ភ្នំពេញ ៖ អគ្គិភ័យដែលគេមើលឃើញអណ្ដាតភ្លើងឆាបឆេះយ៉ាងសន្ធោសន្ធៅ លាយឡំនឹងផ្សែងខ្មៅខ្មួលខ្មាញ់ បាញ់ពេញផ្ទៃមេឃនោះ គឺជាការឆេះរថយន្ដដឹកស៊ីទែនសាំងនៅក្នុងស្ថានីយប្រេងឥន្ធនៈយីហោ លីម ឡុង ស្ថិតនៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ កាលពីវេលាម៉ោងជិត៦ល្ងាច ថ្ងៃទី៥ ខែឧសភា ឆ្នាំ២០១៩។
ក្នុងប្រតិបត្តិការនេះ សមត្ថកិច្ចប្រើប្រាស់រថយន្ដពន្លត់អគ្គិភ័យអស់រាប់សិបគ្រឿង និង ប្រើរយៈពេលជិត៤ម៉ោង ទើបរលត់ទៅវិញ ទោះបីជាខូចខាតទ្រព្យសម្បត្តិជាច្រើន តែមិនបណ្ដាលឲ្យមនុស្សណាម្នាក់រងរបួស ឬគ្រោះថ្នាក់ដល់អាយុជីវិតឡើយ។
យោងតាមការស្រាវជ្រាវជំហានដំបូង សមត្ថកិច្ចបានឲ្យដឹងថា មូលហេតុ នៃការឆេះបណ្ដាលមកពីឆ្លងចរន្ដអគ្គិសនីចេញពីម៉ូទ័របូមប្រេងផ្ទេរ ចេញពីស៊ីទែនមកស្ដុប ក្នុងស៊ីទែនក្រោមដី នៃស្ថានីយ ហើយក៏ឆាបឆេះភ្លាមៗតែម្ដង។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ មានរថយន្តដឹកប្រេងសាំងពីរគ្រឿង ដឹកប្រេងចូលទៅផ្ទេរប្រេង ក្នុងស្ថានីយប្រេង លីម ឡុង នោះ ប៉ុន្តែកំពុងបូមប្រេងចេញដោយប្រើម៉ូទ័របូម ស្រាប់តែឆ្លងចរន្តអគ្គិសនី ចេញពីម៉ូទ័រនោះ បណ្ដាលឲ្យឆាបឆេះយ៉ាងលឿនតែម្ដង ហើយភ្លាមៗនោះ ក៏មានរថយន្តអគ្គិភ័យចេញទៅជួយអន្តរាគមន៍បាញ់ទឹកពន្លត់ជាបន្ដបន្ទាប់។
ម្ចាស់ស្ថានីយប្រេង លីម ឡុង នេះ មាន ឈ្មោះ ជ្រីក ហ៊ួយ ភេទស្រី អាយុ៤០ឆ្នាំ រស់នៅកន្លែងកើតហេតុ។ ករណីនេះត្រូវសមត្ថកិច្ច ពន្លត់បានទាំងស្រុង នៅម៉ោងជិត១០យប់ ពោលគឺត្រូវប្រើរយៈពេលជិត៤ម៉ោងឯណោះ។ អគ្គិភ័យនេះ មិនបណ្ដាលឲ្យមនុស្សណាម្នាក់ស្លាប់ ឬរបួសទេ តែវាបានបណ្តាលឲ្យខូចខាត រោងបេតុងប្រក់ស័ង្កសីទំហំ២០ម៉ែត្រ គុណ៣០ម៉ែត្រអស់ទាំងស្រុង ឆេះរថយន្តតូចចំនួន០៥គ្រឿង ម៉ូតូចំនួន០៥គ្រឿង រថយន្តស៊ីទែនចំនួន០២គ្រឿង តែពុំបណ្តាលឲ្យឆេះរាលដាល ដល់ផ្ទះអ្នកនៅក្បែរខាងឡើយ។
