តាកែវ ៖ ឈ្មួញគ្រឿងញៀន ដែលព្រហើនហ៊ានបាញ់តដៃជាមួយនឹងសមត្ថកិច្ច ក្នុងពេលប្រតិបត្តិការបង្ក្រាបករណីជួញដូរគ្រឿងញៀននៅស្រុកបាទី ត្រូវបានបញ្ជូនទៅតុលាការហើយ នៅព្រឹកថ្ងៃទី០៦ខែឧសភា ឆ្នាំ២០១៩នេះ។
ជនដៃដល់មាន ឈ្មោះ យឹម វណ្ណឌី ភេទប្រុស អាយុ២២ឆ្នាំ ស្រុកកំណើត ភូមិដូង ឃុំដូង ស្រុកបាទី ខេត្តតាកែវ។
លោកឧត្ដមសេនីយ៍ទោ សុខ សំណាង បានឲ្យដឹងថា ក្នុងការចុះបង្ក្រាបនេះដែរ កម្លាំងនគរបាលក្រសួងមហាផ្ទៃ សហការជាមួយកម្លាំងនគរបាល ស្នងការដ្ឋាននគរបាលខេត្តតាកែវ ដឹកនាំបញ្ជាផ្ទាល់ដោយរូបលោក បានចុះបង្ក្រាបករណីជួញដូរគ្រឿងញៀនមួយទ្រង់ទ្រាយធំ ស្ថិតនៅគោលដៅភូមិក្រាំងក្រចាង ខាងជើងវត្តពោធិ ឃុំពារាម ស្រុកបាទី ខេត្តតាកែវ កាលពីថ្ងៃទី០៤ ខែឧសភា ឆ្នាំ ២០១៩។ ដោយក្នុងពេលចុះបង្ក្រាបនៅផ្ទះរបស់ជនសង្ស័យកំពុងស្នាក់នៅនោះ ស្រាប់តែជនល្មើសមានអាវុធបាញ់មកលើសមត្ថកិច្ចរបស់យើង តែមិនបណ្តាលឲ្យមានរបួសស្នាមអ្វីលើសមត្ថកិច្ចឡើយ ។ ភ្លាមនោះកម្លាំងរបស់យើង ក៏បានផ្ទុះអាវុធឡើងលើជាច្រើនគ្រាប់ផងដែរ ដើម្បីគំរាមជនសង្ស័យវិញ រួចក៏ធ្វើការដកថយសិន រួចឡោមព័ទ្ធទីតាំង រង់ចាំកងកម្លាំងអន្តរាគមន៍ពិសេសរបស់ក្រសួងមហាផ្ទៃចុះ យើងបានរៀបចំផែនការថ្មីក្នុងការចូលបង្ក្រាប ដោយប្រើពេលអស់មួយកំណាត់ថ្ងៃ ទើបអាចឃាត់ខ្លួនជនសង្ស័យបានម្នាក់។
ជនសង្ស័យដែលឃាត់ខ្លួនបានមានឈ្មោះ យឹម វណ្ណឌី ភេទប្រុស អាយុ២២ឆ្នាំ ស្រុកកំណើត ភូមិ ដូង ឃុំដូង ស្រុកបាទី ខេត្តតាកែវ។ ក្នុងនោះផងដែរ សមត្ថកិច្ចបានដកហូតវត្ថុតាងរួមមាន កាំភ្លើងខ្លី១ដើម ម៉ាកឡុក ដាវសាម៉ូរៃ២ដើម ទូរស័ព្ទ៤គ្រឿង ស្នាប់ដៃ១ និងដកហូតបានថ្នាំញៀនមួយចំនួនផងដែរ ដែលគ្រឿងញៀនទាំងនេះជនល្មើសនៅសេសសល់ក្រោយការលក់ចែកចាយពីយប់៕
Source: Kampuchea Thmey Daily
0 Comments