វង្ស ណយ អ្នកប្រដាល់កម្ពុជា នៃក្លិបកុលបុត្រគុនខ្មែរ និង អ៊ូច ធារិទ្ធ អ្នកប្រដាល់ក្លិបអាណាចក្រគុនខ្មែរ ត្រូវគេផ្គូឲ្យជួបប្រកួតជាមួយអ្នកប្រដាល់ថៃ នៅលើសង្វៀនខារ៉ាបាវស្ទឹងមានជ័យ នារសៀលថ្ងៃសៅរ៍ ទី១១ ខែឧសភា ឆ្នាំ២០១៩នេះ។
វង្ស ណយ គេនឹងត្រូវជួបប្រកួតជាមួយអ្នកប្រដាល់ថៃ បួនងើន វ៉. ដេតវ៉ាន់មិត្ត(Boun gern Wor.Dethwannmit )។ ពួកគេទាំងពីរ នឹងជួបប្រកួតគ្នាក្នុងប្រភេទទម្ងន់៧៣គីឡូក្រាម។
បួនងើន វ៉. ដេតវ៉ាន់មិត្ត គេធ្លាប់មកប្រកួតនៅកម្ពុជាប៉ុន្មានលើកហើយកន្លងមក។ គេមកប្រកួតលើកចុងក្រោយ(១០មករា២០១៨) គឺចាញ់នី សុភី អ្នកប្រដាល់ក្លិបសាលវ័ន្តកីឡាក្នុងទឹកទី២។ យ៉ាងណា អ្នកប្រដាល់ថៃរូបនេះ វាយខ្លាំងគួរសមដែរ។
បួនងើន គេមានកំណត់ត្រាប្រកួត៧៩លើក ឈ្នះ៦២លើក ចាញ់១៦លើក ស្មើ០១លើក និងធ្លាប់វាយដៃគូឲ្យសន្លប់ជាង២០លើកឯណោះ។ តែបើធៀបជាមួយប្រវត្តិប្រកួតរបស់វង្ស ណយ គឹនៅតែតិចជាងដែរ ដោយវង្ស ណយ មានកំណត់ត្រាប្រកួតរហូតដល់២០៤លើក ឈ្នះ១១៩លើក ចាញ់៦៥លើក និងស្មើ៥លើក។
ទោះជាយ៉ាងនេះក្តី វង្ស ណយ មិនអាចមើលងាយបួនងើន វ៉. ដេតវ៉ាន់មិត្ត បានឡើយ ព្រោះអ្នកប្រដាល់ថៃរូបនេះ ទើបតែស្គាល់ចាញ់១៦លើកប៉ុណ្ណោះ ក្នុងការប្រកួតជិត៨០លើកនោះ។
ចាំមើល វង្ស ណយ និង បួនងើន វ៉. ដេតវ៉ាន់មិត្ត នេះ តើនរណាជាអ្នកឈ្នះក្នុងការជួបគ្នាលើកដំបូងនេះ? ។ វង្ស ណយ គេប្រកួតចុងក្រោយនេះ វាយចាញ់អ្នកប្រដាល់ថៃចែគស្យ៉ាមដោយពិន្ទុ កាលពីថ្ងៃទី០៣ ខែមីនា ឆ្នាំ២០១៩កន្លងទៅ។
ចំពោះអ៊ូច ធារិទ្ធ អ្នកប្រដាល់ក្លិបអាណាចក្រគុនខ្មែរ ត្រូវគេផ្គូផ្គងឲ្យជួបប្រកួតជាមួយអ្នកប្រដាល់ថៃឈ្មោះអហ្វសៃ សរ.ចរ.វីចិត្រប៉ែតរិវ (Aofsai Sor.jor.Vichitpetriv) ដោយប្រកួតគ្នាក្នុងទម្ងន់៥៧គ.ក្រ។ ពីរនាក់នេះ ពុំធ្លាប់ដែលប៉ះគ្នាម្តងណានៅ ឡើយទេកន្លង មក។
អ៊ូច ធារិទ្ធ ជាអ្នកប្រដាល់ដែលចាត់ទុកថា ជាជើងខ្លាំងស្រករក្រោយម្នាក់។ គេបានឆ្លងកាត់ការប្រកួតជាមួយអ្នកប្រដាល់ថៃជាង១០លើក និងឡាវ១លើកប៉ុណ្ណោះ។ ដូច្នេះ លើកនេះជាលើកទី១៣ ដែលគេជួបប្រកួតជាមួយថៃនោះ។ កាលពីជួបប្រកួតជាមួយថៃលើកចុងក្រោយនោះ (១៩មេសា២០១៩) គេបានវាយឈ្នះបូវី (Bowie) ក្នុងទឹកទី១។
