យន្តហោះដឹកអ្នកដំណើររុស្ស៊ីមួយគ្រឿងបានផ្ទុះឆេះបន្ទាប់ពីចុះចតជាបន្ទាន់នៅអាកាសយានដ្ឋានមមាញឹកបំផុតរបស់ទីក្រុងមូស្គូដែលជាហេតុបណ្តាលឲ្យមនុស្សចំនួន៤១នាក់ស្លាប់ដោយក្នុងនោះរួមមានទាំងកុមារយ៉ាងតិចពីរនាក់ផងដែរ។
វីដេអូដ៏រន្ធត់ដែលគេចែកចាយក្នុងប្រព័ន្ធផ្សព្វផ្សាយសង្គមបានបង្ហាញថា យន្តហោះ Sukhoi Superjet 100 របស់ក្រុមហ៊ុន Aeroflot បានជួបគ្រោះថ្នាក់នៅពេលចុះចតហើយបន្ទាប់មកបានបង្កើនល្បឿនតាមបណ្តោយផ្លូវរត់ក្នុងអាកាសយានដ្ឋានអន្តរជាតិ Sheremetyevo កាលពីថ្ងៃអាទិត្យដោយមានអណ្ដាតភ្លើងឆាបឆេះចេញពីតួយន្តហោះ។
អ្នកដំណើរអាចត្រូវ បានគេមើល ឃើញលោតទៅលើពោងសុវត្ថិភាពនៅ ខាងមុខនិងរត់ចេញពីយន្តហោះដែលកំពុងឆាបឆេះនៅពេលផ្សែងខ្មៅខ្មួលខ្មាញ់ហុយឡើងទៅលើមេឃ។ ក្រុមអ្នកស៊ើបអង្កេតនិយាយថា មនុស្សចំនួន៤១នាក់បានស្លាប់។ គណៈកម្មាធិការស៊ើបអង្កេតរុស្ស៊ីបាននិយាយនៅក្នុងសេចក្តីថ្លែងការណ៍មួយថា “មានមនុស្សចំនួន៧៨នាក់រួមទាំងអាកាសយានិកផងដែរនៅ លើយន្តហោះដែលឆ្ពោះដំណើរទៅទីក្រុងភាគពាយព្យ Murmansk មួយគ្រឿងនេះ”។
លោក Dmitry Matveyev រដ្ឋមន្ត្រីសុខាភិបាលនៃទីក្រុងមូស្គូបាននិយាយនៅព្រឹកថ្ងៃនោះថា មនុស្សចំនួន១១នាក់បានរងរបួស។យន្តហោះដែលដឹកអ្នកដំណើរចំនួន៧៣នាក់និងអាកាសយានិក៥នាក់មួយគ្រឿងនេះបានចាកចេញពីទីក្រុង Sheremetyevo នៅវេលាម៉ោង៦:០២នាទីល្ងាចហើយអាកាសយានិកបានចេញសញ្ញាព្រមានមិនយូរប៉ុន្មានបន្ទាប់ពីនោះ។
ព្រលានយន្តហោះបាននិយាយនៅក្នុងសេចក្តីថ្លែងការណ៍មួយថា “បន្ទាប់ពីហោះហើរ អាកាសយានិកបានរាយការណ៍ពីភាពមិនប្រក្រតីហើយសម្រេចចិត្តត្រលប់មកអាកាសយានដ្ឋានវិញ។ នៅវេលាម៉ោង៦:៣០នាទីល្ងាច យន្តហោះនេះបានចុះចតជាបន្ទាន់”។
ក្រុមហ៊ុនអាកាសចរណ៍រុស្ស៊ី Aeroflot បាននិយាយថា យន្ដហោះនេះត្រូវតែវិលត្រលប់មកព្រលានវិញដោយសារមូលហេតុបច្ចេកទេសហើយម៉ាស៊ីនរបស់វាបានឆាបឆេះនៅពេលចុះចត។ ទោះបីជាយ៉ាងណាក៏ដោយ របាយការណ៍ពីមុនបាននិយាយថា ភ្លើងបានផ្ទុះឡើងនៅពាក់កណ្តាលអាកាស។នាយករដ្ឋមន្ត្រីលោក Dmitry Medvedev បានបញ្ជាឲ្យគណៈកម្មាធិការពិសេសមួយស៊ើបអង្កេតអំពីគ្រោះមហន្តរាយនេះ៕ AFP
Source: Kampuchea Thmey Daily
0 Comments