បាត់ដំបង ៖ ស្ត្រីម្នាក់បានស្លាប់ភ្លាមៗ នៅនឹងកន្លែងកើតហេតុ ក្នុងចំណោមបងប្អូន ២ នាក់ ខណៈដែលជនរងគ្រោះកំពុងឈរអាំងសត្វកណ្តុរលក់ក្បែរផ្លូវ ហើយត្រូវរថយន្តឡើងជែងគ្នាបំបុកតែម្តង។
ហេតុការណ៍នេះ បានកើតឡើងនៅវេលាម៉ោង ៤ ល្ងាច ថ្ងៃទី៤ ខែឧសភា ឆ្នាំ ២០១៩ នៅតាមបណ្តោយផ្លូវជាតិលេខ ៥៧ ស្ថិតក្នុងក្រុមទី១០ ភូមិគោកពន្លៃ សង្កាត់អូរម៉ាល់ ក្រុងបាត់ដំបង ខេត្តបាត់ដំបង។
តាមប្រភពមួយចំនួនបាននិយាយថា នៅមុនពេលកើតហេតុ គឺមានរថយន្តមួយគ្រឿងម៉ាកនីសសាន់ ឌីសសែល (ហុកឡ) ពណ៌ខៀវ ពាក់ស្លាកលេខ បាត់ដំបង 2A-1568 (អ្នកបើកបររត់គេចខ្លួន) កំពុងតែខូចនៅនឹងចិញ្ចើមផ្លូវ ហើយក៏មានរថយន្តមួយ គ្រឿងទៀត ម៉ាកហ៊ីនដាយ (ដឹកដី) គ្មានស្លាកលេខ (អ្នកបើកបររត់គេចខ្លួន)ដែលកំពុង បើកបរក្នុងល្បឿនលឿនក៏បានឡើងជែងនឹងរថយន្តខូចនោះ ធ្វើអោយជ្រុលចង្កូតទៅបុកនឹងមនុស្ស២នាក់ កំពុងឈរលក់សត្វកណ្តុរអាំងនៅចិញ្ចើមផ្លូវបណ្តាលឲ្យស្លាប់ម្នាក់ និងរបួសម្នាក់។
ជនរងគ្រោះមានឈ្មោះ ថា សុវណ្ណ ភេទស្រី អាយុ ៣២ ឆ្នាំ មុខរបរ លក់ដូរ (ស្លាប់) និង ឈ្មោះ ថា សាវុន ភេទស្រី អាយុ ២៤ ឆ្នាំ មុខរបរ លក់ដូរ (របួសធ្ងន់) អ្នកទាំងពីរមានទីលំនៅចំណុចកើតហេតុខាងលើ។
បច្ចុប្បន្នបន្ទាប់ពីអ្នកបើកបរទាំងពីរបានរត់គេចខ្លួនរួចមក សពជនរងគ្រោះដែលបានស្លាប់ក្នុងករណីខាងលើត្រូវបានសាច់ញាតិយកទៅធ្វើបុណ្យតាមប្រពៃណីហើយ ចំណែកជនរងគ្រោះដែលរងរបួសធ្ងន់ ត្រូវបានយកទៅសង្គ្រោះបន្ទាន់នៅមន្ទីរពេទ្យបង្អែកខេត្តបាត់ដំបង។
ដោយឡែកសម្រាប់រថយន្តទាំងពីរខាងលើ ត្រូវបានកម្លាំងការិយាល័យនគរបាលចរាចរណ៍ផ្លូវគោកខេត្ត នាំយកទៅរក្សាទុកដើម្បីបន្តនីតិវិធី៕
Source: Kampuchea Thmey Daily
0 Comments