ក្រុមកីឡាករភ្នំពេញក្រោន នឹងធ្វើដំណើរទៅកាន់កីឡដ្ឋានកងយោធពលខេមរភូមិន្ទ (ស្តាតចាស់) ដើម្បីប្រកួតជាមួយក្រុមជើងឯកឆ្នាំមុនណាហ្គាវើល នៅវេលាម៉ោង៦ល្ងាច ថ្ងៃអាទិត្យទី៥ខែឧសភា ឆ្នាំ២០១៩ ប្រចាំសប្ដាហ៍ទី៦នៃពានរង្វាន់លីគកំពូលកម្ពុជា (Metfone Cambodian League 2019)។ កីឡាករ សាវែង សំណាង ដែលបានបង្ហាញខ្លួនបានយ៉ាងល្អក្នុងជំនួបមុនជាមួយក្រុមអាស៊ីអឺរ៉ុប មានបំណងប្រាថ្នាមួយក្នុងការប្រកួតនេះដោយកំនត់ថានឹងយក៣ពិន្ទុពីក្រុមម្ចាស់ផ្ទះឲ្យបាន ហើយសង្ឃឹមថា មិត្តរួមក្រុមនឹងធ្វើបានល្អសម្រាប់ការប្រកួតមួយនេះ។
អ្នកចាំទីវ័យ១៨ឆ្នាំរូបនេះនិយាយថា «ខ្ញុំសប្បាយចិត្តណាស់ដែលបានជួយក្រុមទទួលបាន៣ពិន្ទុសម្រាប់ការប្រកួតសប្តាហ៍មុន ហើយវាក៏ជាការរក្សាសំណាញ់ទីរបស់ខ្ញុំជាលើកដំបូងដែរ (Clean Sheet) ក្នុងចំណោម២ប្រកួតដែលខ្ញុំបានលេងកន្លងមក ។ ការប្រកួតជាមួយក្រុមអាស៊ីអឺរ៉ុបគឺមិនមែនល្អតែខ្ញុំម្នាក់នោះទេ ពួកយើងធ្វើបានល្អទាំងអស់គ្នា ទាំងការការពារ ការប្រយុទ្ធ និងនៅតំបន់កណ្តាល ហើយខ្ញុំសង្ឃឹមថាការប្រកួតក្រោយនេះយើងនឹងលេងបានល្អបែបនេះដូចគ្នា»។
ឆ្លងកាត់ការប្រកួតចំនួន៥លើក ក្រុមភ្នំពេញក្រោនប្រកួតឈ្នះចំនួនតែ២លើកប៉ុណ្ណោះ ហើយឈរនៅលេខរៀងទី៩បណ្តោះអាសន្ននៃតារាងលីគកំពូលកម្ពុជាឆ្នាំ២០១៩នេះ។ ទោះបីជាការប្រកួតមុនៗក្រុមមិនសូវទទួលបានលទ្ធផលល្អក្តីក៏អ្នកចាំទីវ័យក្មេងរូបនេះនៅតែមានក្តីរំពឹងទុកខ្ពស់សម្រាប់ការប្រកួតបន្ទាប់ និងភាពរីកចម្រើនរបស់ក្រុម ហើយរូបគេបានបន្ថែមថា « ការប្រកួតបន្ទាប់យើងត្រូវប៉ះជាមួយក្រុមដែលធំមួយ ខ្ញុំគិតថាវាជាការប្រកួតមួយដែលពិបាកសម្រាប់យើងព្រោះពួកគេសំបូរទៅដោយកីឡាករដែលមានបទពិសោធន៍ ប៉ុន្តែខ្ញុំនៅតែមានជំនឿចិត្តលើក្រុមរបស់យើងថានឹងអាចធ្វើបានល្អសម្រាប់ការប្រកួតនេះ។ ពួកយើងត្រូវការ៣ពិន្ទុដើម្បីកុំឲ្យលេងរៀងរបស់យើងឈរនៅឆ្ងាយពីក្រុមខ្លាំងៗផ្សេងទៀតឆ្ងាយពេក ដូច្នេះពួកយើងមិនមានអ្វីក្រៅពីចង់បាន៣ពិន្ទុសម្រាប់ការប្រកួតក្រៅដីនេះនោះទេ។ សម្រាប់ខ្លួនខ្ញុំផ្ទាល់ ខ្ញុំមិនទាន់ដឹងថា គ្រូនៅតែបន្តដាក់ខ្ញុំលេងទៀត ឬ យ៉ាងណានោះទេ ព្រោះអ្វីៗគឺជាការសម្រេចចិត្តរបស់គាត់ ប៉ុន្តែខ្ញុំបានត្រៀមខ្លួនរួចរាល់ហើយសម្រាប់គ្រប់ការប្រកួតទាំងអស់»៕
Source: Kampuchea Thmey Daily
0 Comments