ក្នុងនោះសមត្ថកិច្ចប្រើប្រាស់រថយន្តពន្លត់អគ្គិភ័យអស់ជាច្រើនគ្រឿងដូចជា រថយន្តការិយាល័យអគ្គិភ័យ នៃស្នងការដ្ឋាននគរបាលរាជធានីភ្នំពេញចំនួន២៥គ្រឿង ប្រើប្រាស់ទឹកអស់១២៥ឡានស្មើនឹង៥០០ម៉ែត្រគូប រថយន្តអគ្គិភ័យក្រសួងមហាផ្ទៃចំនួន៣គ្រឿង ប្រើប្រាស់ទឹកអស់៦ឡាន ស្មើនឹង២៤ម៉ែត្រគូប រថយន្តអគ្គិភ័យកងរាជអាវុធហត្ថរាជធានីភ្នំពេញចំនួន៣គ្រឿង ប្រើប្រាស់ទឹកអស់១០ឡាន ស្មើនឹង៤០ម៉ែត្រគូប រថយន្តអគ្គិភ័យ ក្រុមហ៊ុន OCIC ជ្រោយចង្វារ ចំនួន០៥គ្រឿង ប្រើប្រាស់ទឹកអស់១២ឡាន ស្មើនឹង៤៨ម៉ែត្រគូប រថយន្តអគ្គិភ័យ OCIC កោះពេជ្រចំនួន០២គ្រឿង ប្រើប្រាស់ទឹកអស់០៤ឡាន ស្មើនឹង១៦ម៉ែត្រគូប រថយន្តអគ្គិភ័យ OCIC កំបូលចំនួន០១គ្រឿង ប្រើប្រាស់ទឹកអស់០១ឡាន ស្មើនឹង០៤ម៉ែត្រគូប រថយន្តអគ្គិភ័យកងពលតូចលេខ៧០ចំនួន០៣គ្រឿង ប្រើប្រាស់ទឹកអស់០៦ឡាន ស្មើនឹង២៤ម៉ែត្រគូប រថយន្តអគ្គិភ័យតម្រួតបទបញ្ជា ចំនួន០៤គ្រឿង ប្រើប្រាស់ទឹកអស់០៤ឡាន ស្មើនឹង១៦ម៉ែត្រគូប រថយន្តអគ្គិភ័យព្រលានយន្តហោះចំនួន០១គ្រឿង ប្រើប្រាស់ទឹកអស់១ឡាន ស្មើនឹង១២ម៉ែត្រគូប និងរថយន្តអគ្គិភ័យ សាលាខណ្ឌ០១គ្រឿង ប្រើប្រាស់ទឹកអស់០១ឡាន ស្មើនឹង០៤ម៉ែត្រគូប។
បើតាមរបាយការណ៍បឋមរបស់សមត្ថកិច្ចផ្នែកពន្លត់អគ្គិភ័យថា មូលហេតុនេះផ្ដើមចេញពីការឆេះស៊ីទែនផ្ទុកប្រេង ដែលមានចំណុះខ្ទង់ម៉ឺនលីត្រ ខណៈកំពុងបូមផ្ទេរប្រេងពីស៊ីទែន ចូលទៅក្នុងស៊ីទែនស្ដុកក្រោមដី ស្រាប់តែឆ្លងចរន្តអគ្គិសនីពីម៉ូទ័របូមប្រេងនោះ បណ្ដាលឲ្យឆាបឆេះភ្លាមៗតែម្ដង។
ប្រជាពលរដ្ឋបានលើកឡើងថា ពួកគាត់តែងតែមិនចង់ឲ្យមានការបើកស្ថានីយ លក់ដូរប្រេង នៅក្បែរៗលំនៅដ្ឋានរបស់ពួកគាត់នោះទេ តែកន្លងមកនៅពេលថៅកែនីមួយៗចាប់ផ្ដើម រត់ការបើកស្ថានីយប្រេងម្ដងៗ ទោះបីជាពួកគាត់ប្ដឹងជំទាស់តវ៉ា ថាមិនឲ្យបើកយ៉ាងណាក៏ដោយ ក៏ការរារាំងរបស់ប្រជាពលរដ្ឋមិនដែលទទួលបានប្រសិទ្ធភាពម្ដងណាទេ លុះនៅពេលមានហេតុការណ៍បែបនេះកើតឡើងវារងគ្រោះតែប្រជាពលរដ្ឋនៅក្បែរខាងប៉ុណ្ណោះ។ ចំពោះករណីនេះសំណាងហើយ ដែលសមត្ថកិច្ចអាចបាញ់ទឹកពន្លត់បាន មិនឲ្យរាលដាលដល់ផ្ទះ អ្នកជិតខាងនោះ កុំអីមិនដឹងយ៉ាងណានោះទេ៕
Source: Kampuchea Thmey Daily
0 Comments