ស្ទឹងត្រែង ៖ ថ្នាក់ដឹកនាំជាន់ខ្ពស់កងរាជអាវុធហត្ថលើផ្ទៃប្រទេស បានក្រើនរំលឹក ឲ្យកម្លាំងកងរាជអាវុធហត្ថខេត្ត ស្ទឹងត្រែងពង្រឹង ការងារដឹកនាំទប់ស្កាត់ បង្ការ បង្ក្រាបរាល់បទល្មើស ឲ្យមានប្រសិទ្ធភាពជាងមុន ក្នុងពេលដែលខេត្តមួយនេះ មានផ្លូវស្ពានតភ្ជាប់គ្នាល្អពីខេត្តមួយទៅខេត្តមួយ។
ក្នុងពិធីផ្សព្វផ្សាយការងារ(អប់រំនយោបាយចិត្តសាស្ត្រ និងសភាពការណ៍វិវត្តន៍ថ្មីៗ)ឆមាសទី១នៅទីបញ្ជាការកងរាជអាវុធហត្ថនៅខេត្តស្ទឹងត្រែង នាថ្ងៃទី០៨ ខែឧសភា ឆ្នាំ២០១៩ លោកឧត្ដមសេនីយ៍ឯកប្រាក់ សិទ្ធ មេបញ្ជាការរងកងរាជអាវុធហត្ថលើផ្ទៃប្រទេសមានប្រសាសន៍ក្រើនរំលឹកបន្ថែមដល់កម្លាំងកងរាជអាវុធហត្ថខេត្តទាំងអស់រួមគ្នាពង្រឹងការងារដឹកនាំបញ្ជាឲ្យមានប្រសិទ្ធភាព និងប្រកបដោយគុណភាពនិងគុណធម៌។
លោកឧត្ដមសេនីយ៍ឯកបន្តថា ៖ នេះជាកត្តាមិនអាចខ្វះបានដូចនេះ យើងគប្បីជំរុញឲ្យមានសន្ទុះរីកចម្រើនយកព្រៀបខ្លាំងទៅលើការការពារសន្តិសុខជូនប្រជាពលរដ្ឋ ជាពិសេសការបង្ក្រាបបទល្មើសផ្សេងៗធ្វើយ៉ាងណាបង្កើនការអនុវត្តគោលនយោបាយភូមិឃុំមានសុវត្ថិភាពឱ្យកាន់តែមានប្រសិទ្ធភាព។
លោកឧត្ដមសេនីយ៍ឯកមានប្រសាសន៍បន្ថែមថា ៖ ប្រជាពលរដ្ឋមានជំនឿលើការដឹកនាំរបស់រាជរដ្ឋាភិបាល ដូចនេះយើងជាកងទ័ពត្រូវប្រឹងប្រែងបម្រើប្រជាពលរដ្ឋ ធ្វើយ៉ាងណាបង្កលក្ខណៈជូនប្រជាពលរដ្ឋយើងមានឱកាសធ្វើកិច្ចការងារបង្កបង្កើនផល ធានាបាននៅជីវភាពរស់នៅស្ថិតនៅក្រោមការដឹកនាំរបស់រាជរដ្ឋាភិបាលដែលកំពុងជំរុញឱ្យមានកំណើនផ្នែកសេដ្ឋកិច្ច។
លោកឧត្ដមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តបានអះអាងថា ៖ លោក នឹងខិតខំដឹកនាំបញ្ជាឲ្យមានប្រសិទ្ធភាពគោរពតាមបទបញ្ជារបស់មេបញ្ជាការកងរាជអាវុធហត្ថលើផ្ទៃប្រទេសក៏ដូចជាគណៈបញ្ជាការឯកភាពខេត្ត។
លោកឧត្ដមសេនីយ៍ត្រីបន្ថែមថា ៖ កន្លងមកក៏ដូចជាបច្ចុប្បន្នលោកបានរៀបចំកម្លាំងប្រចាំការនៅតាមគោលដៅសំខាន់ៗក្នុងបណ្ដាក្រុងស្រុកក្រោមកិច្ចសហការជាមួយសមត្ថកិច្ចជំនាញផ្សេងៗរួមនឹងអាជ្ញាធរមូលដ្ឋានអនុវត្តគោលនយោបាយ របស់រាជរដ្ឋាភិបាល អ្វីៗគឺដើម្បីជាតិ និងបម្រើប្រជាជន។
លោកឧត្ដមសេនីយ៍ត្រី បានអះអាងដែរថា ៖ ក្នុងនាមកម្លាំងកងរាជអាវុធហត្ថទាំងអស់ នឹងបន្តខិតខំព្យាយាមពុះពារទទួលខុសត្រូវដោយឈរលើស្មារតី និងមានឆន្ទៈមោះមុតស្មោះត្រង់ចំពោះជាតិមាតុភូមិ ក្នុងបេសកកម្ម បង្ការ-បង្ក្រាប-និងសង្គ្រោះ-ឲ្យបានគ្រាប់ពេលវេលា ឆ្លើយតបទៅ នឹងសំណូមពររបស់ប្រជាពលរដ្ឋ៕
Source: Kampuchea Thmey Daily
0 Comments