លោក​ទេស​រដ្ឋមន្ត្រី​ចម ប្រសិទ្ធ​ ៖ UN-ESCAP​បាន​ជំរុញ​លើក​កំពស់​សហគ្រិន​ស្ត្រី​និង​ខ្សែសង្វាក់​តម្លៃ​ទីផ្សារ

ភ្នំពេញ ៖ លោក​កិត្តិ​សេដ្ឋា​បណ្ឌិត​ចម ប្រសិទ្ធ បាន​សម្ដែង​ការ​អរគុណ​ចំពោះ​អគ្គលេខាធិការ​រង​អង្គការសហប្រជាជាតិ​UN -ESCAP​ដែល​បាន​ជួយ​ជំរុញ​លើក​កំពស់​សហគ្រិន ស្ត្រី​បច្ចេកទេស និង ជំរុញ​ខ្សែ​សង្វាក់​តម្លៃ​ទីផ្សារ​នៅ​កម្ពុជា​។​ នេះ​ជាការ​លើកឡើង​ក្នុងជំនួប​ពិភាក្សា​ការងារ​របស់លោក​កិត្តិ​សេដ្ឋា​បណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួង​ឧស្សាហកម្ម និង​សិប្បកម្ម​និង​លោកជំទាវ​បណ្ឌិត​Armida Salsiah Alisjahbana អគ្គលេខាធិការ​រង​អង្គការសហប្រជាជាតិ និង​ជា​ប្រធាន​គណៈកម្មការ​សេដ្ឋកិច្ច និង​សង្គមកិច្ច​សម្រាប់​អា​ស៊ី និង​ប៉ា​ស៊ី​ហ្វិ​ច នៃ​អង្គការ សហប្រជាជាតិ ហៅ​កាត់​ថា UN-ESCAP នា​ទីស្តីការក្រសួង នៅ​រសៀល​ថ្ងៃ​ម្សិល​មិញ​នេះ បាន​ផ្តោត​ការ​យក​ចិត្តទុកដាក់​ជា​សំខាន់ ទៅលើ​ការ​ពង្រឹង​កិច្ចសហប្រតិបត្តិការ​រ​វាង ក្រសួង និង UN-ESCAP ការ​លើក​កំពស់​វិស័យ​សហគ្រាស​ធុន​តូច និង​មធ្យម ជាពិសេស​យកចិត្តទុកដាក់ ទៅលើ​សហគ្រិន​ជា​ស្ត្រី។



ក្នុង​ប្រសាសន៍​សម្តែង​ការ​ស្វាគមន៍ លោក កិត្តិ​សេដ្ឋា​បណ្ឌិត ទេសរដ្ឋមន្ត្រី ចម ប្រសិទ្ធ បាន​សម្តែង​នូវ​អំណរគុណ​និង​វាយតម្លៃ​ខ្ពស់​តាមរយៈ​កិច្ច​សហប្រតិបត្តិការ​រ​វាង​ក្រសួង​ឧស្សាហកម្ម និង​សិប្បកម្ម ជាមួយ UN-ESCAP ដូចជា​គម្រោង ការលើក​កំពស់​ការ​ទទួលបាន​ហិរញ្ញវត្ថុ​សម្រាប់​ពង្រឹង​សហគ្រាស​ធុន​តូច និង​មធ្យម ដែល​គម្រោង​នេះ​បានចាប់ផ្តើម កាលពី​ម្សិលមិញ និង​គម្រោង​មួយទៀត ហៅថា​គម្រោង​ជំរុញ​សហគ្រិន​ភាពជា​ស្ត្រី ដែល នឹង​អនុវត្ត​នា​ពេល​ខាងមុខ មាន​គោលបំណង​លើក​កំពស់​សហគ្រិន​ជា​ស្ត្រី ពង្រឹងសមត្ថភាព​គ្រប់គ្រង និង​បច្ចេកទេស និង​ជំរុញ​ខ្សែ​សង្វាក់​តម្លៃ​និង​ទីផ្សារ។

លោក​កិត្តិ​សេដ្ឋា​បណ្ឌិត បានបញ្ជាក់​បន្ថែម​ថា នៅ​កម្ពុជា​បច្ចុប្បន្ន មាន​សហគ្រាស​ធុន​តូច និង​មធ្យម​ជាង​៥​សែន​មូលដ្ឋាន និង​ភាគច្រើន​ម្ចាស់​គ្រប់គ្រង​ជា​ស្ត្រី។ ប៉ុន្តែ​ការ​មក​ចុះបញ្ជី​ទទួលស្គាល់​តាមផ្លូវ​ច្បាប់​បាន​ប្រមាណ​ជាង​៥% ប៉ុណ្ណោះ។ ដូច្នេះ​ចំពោះមុខ ក្រសួង​កំពុង​យកចិត្តទុកដាក់ ទាញ​ពួកគេ​ឲ្យ​ស្ថិត​នៅ​ក្រោម​ឆ័ត្រ​តែមួយ ដាក់ចេញ​នូវ​គោលនយោបាយ​លើកទឹកចិត្ត និង​ការអប់រំ​បណ្តុះបណ្តាល​ជាដើម ដែល​ការងារ​នេះ ក្រសួង​ត្រូវការ​ជំនួយ​ពី​ដៃគូ​អភិវឌ្ឍន៍​ផងដែរ។



លោក ជំទាវ​បណ្ឌិត Armida Salsiah Alisjahbana អគ្គលេខាធិការ​រង​អង្គការ សហប្រជាជាតិ និង​ជា​ប្រធាន​គណៈកម្មការ UN-ESCAP បាន​វាយតម្លៃ​ខ្ពស់​ចំពោះ​លទ្ធផល​ផ្លែផ្កា​នៃ​ទំនាក់​រវាង​ក្រសួង​ឧស្សាហកម្ម និង​សិប្បកម្ម និង UN-ESCAP ។ ជាពិសេស​បាន​កោត សរសើរ​ពី​ភាព​រីកចម្រើន​ឆាប់រហ័ស​របស់​កម្ពុជា លើ​វិស័យ​ហេដ្ឋារចនាសម្ព័ន្ធ និង​សេដ្ឋកិច្ច​ទាំងមូល​បើ​ប្រៀបធៀប និង​កំឡុង​ពេល​០៦ ទៅ​០៧ ឆ្នាំមុន ដែល​លោកជំទាវ​បណ្ឌិត​ធ្លាប់​មក​ទស្សនកិច្ច​នៅ​កម្ពុជា។

លោកជំទាវ​បណ្ឌិត បាន​បង្ហាញ​ជំហរ​គាំទ្រ​ការអភិវឌ្ឍន៍​នៅ​កម្ពុជា និង​ផ្តល់​សារៈសំខាន់ ទៅលើ​ការអភិវឌ្ឍន៍​វិស័យ​សហគ្រាស​ធុន​តូច និង​មធ្យម ការ​យកចិត្តទុកដាក់​ទៅលើ​សហគ្រិន​ជា​ស្ត្រី និង​ការបណ្តុះបណ្តាល​ធនធាន​មនុស្ស​ជាដើម ផងដែរ​៕

Source: Kampuchea Thmey Daily