សៀមរាប ៖ បុរសជាសន្តិសុខឯកជនម្នាក់បានសម្រេចចិត្តដុតផ្ទះខ្លួនឯងចោល ខណៈគ្មានលុយទិញខ្សែក ឲ្យប្រពន្ធ ហើយប្រពន្ធបាននាំកូនៗរត់ទៅនៅផ្ទះបង បាត់ ហើយហៅមិនមកវិញ។
បន្ទាប់ពីកើតហេតុ សមត្ថកិច្ចមូលដ្ឋានបានទៅដល់ និង បាននាំខ្លួនជនបង្កមកប៉ុស្តិ៍ដើម្បីសួរនាំ។ ហេតុការណ៍នេះកើតឡើងនៅវេលាម៉ោង១៦និង៤០ នាទីថ្ងៃទី០៣ ខែឧសភា ឆ្នាំ២០១៩ នៅភូមិព្រៃធំ សង្កាត់ស្រង៉ែ ក្រុងសៀមរាប។
នគរបាលមូលដ្ឋានបានឲ្យដឹងថា ជនសង្ស័យឈ្មោះយ៉ុម ធីសុភ័ក្រ ភេទប្រុសអាយុ៣២ឆ្នាំ មុខរបរជាសន្តិសុខឯកជន បានធ្វើសកម្មភាព ទិញសាំង ចំនួន០១លីត្រ យកមកដុតផ្ទះ របស់ខ្លួនទំហំ ៣គុណ៤ ម៉ែត្រ ធ្វើពី ឈើ បាំងជញ្ជាំងស័ង្កសី ប្រក់ដំបូលស័ង្កសី។ ដោយជនសង្ស័យបានជះ សាំងទៅលើជញ្ជាំងផ្ទះទិសខាងកើតហើយដុត ហើយឆេះសាំងអស់តែមិនឆេះផ្ទះ តែជនសង្ស័យក៏បានយកក្រណាត់មកដាក់ដុតបន្ថែមទៀត ទើបឆេះអស់ផ្ទះតែម្តង។
សមត្ថកិច្ចបន្តថា ជនរងគ្រោះឈ្មោះ ហួន សិដា ភេទស្រី អាយុ ៣០ ឆ្នាំ មុខរបរ រៀបបន្ទប់ផ្ទះសំណាក់។ ការខូចខាត មានដូចជា ផ្ទះមួយខ្នងទំហំ៣x៤ តុ ចំនួន០១គ្រែ ចំនួន០២ កង្ហារ ចំនួន០១។
សមត្ថកិច្ច បញ្ជាក់ថា មូលហេតុ ជនសង្ស័យអន់ចិត្តនឹងប្រពន្ធ សុំទិញខ្សែក ពាក់តែខ្លួន មិនមានលុយទិញឲ្យ ហើយប្រពន្ធខ្លួនបាននាំកូន២នាក់ រត់ទៅនៅផ្ទះរបស់បង ដោយជនសង្ស័យហៅមកផ្ទះវិញមិនមក ជនសង្ស័យក៏សម្រេចចិត្តដុតផ្ទះចោលតែម្តង។ បច្ចុប្បន្ន ជនបង្កត្រូវបានកម្លាំងនគរបាលមូលដ្ឋានហៅមកប៉ុស្តិ៍រដ្ឋបាលខាងលើ ដើម្បីសួរនាំ៕
Source: Kampuchea Thmey Daily
0 Comments