅលំ ឡេង បានកៀបសង្កត់យ៉ាងខ្លាំងមិនតែប៉ុណ្ណោះសេង ស្រឿន ដួលលើសង្វៀនជាញឹកញាប់។ មកដល់ទឹកទី៤ លំ ឡេងបញ្ចេញមួយកែងធ្វើឲ្យសេង ស្រឿនសន្លប់ក្រោកលែងរួចតែម្ដង។
ចំណែកការប្រកួតរវាងអ្នកប្រដាល់រួមជាតិវិញនោះ ឌឹម សារិទ្ធ សមាគមប្រដាល់ក្រសួងការពារជាតិបានប្រើកណ្ដាប់ដៃផ្ដួលអ្នកប្រដាល់ យ៉ន ពិសី ក្លិបសាលវ័ន្ដកីឡាឲ្យសន្លប់នៅទឹកទី៣៕
Source: Kampuchea Thmey Daily
0 Comments