ប្រធានាធិបតីអាមេរិកលោក Donald Trump បាននិយាយកាលពីថ្ងៃអាទិត្យថា រដ្ឋអាជ្ញាពិសេសលោក Robert Mueller មិនគួរផ្ដល់សក្ខីកម្មនៅចំពោះមុខសភាស្ដីពីការស៊ើបអង្កេតរបស់ គាត់អំពីការជ្រៀតជ្រែករបស់រុស្ស៊ីក្នុងការបោះឆ្នោតទេដែលនេះជាហេតុបង្កឲ្យមានការប្រឈមមុខដាក់គ្នាជាមួយអ្នក ប្រជាធិបតេយ្យ។
សេចក្ដីថ្លែងការណ៍របស់លោក Trump នេះបានតំណាងឲ្យភាពផ្ទុយគ្នាមួយ។ លោកបាននិយាយនៅពីរថ្ងៃមុននេះថាលោកនឹងទុករឿងនេះឲ្យអគ្គរដ្ឋអាជ្ញាលោក William Barr។ លោក Barr មិនបានលើកឡើងពីការជំទាស់ណាមួយចំពោះសក្ខីកម្មរបស់លោក Mueller ទេ។
លោក Trump បានបង្ហោះ Twitter ថា “មិនមានបទល្មើសនិងមិនមានការរាំងស្ទះទេ។ លោក Mueller មិនគួរផ្ដល់សក្ខីកម្មឡើយ។ មិនមានការធ្វើឡើងវិញសម្រាប់អ្នកប្រជាធិបតេយ្យទេ!”។ របាយការណ៍នេះបានលើកឡើងពីហេតុការណ៍១០យ៉ាងអំពីការរារាំងយុត្តិធម៌ដោយលោកប្រធានាធិបតីប៉ុន្តែវាមិនបានផ្ដល់សាលក្រមទៅលើថាតើគាត់គួរត្រូវបានចោទប្រកាន់ដែរឬក៏អត់នោះទេ។
ប្រធានបក្សប្រជាធិបតេយ្យនៃគណៈកម្មាធិការយុត្តិធម៌សភាលោក Jerry Nadler បានអញ្ជើញលោក Mueller ឲ្យបង្ហាញខ្លួននៅចំពោះមុខគណៈកម្មាធិការនេះមិនឲ្យលើសពីថ្ងៃទី២៣ ខែ ឧសភា ទេដើម្បីផ្ដល់សក្ខីកម្មអំពីលទ្ធផលនៃការស៊ើបអង្កេតរយៈពេល២២ខែរបស់គាត់។
ការអត្ថាធិប្បាយរបស់លោក Trump អាចត្រូវបានជំរុញដោយសារតែការកត់សម្គាល់មួយកាលពីថ្ងៃអាទិត្យពីសមាជិកបក្សប្រជាធិបតេយ្យនៃគណៈកម្មាធិការនេះឈ្មោះ David Cicilline ដែលបាននិយាយក្នុងទូរទស្សន៍ Fox ថាលោក Mueller ត្រូវបានកំណត់ឲ្យផ្ដល់សក្ខីកម្មនៅថ្ងៃទី១៥ ខែឧសភា។
ក្រោយមកលោក Cicilline ហាក់ដូចជាដកថយវិញពីរឿងនេះដោយនិយាយថា “គ្មានអ្វីត្រូវបានព្រមព្រៀងគ្នានៅឡើយទេ”។ទោះបីជាយ៉ាងណាក៏ដោយការបង្ហោះរបស់លោក Trump បានតំណាងឲ្យភាពរឹងមាំនៃជំហររបស់គាត់ហើយហាក់ដូចជាធ្វើឲ្យមានកំហឹងដល់អ្នកប្រជាធិបតេយ្យដែលមានការខឹងសម្បារួចទៅហើយដោយសារតែវិធានការរបស់រដ្ឋបាលក្នុងការរារាំងការសាកសួរជាបន្តបន្ទាប់របស់សភា៕ AFP
Source: Kampuchea Thmey Daily
0 Comments