កំពង់ស្ពឺ ៖ គ្រូបង្រៀនផ្នែកកីឡាម្នាក់ ត្រូវបានខ្មាន់កាំភ្លើងបាញ់សម្លាប់ឆៅៗ ខណៈពេលគ្រូបង្រៀនរូបនេះ កំពុងជួបជុំហូបបាយជាមួយបង្រៀនដទៃទៀតនៅក្នុងសាលារៀន។
ហេតុការណ៍បាញ់សម្លាប់គ្រូបង្រៀនជំនាញផ្នែកកីឡា និងអប់រំកាយខាងលើកើតមានឡើងនៅម៉ោងប្រហែល១រសៀល នាថ្ងៃទី០៨ ខែឧសភា ឆ្នាំ២០១៩នេះ ស្ថិតក្នុងសាលាតាំងរបង ឃុំហោងសំណំស្រុកឱរ៉ាល់ ខេត្តកំពង់ស្ពឺ។
មន្ត្រីនគរបាលស្រុកឱរ៉ាល់បានឲ្យដឹងថា ជនរងគ្រោះមានឈ្មោះទូច វាសនា ភេទប្រុស អាយុ២៥ឆ្នាំ មានមុខរបរគ្រូបង្រៀនផ្នែកកីឡានៅសាលាអនុវិទ្យាល័យតាំងរបង ស្រុកឱរ៉ាល់ នៅភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ បានជួបជុំគ្រូៗដែលនៅបង្រៀនសាលាហូបបាយ និងផឹកស៊ី។
ប្រភពបន្តទៀតថា ខណៈហូបបាយជុំគ្នាជាមួយគ្រូៗ ស្រាប់តែជនដៃដល់ម្នាក់ជិះម៉ូតូមកឈប់ រួចបានបាញ់តម្រង់លើជនរងគ្រោះបណ្ដាលឲ្យស្លាប់ភ្លាមៗ និងព្យាយាមបើកម៉ូតូរត់គេចខ្លួន ប៉ុន្តែត្រូវបានកម្លាំងសមត្ថកិច្ចនគរបាល និងកងរាជអាវុធហត្ថស្ទាក់ចាប់ផងដែរ។
នគរបាលបានឲ្យដឹងទៀតថា បុរសជាឃាតកមានឈ្មោះ ជួន ធានីរាសី ភេទប្រុស អាយុ២៩ឆ្នាំរស់នៅភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ បានជិះម៉ូតូមួយគ្រឿងម៉ាកហុងគុបជ្រុង ពណ៌ខៀវ ពាក់ស្លាកលេខ1A-8250។
យោងតាមប្រភពព័ត៌មានពីសមត្ថកិច្ចបានបញ្ជាក់ថា ករណីឃាតកម្មដ៏សាហាវនេះផ្តើមឡើងដោយសាររឿងគំនុំស្នេហាត្រីកោណទើបឈានដល់ការបាញ់សម្លាប់បែបនេះ។ ក្នុងនោះឃាតកបានប្រើប្រាស់កាំភ្លើងម៉ាកK៥៤ បាញ់ទៅលើជនរងគ្រោះបណ្ដាលឲ្យស្លាប់ភ្លាមៗនៅនឹងកន្លែងកើតហេតុតែម្តង។
បច្ចុប្បន្ន ឃាតក ត្រូវបានសមត្ថកិច្ចឃាត់ខ្លួនបញ្ជូនមកកាន់ស្នងការដ្ឋានខេត្តកំពង់ស្ពឺ ដើម្បីសាកសួរនិងកសាងសំណុំរឿងតាមផ្លូវច្បាប់៕
Source: Kampuchea Thmey Daily
0 Comments