ធារិទ្ធ មានប្រវត្តិប្រកួតប្រមាណជា៦២លើក ក្នុងនោះវាយឈ្នះ៤៣លើក ចាញ់១៤លើក និង ស្មើ០៥លើក។ គេជាអ្នកប្រដាល់ជើងខ្លាំងស្រករក្រោយដោយមានចិត្តធំ កម្លាំងខ្លាំង វាយមិនសំចៃដៃឡើយ។ ប៉ុន្តែយ៉ាងណាការប្រកួតលើកនេះ មិនដឹងថា ធារិទ្ធអាចយកឈ្នះអប់សៃ បានឬក៏អត់នោះទេ?។
អហ្វសៃ ជាជើងខ្លាំង ដែលមានស្នៀតទាត់ និងកណ្តាប់ដៃល្អ។ ដូច្នេះ អ៊ូច ធារិទ្ធប្រកួតលើកនេះ អាចនឹងជួបការលំបាកច្រើន ព្រោះអ្នកប្រដាល់ថៃរូបនេះ មានស្នៀតប្រដាល់ល្អ និងខ្លាំង។ តែបើអាចឈ្នះបាន គឺមានតែការវាយប្តូរកែងមួយមុខគត់ ដែលប្រថុយដូរជាមួយនឹងជ័យជំនះ។ អ្នកប្រដាល់ថៃរូបនេះ មានប្រវត្តិប្រកួតចំនួន៦២លើក ដោយវាយឈ្នះ៥២លើក ចាញ់០៩លើក និង ស្មើ០១លើក។ ចាំមើល រវាងអ៊ូច ធារិទ្ធ និង អហ្វសៃ តើនរណាជាអ្នកឈ្នះនៅក្នុងការជួបគ្នានេះ?។
ចំណែកការប្រកួតមិត្តភាពខ្មែរនិងខ្មែរវិញ ជ័រ ពៅ អ្នកប្រដាល់ក្លិបថ្មគោលពោធិសែនជ័យ នឹងជួបប្រកួតជាមួយអេលីត សាន់ អ្នកប្រដាល់ក្លិបឆ្មាសសែនសុខគុនខ្មែរ។ ពីរនាក់នេះ ប្រកួតគ្នាក្នុងទម្ងន់៦០គីឡូក្រាម។ ពីរនាក់នេះ មិនធ្លាប់ប៉ះគ្នាទេពីមុនមក។
ជ័រ ពៅ ជាអ្នកប្រដាល់ស្រករក្រោយ។ គេមានស្នៀតជង្គង់ និងទាត់ល្អខ្លាំង។ គេប្រកួតចុងក្រោយនេះបានវាយឈ្នះអ្នកប្រដាល់ថៃភេត ផូស្រ៊ី ក្នុងទឹកទី៤។ ឯ អេលីត សាន់ ដែលជាអ្នកប្រដាល់ជើងចាស់មានកណ្ដាប់ដៃខ្លាំងវិញនោះ ការប្រកួតចុងក្រោយរបស់គេ គឺវាយឈ្នះអ្នកប្រដាល់ថៃដែរគឺយ៉ត ថាណុង ដោយពិន្ទុកាលពីថ្ងៃទី០៧ ខែមេសា ឆ្នាំ២០១៩ កន្លងទៅនេះ។ ចាំមើល រវាងជ័រ ពៅ និង អេលីត សាន់ តើនរណាឈ្នះ?។
ថន ភឿត អ្នកប្រដាល់ក្លិបឃ្លាំងមឿងកីឡា នឹងត្រូវជួបប្រកួតសងសឹកជាមួយមាស សារ៉ាក់ អ្នកប្រដាល់ក្លិបអាណាចក្រគុនខ្មែរ ក្នុងទម្ងន់៦០គីឡូក្រាម ហើយ សយ សុខ អ្នកប្រដាល់ក្លិបពន្លឺវិបុលមានរិទ្ធ ជួបប្រកួតជាមួយសូត្រ វាសនា អ្នកប្រដាល់ក្លិបបក្សីស្លាបដែកដោយជួបគ្នាក្នុងប្រភេទទម្ងន់ ៥៤គីឡូក្រាម៕
Source: Kampuchea Thmey Daily
0 Comments